NA A nga se tlakukela tilweni, Jesu i byelile vapizani vakwe aku: “Mu ta maha vakustumunyu va mina . . . kala le magemeta-musi ya misava.” (Miti. 1:8) A maKristu lawo yo sangula ma wa ta zi kotisa kuyini ku xumayela kala magemeta-musi ya misava?

Martin Goodman, a mugonzisi wa Universidade ya Oxford, i wula lezaku “a ku tiva lezaku va nyikilwe ntiro zi wa hambanisa maKristu ni mitlawa yinwani ya wukhongeli, a ku patsa ni vaJuda, xikhatini xa mufumo wa Roma.” Jesu i wa fambafambile ka matshamu yo tsalangana kasi ku maha ntiro wakwe. Hi kulanzela xikombiso xakwe, a maKristu ya lisine ma wa zi zwisisa lezaku a ku “kanela a ivangeli ya Mufumo wa Nungungulu” zi patsa ku lava vanhu va xuvako ku tiva lisine la Biblia. (Luka 4:43) Lexi xinwe xa zigelo za kuva a bandla ga wuKristu ga zana ga malembe go sangula gi vile ni vapostoli, ku nga gezu gi wulako vanhu va rumilweko, kutani varumiwa. (Mar. 3:14) Jesu i lo laya valanzeli vakwe aku: “Hikwalaho fambani, mu va maha vapizani a matiko wontlhe.” — Mat. 28:18-20.

A vapostoli va Jesu va 12 a va ha hi kona nyamutlha laha misaveni, hambulezo a malanza yo tala ya Jehova ma na ni moya wa wurumiwa. Laha ma zwako a xirambo xo anzisa ntiro wabye wa kuxumayela, ma hlamula maku: “Hi mina, ruma mina”! (Isa. 6:8) A vanwani — vo kota makume ya mazana ya vamakabye va gonzileko Xikola xa Gileadi — va rurile vaya ka matiko ya le kule. A vanwani va rurile vaya ka matshamu manwani ya tiko gabye. A votala va gonzile lirimi liswa kasi ku tira ka mabandla kutani mitlawa yi khatalelako vanhu va wulawulako lirimi lelo. A vamakabye lavo va rurileko vaya lomu ku nga ni xilaveko kutani va gonzileko lirimi liswa a hi ku khwatsi zo va olovela. Va lavile moya wa kutitsona kasi ku kombisa liranzo labye hi Jehova ni vaakelane. Anzhako ka ku hlayela ntsengo, va lo ti nyikela kasi ku vuna. (Luka 14:28-30) A vamakabye lava va bako zambo lego va tatisa xilaveko xa hombe nguvu.

 Hambulezo, a ziyimo zi hambene. A hi tontlhe Timboni ti zi kotako ku rura tiya lomu ku nga ni xilaveko xa hombe kutani ku gonza lirimi liswa. Makunu, xana hi nga kombisa moya wa wurumiwa kwalomu bandleni ga hina?

A maKristu ya zana ga malembe go sangula ma wa hi nawo moya wa wurumiwa, kanilezi a kutala ka wona za koteka ku ngha ma simamile matikweni yabye ya mabeleko. Hambulezo, a magezu ma byelilweko Timote ma wa tira kabye niku ma tira ka wontlhe a malanza ya Nungungulu. Me ngalo: “Tira a ntiro wa muvangeli, u hetisa a ntiro wa wena.” (2 Tim. 4:5) A xileletelo xa ku xumayela mahungu ya Mufumo ni ku maha vapizani xa tira ka maKristu wontlhe ni kwihi lomu ma nga kona. Tlhatakumbiri, a matshamela yo tala ya ntiro wa wurumiwa ma nga tira kwalaha bandleni ga hina.

Hi xikombiso, a murumiwa a nga ka tiko ginwani i fanele ku ti zwananisa ni ziyimo za ziswa. A zilo zo tala ka xiavelo xakwe xa xiswa zi hambene nguvu ni lezi a zi tivako. Ahati loku hi nga zi koti ku rura hiya lomu ku nga ni xilaveko xa hombe ke? Xana hi fanele ku ti byela lezaku ha tiva zontlhe xungetano hi xipanze xa bandla ga hina? Kutani hi nga zama ku lava tindlela ta tiswa ta ku vuna vanhu? Hi xikombiso, hi 1940, a vamakabye va kucilwe ku hlawula siku ginwe hi viki kasi ku xumayela lomu maruweni. Wena ke, u nga maha lezo? Ahati a lulamiselo ga ku tirisa zikarinyana za ku kombisa mabhuku? A xiwutiso xo tiya hi lexi: Wa ti karatela ku tirisa tindlela leto ta ku xumayela mahungu yo saseka, leti kuzilava ti nga ta tiswa ka wena ke?

