1, 2. a) Tlhamusela ku hikuyini a kubapatizwa ku kalako ku nga hi nchumu wo hlakana. b) Zini lezi a munhu a faneleko ku tiyiseka ka zona na a nga se bapatizwa?

XANA u muswa a alakanyelako ku bapatizwa? Loku zi hi tano, lezo za dzunzeka hakuva lowo hi wona nchumu wa lisima ku hunza yontlhe wutomini ga munhu. Hambulezo, kota lezi hi nga zi wona ka nzima yi hunzileko, a kubapatizwa a hi nchumu wo hlakana. A kubapatizwa ku yimela a kutihendleleta ka wena ka Jehova, laha u tsumbisako lezaku u ta mu tirela kala kupinzuka hi ku rangisa a kuranza kakwe mahlweni ka zontlhe wutomini ga wena. Hi xigelo lexo, u fanele ku bapatizwa ntsena loku u ringanelwa hi ku maha xiboho lexo, na u zi lava hi mbilu, u tlhela u zi zwisisa ku a ku ti hendleleta zi wula yini.

² Ahati loku u nga tiyiseki lezaku u longile kubapatizwa ke? Kutani loku a vapswali va wena vaku u fanele ku rinzelanyana kala u engetela ku buva mahanyeleni ya wuKristu. U ta kuyini? U nga mbheli ntamu. A kuhambana ni lezo, zi wone kota lungelo ga kuva u kula hi tlhelo ga moya, kasi u bapatizwa na zi nga se teka masiku. Na u hi ni kungo lego maalakanyweni, ehleketa hi lezi u nga ti  vekelisako zona mixuvo xungetano 1) hi kukholwa ka wena, 2) hi mitiro ya wena, ni 3) kubonga ka wena.

3, 4. A vaswa va nga gonza yini ka xikombiso xa Timote?

³ Ehleketa hi lezi u nga wa ta hlamulisa zona a ziwutiso lezi: Xini xi nzi kholwisako lezaku Nungungulu i kona? Xini xi nzi kholwisako lezaku a Biblia i Mhaka yi pimisilweko hi Nungungulu? Hikuyini nzi alakanyako lezaku a matshinya ya milayo ya Nungungulu ma nene nguvu ku hunza ku lanzela mahanyela ya tiko? A ziwutiso lezi a zi mahelwi ku ku vuxela kukanakana. Kanilezi, zi nga ku vuna ku lanzela a wusungukati ga Paule gaku: Hlolani mu “tiva lezi zi nga kuranza ka Nungungulu, loku ko saseka, ku amukelekako, ni ku mbheleleko.” (Rom. 12:2) Kanilezi hikuyini a maKristu ya le Roma ma nga fanele ku hlola kasi ku tiva a zilo ma nga sina ma zi kholwa hi kale?

⁴ Wona xikombiso xi nga lomu ka Biblia. Timote i wa yi tiva khwatsi a Mitsalo. I wa gonzisilwe “kusukela wuhlangini” hi mamani wakwe ni kokwani wakwe. Hambulezo, Paule i lo kuca Timote aku: “Namarela ka lezi u zi gonzileko, ni lezi u tiyisilweko ha zona.” (2 Tim. 3:14, 15) A bhuku go kari gi komba lezaku a gezu legi gi hunzuluselweko giku “u tiyisilweko ha zona” gi wula “ku kholwa ni ku tiyiseka lezaku u li kumile lisine la mhaka yo kari.” Timote i wa khomile lisine hi mandla mambiri. I wa nga li vumeli hi ku ingisa mamani wakwe ni kokwani wakwe, kanilezi i wa ehleketile hi lona kala a tiyiseka. — Gonza 1 Va Le Tesalonika 5:21.

5, 6. Hikuyini zi nga za lisima a ku gonza ku ‘hlola’ kukholwa ka wena na wa ha hi muswa?

⁵ Ahati wena ke? Kuzilava u na ni malembe na u tiva lisine. Loku zi hi tano, zi ngo yini loku wo ti karatela ku hlola khwatsi lezi zi ku mahako u kholwa? Lezo zi ta tiyisa a kukholwa ka wena zi tlhela zi ku vuna ku yima u tiya kasi u nga pengiswi hi kucetelo wa vanghana, mahungu ma haxiwako hi tiko, kutani mbilu ya wena wutsumbu.

