Hi xikombiso, a makabye wo kari i felwe hi n’wana wakwe a nga ti sunga. Lezo zi mu vangele kubayisa ka hombe. I sangulile ku ti wutisa ku Jehova i wa no cuwuka za manziko a wona ku yena ni sati wakwe va ta zi kota ku timisela khombo lego ke. A kutala ka hina ha kumana ni makhombo tikweni legi. Makunu, xana hi fanele ku kholwa lezaku Jehova wa wonelela zilo zontlhe zi mahekako wutomi ga hina ke?

Loku hi hlola 1 Va Le Korinte 10:13, hi ta wona lezaku a Biblia a gi seketeli a maalakanyo lawo yaku Jehova wa zi tiva na ka ha hi mahlweni lezi hi nga zi kotako ku zi timisela a gumesa a hlawula minzhingo hi to kumana nayo. Hikuyini hi nga wulako lezo? A hi woneni mune wa zigelo.

Xo ranga, Jehova i nyikile vanhu vontlhe a kutlhatlheka ka ku hlawula kutani ku ti mahela ziboho. I lava lezaku hi ti mahela ziboho hi hoce. (Deuteronome 30:19, 20; Joxua 24:15) Loku hi hlawula ku maha ziboho zi tsakisako Jehova, ha tsumba lezaku i ta hi rangela. (Mavingu 16:9) Kanilezi, loku hi maha ziboho za hava, hi ta tshovela mihanzu ya kona. (Va Le Galatia 6:7) Makunu, loku Jehova i wo hlawula a minzhingo leyi hi kumanako nayo, xana hi wa tava hi tlhatlhekile ku hlawula hakunene?

Xa wumbiri, Jehova a nga hi vikeli ka zilo zo ‘dzuka zi humelela.’ (Mutshawuteli 9:11) A munhu a nga ha humelelwa hi mhango ya hombe hi kuva a hi ka wutshamu ga hava hi xikhati xa hava. Jesu i wulawulile hi mhango yi nga daya 18 wa vanhu va nga welwa hi likhokhola. I dlunyatisile lezaku Nungungulu a hi yena a nga maha ku a vanhu lavo vafa. (Luka 13:1-5) Hikwalaho, a zi zwisiseki ku Nungungulu wa ranga a boha lezaku himani a to pona kutani kufa loku ku humelela mhango.

Xa wunharu, a munwe ni munwani wa hina i fanele ku lwela ku simama a tsumbekile ka Jehova. Satani i wulile lezaku a malanza ya Jehova ma mu tirela hi kota ya lezi Yena a ma nyikako. I tlhelile aku loku ho kumana ni minzhingo, hi nga ta simama hi tsumbeka ka Jehova. (Joba 1:9-11; 2:4; Kuvululelwa 12:10) Loku Jehova i wo hi vikela ka minzhingo yo kari, zi wa ta ku khwatsi lezi Satani a wulako lisine.

Xa wumune, Jehova a nga hlawuli ku zi tiva na ka ha hi mahlweni zontlhe lezi zi mahekako. Lisine ku loku a zi lava, Jehova wa zi kota ku tiva zilo zi to humelela ka xikhati xa ha tako. (Isaya 46:10) Kanilezi a Biblia gi komba ku a nga hlawuli ku ranga a tiva zilo zontlhe na ka ha hi mahlweni. (Genesisi 18:20, 21; 22:12) Jehova i na ni liranzo niku i lulamile, hikwalaho a nga hi valeli ku tirisa kutlhatlheka ka hina kasi ku ti mahela ziboho. — Deuteronome 32:4; 2 Va Le Korinte 3:17.

Makunu Paule i wa lava ku wula yini a xikhati a ngaku Jehova “a nga ta vumela a kuva mu ringwa ku hunza a ntamu wa nwina”? Paule i wo tlhamusela lezi Jehova a mahako a xikhati hi lwako ni minzhingo; a hi lezi a mahako na ya hata. Loku hi tsumba Jehova, i ta hi vuna ni ka wihi nzhingo hi kumanako nawo wutomini ga hina. (Tisimu 55:22) Zalezi hi ta wona zigelo zimbiri zi nga maha Paule a wula lezo.

