1. Zilo muni za zi nene lezi a nzhiho wu hi vululelako ndlela ya ku zi kuma?

A MUPHAHLO wa Jesu Kristu wu vululile ndlela ya ku hi kuma makatekwa yo tala. Hi xikombiso, a nzhiho wu vululile ndlela ya ku a vana va Adamu va ranzako kululama va tlhela va maha xipanze xa ngango wa Nungungulu. A makatekwa manwani hi to ma kuma ku hanya na hi tsakile kala kupinzuka. A ku hunza lezo, a nzhiho wu na ni kuyelana ni zilo zi nga za lisima nguvu ka vontlhe le tilweni ni laha misaveni. — Maheberu 1:8, 9.

2. a) Zilo muni za lisima nguvu le tilweni ni laha misaveni lezi Jesu a nga zi patsa ka mukhongelo wakwe? (Wona mufota laha hehla.) b) Zini hi to wulawula hi zona ka nzima leyi?

² Na ku kiyela xipimo xa malembe mambiri kasi a dawa, Jesu i gonzisile vapizani vakwe ku khongela vaku: “Dadani wa hina wa le tilweni, a vito ga wena a gi hlawuliwe [“basiswe,” Tradução do Novo Mundo]. A wute Mufumo wa wena. Kuranza ka wena a ku mahiwe misaveni, kota lezi ku mahiwako le tilweni.” (Mateu 6:9, 10) A hi woneni lezi a nzhiho wu yelanisako zona ni kubasiswa ka vito ga Jehova, kufuma ka Mufumo wa Nungungulu, ni kumahiwa ka kuranza kakwe.

3. a) A vito ga Jehova gi yimela yini? b) Satani i vukelisile kuyini a vito ga Jehova?

³ A xo ranga ka zontlhe, Jesu i khongelele lezaku a vito ga Jehova gi basiswa, kutani ku woniwa kota go basa. A vito ga Jehova gi yimela lezi yena a nga zona. Hi yena a Munhu wa ntamu ni wo lulama ku hunza vontlhe va nga kona. Jesu i tlhelile a mu wula lezaku hi yena “Dadani wa ku Basa.” (Johani 17:11) Kota lezi Jehova a basileko, zontlhe lezi a mahako ni milayo yontlhe leyi a yi yimisako zi basile. Kanilezi le Edeni, Satani i tirisile mano kasi ku vuxa ziwutiso xungetano hi fanelo ya Nungungulu ya ku vekela milayo vanhu. I wulawulile mawunwa xungetano hi Jehova a tlhela a vukela a vito ga Nungungulu kutani kuhlazeka ka gona. — Genesisi 3:1-5.

4. Jesu i basisile vito ga Nungungulu hi ndlela muni?

⁴ Kanilezi Jesu i wa ranza vito ga Jehova niku i mahile zontlhe a nga zi kota kasi ku gi basisa. (Johani 17:25, 26) Hi ndlela muni? Hi mahanyela yakwe ni tigonzo takwe, Jesu i vunile vanwani ku wona lezaku a milayo ya Jehova yi lulamile niku zontlhe lezi a hi kombelako ku maha i mahela ku hi vuna. (Gonza Tisimu 40:8-10.) Hambu xikhati lexi Satani a nga mu maha a xanisiwa a tlhela a dawa hi ndlela yo bayisa nguvu, Jesu i simamile a tsumbekile. I kombile lezaku a munhu wo mbhelela a nga zi kota ku ingisa Jehova ka zontlhe.

5. Hi nga gi basisisa kuyini a vito ga Jehova?

⁵ Hi nga kombisa kuyini lezaku ha gi ranza a vito ga Jehova? Hi nga kombisa hi mahanyela ya hina. Jehova i lava lezaku hi basa. (Gonza 1 Pedro 1:15, 16.) Lezo zi wula kuva hi khozela yena yece hi tlhela hi mu ingisa hi mbilu yontlhe. Hambu loku hi xanisiwa, hi maha zontlhe hi zi kotako kasi ku hanya hi ndlela leyi Jehova a hi gonzisako. Hi ku hanya hi milayo ya Jehova, hi neha wudzunzo ka vito gakwe. (Mateu 5:14-16) Hi komba lezaku a milayo yakwe yi nene niku Satani muhembi. A hi mbhelelangi, hikwalaho hi ta maha zihoxo. Kanilezi loku hi hoxisa, ha ti sola hi tlhela hi ti karatela ku tsika ku maha zilo lezo zi chakisako vito ga Jehova. — Tisimu 79:9.