⁶ A ku gonza ku ‘hlola’ a kukholwa ka wena na wa ha hi muswa zi ta ku longisela kasi ku nyikela mihlamulo yo zwala ka vaswa-kuloni loku va ku maha ziwutiso zo khwatsi hi lezi: ‘Xini xi ku tiyisako ku Nungungulu i kona? Hikuyini a Nungungulu wa liranzo a tsikako zilo za kubiha zi humelela? Zi mahisa kuyini ku Nungungulu a tshama a hi kona xontlhe xikhati?’ Loku u ti longisele, a ziwutiso lezi zi nga ta hungula a kukholwa ka wena kanilezi zi ta ku kuca ku etisa xigonzo xa wena xa Biblia.

7-9. Tlhamusela lezi a xaxamelo lowu wu nge “O Que a Bíblia Realmente Ensina?” lomu ka saite ya hina wu nga ku vunisako zona ku tiyisa kukholwa ka wena.

⁷ A kuva ni xigonzo xo eta xa wena wutsumbu zi nga ku vuna ku hlamula ziwutiso lezo, u susa kukanakana kontlhe, u tlhela u tiya khwatsi ka lezi u zi kholwako. (Miti. 17:11) Ku na ni zitiro zo tala zi longiselweko kasi ku ku vuna ku maha lezo. A votala va vuneka nguvu hi ku gonza a broxura A Origem da Vida — Cinco Perguntas Que Merecem Resposta ni bhuku Existe um Criador Que Se Importa com Você? A vaswa vo tala va vuneka kambe hi xipanze lexi xi nge “O Que a Bíblia Realmente Ensina?” lomu ka saite ya hina ya jw.org. A xaxamelo lowo wa xigonzo u nga wu kuma hi ku nghena ka ENSINOS BÍBLICOS > ADOLESCENTES. A nzima yinwe ni yinwani yi nga lomo yi mahelwe ku tiyisa kukholwa ka wena mayelano ni mhaka yo kari yi gonzisiwako hi Biblia.

⁸ U sina u gi tiva Biblia, hikwalaho a ziwutiso zo kari zi nga ka tinzima leto u nga hlamula na u nga pimisangi kumbiri. Kanilezi xini xi ku tiyisako lezaku a mihlamulo leyo hi yona futsi? A tinzima leto ti ku kuca ku ehleketa hi mitsalo yo hambanahambana, u  gumesa u tsala lezi u zi alakanyako hi yona. Ti nga ku vuna ku alakanyela lezi u nga tlhamuselisako zona a kukholwa ka wena ka vanwani. A xipanze lexo xa lomu ka saite ya hina xi vuna vaswa vo tala lezaku va tiyisa kukholwa kabye. Loku wenawu u zi kota ku nghena ka xipanze lexo, ma ngava mahungu ya ma nene yo ma tirisa ka xigonzo xa wena wutsumbu.

⁹ A xikhati u tiyisako a kukholwa ka wena, uba zambo ga lisima nguvu gi ku yisako kubapatizweni. A makabye wo kari a ha hiko muswa i te ngalo: “Na nzi nga se boha ku bapatizwa, nzi lo gonza Biblia nzi wona lezaku legi hi gona a wukhongeli ga lisine. Siku ni siku nzi hanyako, a kukholwa loko kuya ku tiya.”

10. Hikuyini ku rinzelwako lezaku a muKristu a bapatizilweko ava ni mitiro yi zwananako ni kukholwa kakwe?

¹⁰ A Biblia gi wula lezaku a “kukholwa, loku ku nga hi na mitiro, ku file.” (Jak. 2:17) Loku a kukholwa ka wena ku tiyile, zi te dlunya lezaku u ta ku kombisa hi mitiro ya wena. Mitiro muni? A Biblia gi wulawula hi ‘mahanyela yo basa ni wukhongeli.’ — Gonza 2 Pedro 3:11.

11. Tlhamusela lezaku a kuva ni ‘mahanyela yo basa’ zi wula yini.

¹¹ Kasi kuva ni ‘mahanyela yo basa,’ u fanele ku potsa mahanyela ma nga hlazekangiko. Hi xihi xiyimo xa wena mhakeni leyi? Hi xikombiso, ehleketa hi ntlhanu wa tihweti ni yinwe zita seno. Xana u kombisile lezaku a “kupima” ka wena ku tolovetilwe ku hambanisa kusaseka ni kubiha? (Maheb. 5:14) Wa alakanya makhati yo kari u nga hlula xiringo kutani tshikelelo wa vaswa-kuloni? A mahanyela ya wena xikoleni ma zwanana khwatsi ni kukholwa ka wena ke? Xana wa yimela kukholwa ka wena wutshanwini ga ku zama ku fana ni zigonzani-kuloni kasi u potsa ku hlekiwa? (1 Ped. 4:3, 4) Lisine lezaku hontlheni a hi mbhelelangi. Hambu lava va nga ni malembe na va tirela Jehova va nga tshuka va chava ku yimela kukholwa kabye. Hambulezo, a munhu a ti hendleletileko ka Jehova i fanele ku tizwa matshanza hi ku vitaniwa hi vito ga Nungungulu a tlhela a zi kombisa hi mahanyela yakwe.

