1-3. a) Xana a maKristu ma zi kombisa kuyini lezaku ma yi donela mari a mitlhangano? (Wona mufota laha hehla.) b) Hi ta wulawula hi yini ka nzima leyi?

LAHA Corinna a nga hi ni 17 wa malembe, a mamani wakwe i lo khomiwa aya livaleni la xanisa le União Soviética. Hi nzhako ka xikhati, Corinna yenawu i lo khomiwa a yisiwa Sibéria, ku nga hi kule nguvu ni kaya kakwe. Va wa mu khomisa ku khwatsi i khumbi niku ka zikhati zinwani i wa kurumetwa ku tira laha libalangeni ka xirami xa hombe, na a nga hi na tinguwo to kufumela. Hambu lezi va nga yimisana ni ziyimo lezo zo binza, Corinna ni makabye munwani wa xisati va wa ti yimisele kuya ka mutlhangano wo kari wa bandla.

² I tlhamusela lezi: “Hi lo suka laha hi nga tira kona ni wusiku, hi famba 25 wa tikilometro na hiya ka wutshamu gi nyimako zitimela. A xitimela xi lo suka hi 2 hora wa kuca, xi famba 6 wa tihora kala laha hi nga ya chika kona, hi tlhela hi famba 10 wa tikilometro kasi ku chikela laha a mutlhangano wu nga mahelwa kona.” Xana a lipfhumba lelo li bhinzulile? Corinna i bika lawa: “Ka mutlhangano lowo, hi lo gonza A Murinzeli ni ku yimbelela tisimu ta Mufumo. Lezo zi hi akile nguvu zi tlhela zi tiyisa a kukholwa ka hina.” Hambu lezi ku nga hunza masiku manharu na va nga se tlhela ntirweni wabye, a muwoneleli wa wutshamu legi va nga tira ka gona a nga zangi a zi polile lezaku Corinna ni munghana wakwe va wa nga hi kona.

 ³ Xontlhe xikhati a vanhu va Jehova va zi nyika nguvu lisima a zikhati za ku tlhangana. Zalezo ku nga wumbiwa a bandla ga wuKristu, a valanzeli va Jesu “va lo pinyamela . . . kutlhanganeni.” (Miti. 2:42) Kuzilava wenawu wa zi tsakela nguvu kuya mitlhanganweni ya bandla hi kukhanzakanya. Hambulezo, a maKristu wontlhe ma kumana ni zihingakanyiso. A ntiro wa kutihanyisa, ku talelwa hi zo maha, kutani mikaralo ya mitiro ya hina ya siku ni siku zi nga tshuka zi karatisa kuya mitlhanganweni. Xini xi to hi kuca kulwa ni zihingakanyiso lezo kasi hi simama kuya mitlhanganweni hi kukhanzakanya? ^[1] Hi nga vunisa kuyini a zigonzani za hina za Biblia ni vanwani lezaku va wona lisima la kuya mitlhanganweni? Ka nzima leyi hi ta wona 8 wa zigelo za kuva hi tlhangana kasi ku khozela. Hi ta avanyisa a zigelo lezo hi zipanze zinharu: Lezi u vunekisako zona, lezi a vanwani va vunekisako zona, ni lezi Jehova a khumbiswako zona loku uva kona mitlhanganweni. ^[2]

4. A kutlhangana ka hina ku hi vunisa kuyini a ku gonza ha Jehova?

⁴ A mitlhangano ya hi gonzisa. A mitlhangano yontlhe ya bandla yi hi vuna ku gonza hi Nungungulu wa hina, Jehova. Hi xikombiso, ka malembanyana nzhako hi gonzile a bhuku ‘Tshamani liranzweni la Nungungulu’ ka Xigonzo xa Biblia xa bandla. Xana a ku gonza a matshamela ya Nungungulu, ni kuzwa mihlamulo yo huma mbilwini ya vamakabye va wena, a zi ku kucangi ku mu ranza nguvu a Dadani wa wena wa le tilweni? Ha engetela wutivi ga hina ga Mhaka ya Nungungulu kambe laha hi dembako ndleve hi ingisela tikanelo, mikombiso, ni kugonziwa ka Biblia. (Neh. 8:8) Hi xikombiso, ehleketa hi titshomba ta moya u ti polako viki ni viki laha u longiselako timhaka-tshinya ta kugonza ka Biblia ni xikhati u ti ingiselako!