A xigelo xo sangula hi lezaku a minzhingo leyi hi kumanako nayo hi leyi ‘munhu a yi kotako ku rwala’ kutani yi humelelako vanhu vontlhe. Loku ha ha hanya tikweni legi ga Satani, hontlheni hi ta kumana ni ziyimo zo nonoha, kuzilava hambu  makhombo. Kanilezi loku hi tsumba Jehova, hi nga timisela minzhingo leyo hi tlhela hi simama na hi tsumbekile. (1 Pedro 5:8, 9) Kusanguleni ka 1 Va Le Korinte xipimo 10, Paule i wulawulile hi ziringo zo kari lezi a vaIsraeli va kumeneko nazo le xiwuleni. (1 Va Le Korinte 10:6-11) Lava va nga tsumba Jehova va zi kotile ku timisela minzhingo leyo. Kanilezi a vaIsraeli vo kari va tsikile ku ingisa Jehova. A va simamangi va tsumbekile ka yena hakuva a va khomelelangi ka yena.

A xigelo xa wumbiri hi lezaku “Nungungulu i tsumbekile.” Zi wula yini lezo? Loku hi cuwuka lezi Jehova a khatalelisako zona malanza yakwe matinwini wontlhe, ha zi wona lezaku wa kombisa kutsumbeka, a vuna “lava va mu ranzako, ni . . . lava va hlayisako milayo yakwe.” (Deuteronome 7:9) Hi gonza lezaku Jehova xontlhe xikhati wa maha lezi a tsumbisako. (Joxua 23:14) Hi nga tiyiseka lezaku 1) Jehova a nga ta tsika nzhingo wu binza nguvu laha ka kuza hi tsanzeka ku wu timisela, niku 2) i ta hi “mahela a ndlela ya kupona.”

Jehova i va “mahela a ndlela ya kupona” lava va mu tsumbako hi ndlela muni? Lisine ku wa zi kota ku susa nzhingo. Kanilezi alakanya lezaku Paule i te Jehova “i ta mu mahela a ndlela ya kupona loku wuta nzhingo, kasi mu ta zi kota ku wu rwala.” Hikwalaho, a kutala ka zikhati Jehova o hi mahela ndlela ya kupona hi ku hi tiyisa kasi hi zi kota ku simama hi tsumbekile. A hi woneni tindlela to kari a mahako hi tona lezo.

• Jehova wa hi ‘chavelela kuxanisekeni ka hina kontlhe.’ (2 Va Le Korinte 1:3, 4) Wa rulisa maalakanyo ya hina ni mbilu hi ku tirisa a Biblia, ni moya wa ku basa, ni nanza gi tsumbekileko. — Mateu 24:45; Johani 14:16; Va Le Roma 15:4.

• Jehova a nga hi rangela hi ku tirisa a moya wakwe wa ku basa. (Johani 14:26) A moya wa ku basa wu nga hi vuna ku alakanya matimu ya lomu ka Biblia ni matshinya ya milayo ma nga hi vunako ku maha ziboho za zi nene.

• Jehova a nga hi vuna hi ku tirisa tingelosi takwe. — Maheberu 1:14.

• Jehova a nga hi vuna hi ku tirisa vamakabye va hina. Vona va nga hi tiyisa hi magezu ni mitiro yabye. — Va Le Kolosi 4:11.

Makunu, hi gonza yini ka magezu ya Paule ma nga ka 1 Va Le Korinte 10:13? Jehova a nga hlawuli a ziringo lezi hi faneleko ku kumana nazo. Kanilezi hi nga tiyiseka lezaku loku hi tsumba Jehova, hi ta zi kota ku timisela ni wihi nzhingo. Ha zi tiva lezaku xontlhe xikhati Jehova i ta hi mahela ndlela ya ku pona kasi hi zi kota ku simama hi tsumbekile kakwe.