12. Hi yihi a mitiro yo kari ya “wukhongeli,” niku u fanele ku yi wonisa kuyini?

¹² Ahati a mitiro ya “wukhongeli” ke? A mitiro leyo yi patsa kuva kona mitlhanganweni ni ku xumayela a mahungu yo saseka. Yi patsa zilo zinwani kambe lezi a vanwani va kalako va nga zi woni, zo kota mikhongelo leyi u yi mahako na u hi wece ni xigonzo xa wena wutsumbu. A munhu a hendleletileko wutomi gakwe ka Jehova a nga ta wona mitiro leyo kota nzhwalo. Kanilezi i tava ni mawonela ya Hosi Davida, loyi a ngaku: “Nungungulu wa mina, nza nengela ku maha kuranza ka wena; a nawo wa wena wu lomu mbilwini ya mina.” — Tis. 40:8.

13, 14. I lulamiselo muni gi nga kona kasi ku ku vuna ku maha mitiro ya “wukhongeli,” niku a vaswa vo kari va vunisilwe kuyini hi gona?

¹³ Kasi ku ku vuna ku ti vekela mixuvo, a bhuku Os Jovens Perguntam — Respostas Práticas, Volume 2, gi nyika mahungu yo kari ma vunako. Ka maphajina 308 ni 309, u kuciwa ku tsala mihlamulo ya ziwutiso zo kota lezi: “Wa wula zilo zo kongoma ka mikhongelo ya wena ke? Kona yi komba yini xungetano hi liranzo la wena hi Jehova?” “Timhaka muni u ti patsako ka xigonzo xa wena?” “Waya ntirweni wa simu hambu loku a vapswali va wena va ngayi ke?” Ka maphajina lawo u nyikwa wutshamu ga ku tsala ni zihi lezi u lavako ku ti karatela ku zi tatisa xungetano hi mikhongelo ya wena, xigonzo xa wena, ni ntiro wa wena wa kuxumayela.

¹⁴ A vaswa vo tala va alakanyelako ku bapatizwa va vuneka nguvu hi ku kambisisa ziwutiso  lezo. A muswa wo kari a vitwako Tilda i ngalo: “Nzi tirisile mahungu lawo kasi ku ti vekela mixuvo. Nzi lo yi tatisa hi wunwe wunwe, niku laha ku nga hunza xipimo xa lembe, makunu nzi wa longile ku bapatizwa.” A jaha go kari gi vitwako Patrick gonawu gi vunekile hi ndlela yo fana ni yaleyo. Gi te ngalo: “Nzi wa sina nzi yi tiva mixuvo ya mina, kanilezi a ku yi tsala hi laha ka phepha zi nzi vunile kulwa nguvu kasi ku yi tatisa.”

15. Tlhamusela a ku hikuyini a xiboho xa kubapatizwa xi faneleko kuva xa munhu wutsumbu.

¹⁵ A xinwe xa ziwutiso zi tlhotlhako nguvu mapimo ka maphajina lawo hi lexi xi nge: “U nga simama u tirela Jehova hambu loku a vapswali va wena ni vanghana va zi tsika ke?” Alakanya lezaku kota muKristu a ti hendleletileko a tlhela a bapatizwa, u ta ti hlamulela wece mahlweni ka Jehova. A wu faneli ku mu tirela hi ku wona vanwani — ge hambu vapswali va wena. A mahanyela ya wena yo basa ni mitiro ya wena ya wukhongeli zi komba lezaku u khomile lisine hi mandla mambiri niku u kari uba mazambo ya moya kasi ku bapatizwa.

16, 17. a) Xini xi faneleko ku kuca munhu lezaku a maha muKristu? b) A kubonga loku a munhu a faneleko kuva nako hi nzhiho ku nga fananisiswa kuyini?