5. A mitlhangano yi ku vunisa kuyini a ku tirisa lezi u zi gonzako lomu ka Biblia ni ku chukwatisa a maxumayelela ya wena?

⁵ A mitlhangano yi hi gonzisa ku tirisa a matshinya ya milayo ya Biblia ka matshamela wontlhe ya wutomi ga hina. (1 Tes. 4: 9, 10) Hi xikombiso, a xigonzo xa Murinzeli xi zwananiswa ni zilaveko za vanhu va Nungungulu. Xana ku na ni xigonzo xo kari xa Murinzeli xi ku kucileko ku ehleketa hi mixuvo ya wena, ku tsetselela maKristu-kuloni, kutani ku chukwatisa mikhongelo ya wena? A mutlhangano wa laha xikari ka viki wu hi gonzisa ku xumayela. Hi gonza lezi hi nga xumayelisako zona mahungu yo saseka ni ku gonzisa matshinya ya milayo ya Biblia hi ndlela yi bhinzulako. — Mat. 28:19, 20.

6. A mitlhangano ya hina yi hi vunisa kuyini a ku tshama na hi tiyile?

⁶ A mitlhangano ya hi tiyisa. A tiko legi go biha gi nga hi rera mapimo, gi hi tshova timbilu, gi tlhela gi hi vangela gome ga moya. Kanilezi, a mitlhangano ya bandla ya hi tiyisa yi tlhela yi hi nyika ntamu. (Gonza Mitiro 15:30-32.) Ka mitlhangano ya hina, hi tolovela ku kambisisa a kutatiseka ka ziprofeto za Biblia. Lezo zi hi maha hi tiyiseka hi kumbhelela ku lezi Jehova a tsumbisako nyamutlha zonawu zi ta tatiseka. Hi lisine, a hi lava va yimako laha xiluvelweni ntsena va hi tiyisako. A maKristu-kulori lawa ma nyikako mihlamulo ni ku yimbelela na zi huma mbilwini wonawu ma hi tiyisa. (1 Kor. 14:26) Niku a xikhati lexi hi bhulako ni vamakabye mahlweni ni nzhako ka mitlhangano, hi ti wona na hi ranziwa hi tlhela hi kuma litsako la hombe. — 1 Kor. 16:17, 18.

7. Hikuyini zi nga za lisima a kuya mitlhanganweni?

⁷ Loku hi hi mitlhanganweni ha amukela moya wa ku basa. Jesu Kristu loyi makunu a nga xitshanwini xa wuhosi i te ngalo: “Loyi a nga ni tindleve, ngha a ingisa lezi a moya wu byelako mabandla.” (Kuv. 2:7) Jesu i rangela bandla ga wuKristu hi moya wa ku  basa. A moya wa ku basa wu hi vuna ku hlula ziringo, wu hi nyika ntamu ni wutlhari go xumayela, wu tlhela wu hi vuna ku maha ziboho za zi nene. A hi chukwana hi lonzowota a malulamiselo wontlhe ma hi vunako ku kuma moya wa kubasa, a ku patsa ni mitlhangano ya bandla ke?

8. Laha a vamakabye va hina va hi wonako mitlhanganweni ni ku hizwa na hi hlamula ni ku yimbelela, xana va vunekisa kuyini? (Wona kwadru “Siku ni siku i suka na a hi chukwana.”)

⁸ A mitlhangano yi hi nyika lungelo ga ku komba vamakabye va hina lezaku ha va ranza. Ehleketa khwatsi hi zikarato lezi a vamakabye vo kari va yimisanako nazo bandleni ga nwina. A zi hlamalisi lezi Paule a nga tsala aku: “Ngha hi khatalelana”! Anzhako ka ku wula magezu lawo, Paule i lo tlhamusela lezaku hi nga kombisa kukhatala ka hina hi ku nga tsiki kutlhangana. (Maheb. 10:24, 25) Hi kuva kona mitlhanganweni u komba lezaku a vakhozeli-kuloni va ringanelwa hi xikhati xa wena ni kukhatala ka wena. A ku tsika lezo, a mihlamulo ya wena yo huma mbilwini ni kuyimbelela ka wena za tiyisa Timboni-kuloni. — Kol. 3:16.

9, 10. a) Tlhamusela lezi a magezu ya Jesu ma nga ka Johani 10:16 ma hi vunisako zona ku wona lisima la ku tlhangana ni vamakabye va hina. b) Loku hiva mitlhanganweni hi kukhanzakanya, hi nga mu vunisa kuyini a munhu loyi a tsikilweko hi va ngango wakwe?

