EHLEKETA hi siku go tsakisa nguvu ka wontlhe wutomini ga wena. Hi legi u nga chada hi gona kutani hi legi ku nga pswaliwa n’wana wa wena wa matewula? Kutani hi legi u nga kombisa hi gona kutihendleleta ka wena ka Jehova hi ku bapatizwa hi mati? Lego u nga ha gi wona kota siku ga lisima nguvu ni go tsakisa nguvu ka wontlhe. A makholwa-kulori ma tsakile nguvu hi ku ku wona na u kombisa kubaseni lezaku wa mu ranza Nungungulu hi mbilu yontlhe, ni muhefemulo wontlhe, ni kupima kontlhe, ni ntamu wontlhe!— Mar. 12:30.

Kuzilava cima u bapatizwa uya u engetela ku kuma litsako hi ku tirela Jehova. Hambulezo, a vahuweleli vo kari va Mufumo va luzile a litsako leli va nga hi nalo kusanguleni. Hikuyini? Kona zigelo muni hi nga nazo za kuva hi simama ku tirela Jehova na hi tsakile ke?

A mahungu ya Mufumo — ni xitsumbiso xa wona xa lezaku Jehova i ta fuvisa tiko legi go biha lokuloku a tlhela a neha misava yiswa — handle ko kanakana ma hi nyika xigelo xa ku tsaka. Tlhatakumbiri, Zefania 1:14 wa hi tiyisa aku: “A siku ga hombe ga Jehova gi kusuhani, ga tshinela hi xihatla.” Hambulezo, a ku rinzela xikhati xo leha ku hunza lexi hi nga xi alakanyela zi nga hi hungulela litsako leli hi nga hi nalo kusanguleni zi tlhela zi hi maha hi loloha ntirweni lowu hi mahelako Nungungulu. — Mav. 13:12.

A wuhlengeli gi nene ni vanhu va Nungungulu gi hi nyika ntamu wa ku simama hi tirela Jehova na hi tsakile. Kunene, za koteka ku ngha a mahanyela ma nene ya malanza ya Jehova ma hi wona ma nga hi koka hi nghena wukhozelini ga lisine ma tlhela ma hi vuna ku sangula ku tirela Nungungulu hi kutsaka. (1 Ped. 2:12) Kanilezi ku nga humelela yini loku a muKristu-kulori a kawukiwa hi ku kala a nga ha hanyi hi matshinya ya milayo ya Nungungulu? Ka ziyimo lezo, a vokari va nghenileko lisineni hi ku wona mahanyela ma nene ya vanhu va Jehova va nga ha mbhela ntamu va tlhela va luza litsako labye.

A mahungu ya zilo zi xavisiwako tikweni legi go biha ga Satani wonawu ma nga hi susela litsako. I tirisa tiko gakwe kasi ku hi maha hi kholwa lezaku hi na ni xilaveko xa nchumu waku hi lisine a wu nga ta hi vuna nchumu. Kanilezi hi fanele ku alakanya a magezu ya Jesu yaku: “A ku na munhu a zi kotako ku tirela tihosi timbiri; hilezi i ta venga yinwe, a ranza yinwani, kutani i ta namarela ka yinwe, a kanyisa yinwani. A mu zi koti ku tirela Nungungulu ni Mamona [“Titshomba,” NM].” (Mat. 6:24) A hi nge tireli Jehova na hi tsakile hi  tlhela hi ti karatela ku kuma zontlhe zi nga kona tikweni legi.

A ku tirela Jehova a zi karati ka lava va mu ranzako. (1 Joh. 5:3) Alakanya lezaku Jesu i te: “Tanani ka mina, nwina nwentlhe mu tirako ni ku binzwa, nzi ta mu humuta. Rwalani a pingu wa mina, mu gonza ka mina; hakuva nzi rulile, nzi hi ni mbilu yi koramileko; mu ta kuma kuhumula mihefemulweni ya nwina. Hakuva a pingu wa mina a wu tsanzi, ni nzhwalo wa mina wa hehuka.” (Mat. 11:28-30) A ku rwala pingu wa kuva mupizani wa muKristu za humuta niku zi nyika litsako. Niku handle ko kanakana hi na ni xigelo xa ku tsaka nguvu ntirweni wa Jehova. Zalezi a hi woneni zigelo zinharu za lisima za kuva hi ‘tsakela a Nungungulu wa kuhanyiswa ka hina.’ — Hab. 3:18.

Hi tirela a Munyiki wa wutomi, loyi a nga Nungungulu wo tsaka. (Miti. 17:28; 1 Tim. 1:11, NM) Ha zi zwisisa lezaku loku ku wa nga hi yena Muvangi wa hina, na hi nga hi kona. Hikwalaho, hi simama hi mu tirela na hi tsakile, na ku nga khataliseki a malembe lawa ma hunzako na hi bapatizilwe.

Wona xikombiso xa Héctor, loyi a tireleko Jehova kota muwoneleli a fambafambako hi 40 wa malembe. Wa ha pswala mihanzu “ni lomu wukhosaneni” gakwe. (Tis. 92:12-14) A kubabya ka sati wakwe ka hungula a ntiro lowu a mahelako Nungungulu, kanilezi a ku hunguli litsako lakwe. I ngalo: “Hambu lezi zi bayisako a ku wona lihanyo la sati wa mina na li mbhela hi kutsongwani-kutsongwani ni lezi zi karatako ku mu khatalela, a nzi zi tsiki zi nzi yivela litsako ntirweni wa Nungungulu wa lisine. A ku tiva lezaku a kuhanya ka mina kuta hi ka Jehova, loyi a vangileko vanhu na a hi ni kungo, xigelo xo zwala xa kuva nzi mu ranza nguvu nzi tlhela nzi mu tirela hi mbilu yontlhe. Nzi ti karatela ku hiseka ntirweni wa kuxumayela, niku nzi ti karatela ku rangisa a kutsumba ka Mufumo maalakanyweni ya mina kasi nzi nga mbheli litsako.”