A kuva ni mawonela ma nene zi ta hi vuna ku xumayela hi kuhiseka. A kutala ka zikhati, lava va ti hendleletako kasi ku rura vaya lomu ku nga ni xilaveko xa hombe kutani ku tira ka xipanze xa lirimi linwani vahuweleli va nga ni wutlhari ga hombe. Hikwalaho, va ngava makatekwa ka votala a xikhati lexi va rangela a ntiro wa simu. Tlhatakumbiri, a kutala ka zikhati a varumiwa va rangela malulamiselo ya bandla kala kuva ni vamakabye va ringanelwako va bandla lego. Loku u hi Mboni ya xinuna yi bapatizilweko, xana “wa navela” ku tirela makholwa-kuloni hi kuziranza bandleni ga wena? — 1 Tim. 3:1.

Ahandle ka ku xumayela hi kuhiseka ni ku ti nyiketela kasi ku rwala wutihlamuleli go kari lomu bandleni, ku na ni tindlela tinwani hi nga vunako hi tona bandla ga hina. Ni wihi munhu — kani muswa kani wa hombe, wanuna kutani wasati — a nga ‘tangalisa’ a makholwa-kulobye lawa ma nga ni xilaveko. — Kol. 4:11.

Kasi ku vuna makholwa-kulori, hi fanele ku ma tiva khwatsi. A Biblia gi hi kuca ku “khatalelana” a xikhati lexi hi tlhanganako. (Maheb. 10:24) A magezu lawa ma komba ku hambu lezi hi nga faneliko ku ti nghenisela ka za vanwani, hi fanele ku ti karatela ku tiva vamakabye va hina ni lezi va lavako ku vuniwa ka zona. Zi ngava zilo za xiviri, za lomu mbilwini, kutani za moya. A ku vuna a makholwa-kulori a hi wutihlamuleli ga madota ni malanza ya wutireli ntsena. Lisine lezaku ku na ni zikhati lezi hakunene ku to laveka a munwe wa vamakabye lavo kasi ku nyika xivuno. (Gal. 6:1) Hambulezo, hontlheni hi nga vuna vamakabye va khosaheleko kutani mingango yi kumanako ni zikarato.

Hi xikombiso, a xikhati lexi Salvatore a nga kumana ni xikarato xa timali laha ka kuza a kurumeteka ku xavisa koponi yakwe, ni muti wakwe, ni zilo zo tala za laha mutini, i lo karateka hi ku nga tivi lezaku a ngango wakwe wu ta hanya hi yini. A ngango wo kari wa laha bandleni wu lo wona xikarato xabye. Wu lo va nyika mali, wu vuna Salvatore ni sati wakwe lezaku va kuma ntiro, wu tlhela wu tshama nawo ka magambo yo tala kasi ku bhula ni ku tiyisa ngango wontlhe. Va lo wumba wunghana ga hombe legi makunu gi nga ni malembe. Hambu lezi va nga karatekile kusanguleni, zalezi loku a mingango leyi ya yimbiri yi cuwuka nzhako, yi alakanya zikhati zo tsakisa lezi va tshamileko zinwe.

Ka maKristu ya lisine, a wukhongeli a hi nchumu wa xihundla. Kota lezi Jesu a zi kombileko, hi fanele ku byela vanhu vontlhe a zitsumbiso zo tsakisa zi nga lomu ka Biblia. Kani ha zi kota ku rura kani ha tsanzeka, hi nga maha zontlhe zi nga ntanwini wa hina kasi ku vuna vanwani. Lezo hi nga zi maha ka bandla galegi hi nga ka gona zezi. (Gal. 6:10) Loku hi maha lezo, hi tava ni litsako la ku nyika niku hi ta “pswala mihanzu mitirweni yontlhe yo saseka.” — Kol. 1:10; Miti. 20:35.