⁹ A mitlhangano yi tiyisa kubohana ka hina ni makholwa-kulori. (Gonza Johani 10:16.) Jesu i ti fananisile ni murisi, a valanzeli vakwe a va fananisa ni ntlhambi wa tiyivu. Ehleketa hi mhaka leyi: Loku a tiyivu timbiri ti hi xitsungeni, a tinwani ta timbiri ti hi nkoveni, a yinwani na yi ti gela byanyi ka wutshamu ginwani, u nga wula ku a tiyivu leto i ntlhambi ke? Hi tolovelo a ntlhambi wa tiyivu wu fambafamba zinwe na wu rangelwa hi murisi wa wona. Hi ndlela yo fana, a hi nge zi koti ku lanzela a Murisi wa hina loku hi ti hambanisa ni vanwani. Hi fanele ku tlhangana ni maKristu manwani kasi hiva “ntlhambi munwe” wu rangelwako hi “murisi munwe.”

¹⁰ A xikhati hi nga mitlhanganweni, hi tiyisa a kubohana ka hina ni vamakabye. (Tis. 133:1) A vamakabye vo kari va tsikiwa hi vapswali ni vamakabye vabye va nyama. Hambulezo, Jesu i tsumbisile lezaku i wa ta va nyika ngango wa moya lezaku wu va ranza wu tlhela wu va khatalela. (Mar. 10:29, 30) Loku uta mitlhanganweni hi kukhanzakanya, u tava papai, mamani, kutani makabye wa vanhu lavo! Xana lezo a zi hi kuci ku maha zontlhe hi zi kotako kasi hiva kona mitlhanganweni yontlhe?

11. A kuva kona mitlhanganweni zi hi vunisa kuyini ku nyika Jehova lezi zi mu fanelako?

¹¹ Hi kuva kona mitlhanganweni, hi nyika Jehova lezi zi mu fanelako. Kota Muvangi wa  hina, Jehova wa fanelwa hi ku dumiswa, ni ku bongiwa, ni ku nyikwa wudzunzo. (Gonza Kuvululelwa 7:12.) A xikhati hi khongelako, hi yimbelela, ni ku wulawula hi Jehova mitlhanganweni ya hina, hi mu nyika lezi zi mu fanelako — ku nga ku khozelwa. Ha gi nyika nguvu lisima a lungelo ga ku mu nyika wudzunzo loyi a hi maheleko zilo za talela ga cima.

12. Jehova i ti zwisa kuyini loku hi ingisa a xileletelo xakwe xa kuva kona mitlhanganweni?

¹² Jehova wa fanelwa kambe hi kuva hi mu ingisa. I hi leletela kuva hi nga tsiki ku tlhangana, nguvunguvu xikhatini lexi xa magumo. Loku hi ingisa a xileletelo lexo hi kuziranza, Jehova wa xalala. (1 Joh. 3:22) Jehova wa wona a tlhela a nyika lisima a kutikarata ka hina ka kuva kona mitlhanganweni yontlhe. — Maheb. 6:10.

13, 14. Hi tshinelisa kuyini ka Jehova na Jesu mitlhanganweni ya hina?

¹³ Hi kuva kona mitlhanganweni, hi komba Jehova lezaku hi lava ku tshinela kakwe ni ka N’wana wakwe. A xikhati hi nga mitlhanganweni, a Mugonzisi wa hina wa Hombe i hi nyika wurangeli hi ku tirisa a Mhaka yakwe, a Biblia. (Joba 36:22; Isa. 30:21) Hambu vanhu va nga hiko maKristu lava va tako mitlhanganweni ya hina va nga ha wula lezi: “Hizinene Nungungulu i kona xikari ka nwina.” (1 Kor. 14:23-25) Jehova i katekisa mitlhangano ya hina hi moya wa ku basa a tlhela a hi rangela ka gonziselelo yontlhe leyi hi nyikwako hi Mitsalo. Hi ndlela leyo, a xikhati hi nga mitlhanganweni hizwa gezu ga Jehova hi tlhela hi wona kukhatala kakwe ka liranzo. Kota wuyelo ga kona, hiya hi tshinela nguvu kakwe.