6. Hikuyini Jehova a zi kotako ku hi hlayela kululama, hambu lezi hi kalako hi nga mbhelelangi?

⁶ Kani hi vatotilweko kani hi va “tiyivu tinwani,” Jehova wa tsetselela zionho za hina loku hi kholwa ka nzhiho. Lava va ti hendleletako kakwe, Jehova wa va amukela kota vakhozeli vakwe. A maKristu ma totilweko i ma hlayela kululama kota vana vakwe, niku lava va “tiyivu tinwani” i va hlayela kululama kota vanghana vakwe. (Johani 10:16; Va Le Roma 5:1, 2; Jakobe 2:21-25) Hikwalaho, hambu zezi a nzhiho wu vulula ndlela ya ku hiva ni wunghana gi nene ni Papai wa hina hi tlhela hi basisa vito gakwe.

7. Makatekwa muni ma kotekako hi kota ya nzhiho?

⁷ Ka mukhongelo wa xikombiso, Jesu i te: “A wute Mufumo wa wena.” A nzhiho wu yelanisa kuyini ni Mufumo wa Nungungulu? A Mufumo wa Nungungulu wu wumbiwa hi Jesu ni lava va 144 000 va hlawulilweko xikari ka vanhu. A nzhiho wu maha lezaku zi koteka ku a vanhu lavo va vuxiwa vaya tilweni. (Kuvululelwa 5:9, 10; 14:1) Va tava tihosi ni vapristi niku va ta fumela misava hi 1 000 wa malembe na va hi zinwe na Jesu. Nzeni ka xikhati lexo, Jehova i ta tirisa a Mufumo  lowo kasi ku maha misava yiva paradise a tlhela a vuna vanhu lezaku va mbhelela. Hi magumo, a malanza ya Jehova ya le tilweni ni ya laha misaveni ma tava ngango wunwe. (Kuvululelwa 5:13; 20:6) Jesu i ta lovisa Satani a tlhela a fuvisa zikarato zontlhe lezi a zi vangileko. — Genesisi 3:15.

8. a) Jesu i vunisile kuyini vapizani vakwe ku zwisisa lezaku a Mufumo wa Nungungulu wa lisima? b) Hi seketelisa kuyini a Mufumo nyamutlha?

⁸ Jesu i vunile vapizani vakwe ku zwisisa a lisima la Mufumo wa Nungungulu. Hi ndlela muni? Neti a nga bapatizwa, Jesu i sangulile ku xumayela “a ivangeli ya mufumo wa Nungungulu” ni kwihi a ngaya. (Luka 4:43) I tlhelile a byela vapizani vakwe lezaku va maha vakustumunyu vakwe “kala le magemeta-musi ya misava.” (Mitiro 1:6-8) Inyamutlha a ntiro wa ku xumayela a Mufumo wu nyika vanhu a lungelo ga ku gonza xungetano hi nzhiho va tlhela va maha malanza ya Mufumo wa Nungungulu. Hi komba lezaku hi malanza yo tsumbeka ya Mufumo hi ku vuna vatotilweko a ku xumayela mahungu yo saseka misaveni yontlhe. — Mateu 24:14; 25:40.

9. Hikuyini hi nga tiyisekako lezaku Jehova i ta tatisa kungo gakwe xungetano hi vanhu?

⁹ Jesu i wa lava ku wula yini a xikhati a ngaku: “Kuranza ka wena a ku mahiwe”? Loku Jehova aku a nchumu wo kari wu ta maheka, wu ta maheka futsi. (Isaya 55:11) A kuvukela ka Satani ku wa nga ta mu valela Jehova a ku maha lezi a zi lavako. Hi kwihi a kuranza ka Jehova xungetano hi misava? I wa lava lezaku a misava yi tala hi vana vo mbhelela va Adamu na Eva. (Genesisi 1:28) Loku Adamu na Eva va wa nofa na va nga hi na n’wana, a kungo ga Nungungulu ga ku tata misava hi vana vabye na gi nga tatisekangi. Hikwalaho, Jehova i va tsikile va pswala vana. A nzhiho wu nyika vontlhe va kholwako a lungelo ga kuva vanhu vo mbhelela va tlhela va hanya kala kupinzuka. Jehova wa hi ranza niku i lava lezaku hi kuma wutomi go tsakisa legi a nga lava lezaku hiva nago a xikhati a nga hi maha.