¹⁶ A wanuna wo kari a nga nwele Nayo wa Mosi i lo wutisa Jesu aku: “A nayo wa hombe milayweni yontlhe hi wihi?” Jesu i lo hlamula aku: “Ranza Hosi Nungungulu wa wena hi mbilu ya wena yontlhe, ni muhefemulo wa wena wontlhe, ni kupima ka wena kontlhe.” (Mat. 22:35-37) Jesu i lo komba lexi xi faneleko ku hi susumeta mitirweni ya wuKristu, a ku patsa ni kubapatizwa — ku nga ku ranza Jehova hi mbilu yontlhe. A yinwe ya tindlela ta ti nene nguvu ta ku engetela liranzo la wena hi Jehova ku ehleketa hi xinyikiwo xa hombe ka zontlhe a hi nyikileko — wu nga muphahlelo wa nzhiho wa N’wana wakwe. (Gonza 2 Va Le Korinte 5:14, 15; 1 Johani 4:9, 19.) A ku ehleketa hi nzhiho ni lezi wu ku vunisako zona zi ta ku kuca ku bonga Jehova.

¹⁷ Lezi u to ti zwisa zona hi nzhiho zi nga fananiswa hi ndlela leyi: Ehleketa hi munhu a ku tsawulako na u mbombomela lomu matini. U wa ta su mu fularela u ti yela kaya, u rivala lezi a ku maheleko ke? Ne ni kutsongwani! Handle ko kanakana u wa ta ti wona na u hi ni mangava ka munhu loyi a ku ponisileko. Hi lisine loku ku wa nga hi yena, u wa file! A mangava hi nga nawo ka Jehova na Jesu Kristu ma hunza lawo. Hi mawulela manwani, loku wu wa nga hi nzhiho, a munwe ni munwani wa hina i wa ta mitiwa hi xionho ni kufa. Kanilezi hi kota ya liranzo leli va li kombisileko, hi rinzela zilo za sasekela ga  cima — ku nga ku hanya kala kupinzuka misaveni ya paradise!

18, 19. a) Hikuyini u nga faneliko ku chava ku ti hendleleta ka Jehova? b) A ku tirela Jehova zi nanzihisa wutomi ga wena hi ndlela muni?

¹⁸ Wa mu bonga Jehova hi lezi a ku maheleko ke? Loku zi hi tano, za fanela kuva u hendleleta wutomi ga wena ka Jehova u tlhela u bapatizwa. Alakanya lezaku a ku ti hendleleta zi wula ku tsumbisa Jehova lezaku u ta maha kuranza kakwe kala kupinzuka, hambu loku ko maheka ni xihi. Xana u fanele ku chava ku maha xitsumbiso lexo? Ahihi! U nga rivali lezaku Jehova i ku xuvela za zi nene, niku “wa chachazela lava va mu lavako.” (Maheb. 11:6) A ku hendleleta wutomi ga wena ka Jehova ni ku bapatizwa a zi binzisi wutomi ga wena. Wutshanwini ga lezo, a ku tirela Jehova zi nanzihisa wutomi ga wena. A makabye wo kari wa 24 wa malembe a bapatizilweko na a nga se chikela ka tanga yo sangula ku ti tshotshota i ngalo: “Kuzilava na nzi vile ni kuzwisisa ka hombe loku nzi wa hi wa hombana, kanilezi a ku maha xiboho xa ku ti hendleleta ka Jehova zi nzi vikele ka zilo za tiko.”

¹⁹ Hi nga wona kuhambana ku nga kona xikari ka Jehova na Satani, loyi a kalako a nga hi na mhaka ni kutshamiseka ka wena! Satani a nga nyiki nchachazelo wu pinzukako ka lava va yimako naye. Kona i wa ta zi kotisa kuyini? Yena wutsumbu a nga na nchumu wo tsakisa a wu rinzelako. A nga ku nyikisa kuyini nchumu wo kala a nga hi nawo? Satani a nga na xinwani xo ku nyika, ahandle ka makhombo lawa yena a to welwa hi wona!— Kuv. 20:10.

20. A muswa a nga maha yini kasi ku kula hi tlhelo ga moya lezaku a ti hendleleta ni kubapatizwa ke? (Wona kambe a kwadru “ Zilo zi to ku vuna ku kula hi tlhelo ga moya.”)

²⁰ Zi te dlunya lezaku a ku hendleleta wutomi ga wena ka Jehova hi zona zi lavekako. U longile kuba zambo lego ke? Loku zi hi tano, u nga chavi nchumu. Ni loku ka ha laveka kuva u rinzelanyana, tirisa a mawonela ma nga ka nzima leyi kasi u simama ku kula hi tlhelo ga moya. Paule i tsalele va le Filipi aku: “A hi fambeni hi lezi hi chikeleko ka zona.” (Fil. 3:16) Loku u lanzela wusungukati legi, lokuloku u ta hendleleta wutomi ga wena ka Jehova u tlhela u bapatizwa.