¹⁴ Jesu i te ngalo: “Laha ku tlhangeneko vambiri kutani vanharu vitweni ga mina, kwalaho nzi kona xikari kabye.” (Mat. 18:20) A magezu ya Jesu ma tira ka mitlhangano ya hina. Kota hloko ya bandla, Kristu wa ‘fambafamba xikari’ ka mabandla ya vanhu va Nungungulu. (Kuv. 1:20–2:1) Hi nga zi alakanyela! Hi wumbiri gabye, Jehova na Jesu va hi tiyisa mitlhanganweni ya wuKristu. U alakanya ku Jehova i ti zwisa kuyini a xikhati a wonako lezaku ha xuva nguvu ku tshinela ka yena ni ka N’wana wakwe?

15. A kuvakona ka hina mitlhanganweni zi kombisa kuyini lezaku hi lava ku ingisa Nungungulu?

¹⁵ Hi kuva kona mitlhanganweni, hi komba lezaku ha seketela wuhosi ga Nungungulu. Hambu lezi Jehova a hi leletelako kuta mitlhanganweni, a nga hi kurumeti. (Isa. 43:23) Hikwalaho, zi salela hina a ku komba Jehova lezi hi mu ranzisako zona hi mbilu ya hina ni lezi hi seketelisako zona a wuhosi gakwe. (Rom. 6:17) Hi xikombiso, a mutholi wa hina a nga ha hi kurumeta ku lova mitlhangano hi kota ya ntiro wa ku ti hanyisa. Hi nga ha vukelwa hi mufumo wuku wu ta hi tsalela multa, ku hi valela kutani ku hi mahela zo biha ku hunza lezo loku hi tlhangana kasi ku khozela. Kutani hi nga ha ringwa kuya ka hlakano wo kari wutshanwini ga kuya mitlhanganweni. Ka ziyimo zontlhe lezi, hi fanele ku hlawula lezaku himani hi to mu tirela. (Miti. 5:29) Loku hi hlawula ku seketela wuhosi ga Jehova, hi tsakisa mbilu yakwe. — Mav. 27:11.

16, 17. a) Hi zi tivisa kuyini lezaku a mitlhangano yi wa hi ya lisima ka maKristu ya le zaneni go sangula? b) Makabye George Gangas i wa yi wonisa kuyini a mitlhangano ya wuKristu?

¹⁶ Anzhako ka Pentekosta wa 33 Nguveni ya Hina, a maKristu yo sangula a ma tlhanganangi hi xikhati xo kari ma guma ma zi tsika. Ma lo simama ma “pinyamela kugonziseni ka vapostoli, ni le kutlhanganeni.” (Miti. 2:42) A gezu ga xiGreki gi hunzuluselweko ku ‘kupinyamela’ gi nyika maalakanyo ya ku timisela hi kutikarata ka hombe. A maKristu lawo ma nga hi hasi ka mufumo wa Roma ma tlhela  ma vukelwa hi varangeli va wukhongeli ga xiJuda, zi wa nga ma oloveli kuya mitlhanganweni. Hambulezo, ma lo timisela.

¹⁷ A malanza yo tala ya Jehova nyamutlha ma nyika nguvu lisima a mitlhangano ya wuKristu. George Gangas, loyi a tirileko kota xiro xa Hubye yi Fumako hi xipimo xa 22 wa malembe, i wulile lezi: “Ka mina, a ku tlhangana ni vamakabye xinwe xa zilo zi nzi nyikako litsako la hombe wutomini ni ku nzi tiyisa. Nzi zi ranza nguvu kuva munwe wa lava va rangako va chikela Salawini ya Mufumo, nzi tlhela nziva munwe wa lava va gumesako ku suka, loku zi koteka. Nzizwa litsako la hombe nguvu laha nzi bhulako ni vanhu va Nungungulu. A xikhati nzi nga zinwe navo nzi ti wona na nzi hi kaya ni ngango wa mina, paradiseni ga moya. I engeta aku: “Khwatsi hi lezi a busola yi xungetako nwalungu xontlhe xikhati, minawu xontlhe xikhati nzi xuva kuva kona mitlhanganweni.”

18. U ti zwisa kuyini hi mitlhangano ya hina, niku u ti yimisele ku maha yini?

¹⁸ Xana wenawu wa ti zwisa lezo xungetano hi ku tlhangana kasi ku khozela Jehova? Loku zi hi tano, ti yimisele ku simama u maha zontlhe zi nga ntanwini wa wena kasi kuva kona mitlhanganweni hi kukhanzakanya. Hi ndlela leyo, u ta ngha u fana na Davida loyi a ngaku: “Jehova, nza ranza a wuakelo ga yindlu ya wena.” — Tis. 26:8.