Jehova i longisele nzhiho, a hi vululela ndlela ya ku hanya wutomi go tsakisa. A Biblia gi ngalo: “Nungungulu i lo ranza tiko kota lezi, a kala a nyikela a N’wana wakwe a belekilweko yece, kasi ni wihi loyi a kholwako kakwe a nga lovi, kanilezi ave ni wutomi ga pinzukelwa.” (Joh. 3:16) Kunene, ha zi kota ku tsetselelwa zionho ni ku kuma wutomi ga pinzukelwa hi ku kholwa ka lulamiselo ga Nungungulu ga liranzo ga ku hi nyika a muphahlo wu tirulako wa Jesu. Lexo xigelo xo zwala xa kuva hi wu bonga nguvu a nzhiho! Makunu, xana a kubonga loko a ku hi kuci ku tirela Jehova na hi tsakile ke?

A makabye wo kari a vitwako Jesús le México i ngalo: “Nzi wa hi khumbi ya ntiro wa mina, laha a zikhati zinwani nzi nga tira tihora to tala nguvu  hi siku hambu lezi zi nga kala zi nga kurumeti kuva nzi maha lezo. Nzi wa maha lezo hi ku lava ku engetelwa mali. Nzi lo gumesa nzi tiva Jehova ni lezi a nga nyikelisa zona N’wana wakwe kasi ku vuna vanhu. Nzi lo xuva nguvu ku mu tirela. Hikwalaho, nzi lo hendleleta wutomi ga mina ka Jehova, niku anzhako ka 28 wa malembe na nzi tirela koponi leyi nzi nga hi ka yona, nzi lo boha ku yi tsika nzi nghenela ntiro wa xikhati xontlhe.” Lawo mave masangulo ya malembe ya ku tirela Jehova hi kutsaka.

A mihanzu leyi hi pswalako yi neha litsako, a yi vangi kubayisa. Wa alakanya lezi a wutomi ga wena gi nga tshamisile zona na u nga se tiva Jehova? Mupostoli Paule i alakanyisile maKristu ya le Roma lezaku a kale ma wa “hi malanza ya kuonha” kanilezi makunu ma wa “mahile malanza ya kululama.” Ma wa kari ma pswala mihanzu ya “kubasiswa,” leyi yi yisako ka “wutomi ga pinzukelwa.” (Rom. 6:17-22) Hinawu hi hanya wutomi gi basileko; a hi kumani ni kubayisa loku ku vangiwako hi mahanyela ma nga hlazekangiko ni ya tihanyi. Lexo xigelo xa ku tsaka hakunene!

Wona xikombiso xa Jaime, loyi a nga ranza kulwa bhoksi. I wa nga kholwi ka Nungungulu, kanilezi i wa kholwa evolusawu. Jaime i lo sangula kuya mitlhanganweni, laha a nga hlamaliswa hi liranzo leli va mu kombisileko. Kasi ku tsika mahanyela yakwe ya kale, Jaime i lo kombela Jehova lezaku a mu vuna ku kholwa ka Yena. I ngalo: “Hi kutsongwani-kutsongwani, nzi lo pola lezaku i kona Dadani wa liranzo, loyi a nga Nungungulu wa wuxinji. A ku hanya hi matshinya ya milayo yo lulama ya Nungungulu za nzi vikela. Loku nzi wa nga cicangi, na nzi delwe, a ku fana ni vanghana va mina lava hi ngalwa zinwe bhoksi. A malembe yo tsakisa nguvu ka wontlhe wutomini ga mina hi lawa nzi ma mbhetako na nzi tirela Jehova.”

U alakanya ku hi fanele ku ti zwisa kuyini a xikhati lexi hi rinzelako a kugumesa ka tiko legi go biha? Alakanya lezaku hi ‘byalela moya’ niku hi ta “tshovela a wutomi ga pinzukelwa.” Hikwalaho, “hi nga karali a ku maha lezi zi nene; hakuva loku hi nga rereki hi ta tshovela hi xikhati xi faneleko.” (Gal. 6:8, 9) Hi ku vuniwa hi Jehova, ngha hi timisela, hi ti karatela ku hlakulela matshamela ma nene lawa ma lavekako kasi ku hanyiswa “kuxanisekeni ka hombe,” ni ku simama hi tirela Jehova na hi tsakile, hambu loku hi kumana ni minzhingo. — Kuv. 7:9, 13, 14; Jak. 1:2-4.

Hi nga tiyiseka lezaku loku hi timisela hi tava ni nchachazelo, hakuva Nungungulu wa wu tiva khwatsi a ntiro wa hina ni liranzo la hina hi yena ni vito gakwe. Loku hi simama ku tirela Jehova na hi tsakile, hi ta fana ni muyimbeleli wa tisimu Davida, loyi a ngaku: “Nzi na na Jehova mahlweni ka mina xontlhe xikhati; cima nzi nga ta tsekatsekiswa hakuva i le reveni ga mina ga xinene. Hikwalaho a mbilu ya mina ya tsaka, ni muhefemulo wa mina wa nengela; ni wona miri wa mina wu ta tshama hi kurula.” — Tis. 16:8, 9.