10. A nzhiho wu va vunisa kuyini lava va ngafa?

¹⁰ Ahati a vanhu va tibiliyoni lava va ngafa na va nga kumangi lungelo ga ku tiva Jehova? Jehova i lava lezaku a vanhu va hanya. Hikwalaho i ta tlhela a vuxa lava va fileko. A nzhiho wu maha lezaku zi koteka ku va tlhela va hanya. Ka xikhati lexo, va ta gonza xungetano hi Jehova va tlhela va hanya kala kupinzuka. (Mitiro 24:15) Jehova hi yena a Xibuka xa wutomi. A xikhati a to va tlhelisela wutomi lava va fileko, i tava Papai wabye. (Tisimu 36:9) Ka mukhongelo wa xikombiso, Jesu i wulile lezaku Jehova i “Dadani wa hina wa le tilweni.” (Mateu 6:9) Jehova i mu nyikile xipanze xa lisima nguvu Jesu mhakeni leyi ya ku vuxa vafileko. Jesu i te: “Mina nzi kuvuka ni wutomi.” — Johani 6:40, 44; 11:25.

11. Hi kwihi a kuranza ka Nungungulu xungetano hi “xidlemo xa tsanza-vahlayi”?

¹¹ Jesu i tlhelile aku: “Loyi a mahako a kuranza ka Nungungulu, yaloye i nakulori, ni makweru, ni mamani wa mina.” (Marku 3:35) A kuranza ka Nungungulu hi lezaku a vanhu va wontlhe matiko ni tixaka ni tirimi va maha vakhozeli vakwe. Va wuliwa lezaku “xidlemo xa tsanza-vahlayi.” A vanhu lavo va kholwa ka nzhiho niku va lava ku ingisa Nungungulu. Va mu dumisa vaku: “A kuhanyisa ku lumba Nungungulu wa hina loyi a  tshamileko xitshanwini xa wuhosi ni Yivana.” — Kuvululelwa 7:9, 10.

12. A mukhongelo wa Jesu wu hi gonzisa yini xungetano hi kungo ga Jehova hi vanhu?

¹² Ka mukhongelo wa Jesu wa xikombiso, hi gonzile zotala xungetano hi Jehova ni kungo gakwe hi vanhu. Xo ranga, hi fanele ku maha zontlhe hi zi kotako kasi ku basisa a vito ga Jehova ni ku mu nyika wudzunzo. (Isaya 8:13) A muphahlo wa Jesu, lowu wu hi vululelako ndlela yo kuma kuhanyiswa, wonawu wa dumisa vito ga Nungungulu. Hi lisine, gona ha goce, a vito ga Jesu gi wula ku “Jehova Kuhanyisa.” Xa wumbiri, Jehova i ta tirisa Mufumo wakwe kasi ku neha a makatekwa wontlhe ya nzhiho ka vanhu va ingisako. Xa wunharu, ha tsumba lezaku a xi kona xi zi kotako ku valela a kuranza ka Jehova lezaku ku nga maheki. — Tisimu 135:6; Isaya 46:9, 10.

13. Hikuyini hi bapatizwako?

¹³ A yinwe ya tindlela ta lisima ta ku komba ku ha wu bonga a nzhiho ku hendleleta wutomi ga hina ka Jehova hi tlhela hi bapatizwa. Hi ku maha lezo, hi komba lezaku ha kholwa ka nzhiho niku “hi va ka” Jehova. (Va Le Roma 14:8) A xikhati hi bapatizwako, hi kombela Jehova lezaku a hi nyika “livalo li nene.” (1 Pedro 3:21) Jehova i hlamula hi ku tirisa a mabhinzu ya nzhiho laha ka hina. Niku ha tiyiseka lezaku i ta hi nyika zontlhe lezi a tsumbisileko. — Va Le Roma 8:32.

14. Hikuyini Jehova a hi layako lezaku hi ranza vanwani?

¹⁴ Zontlhe lezi Jehova a mahako i zi maha hi liranzo. I lava lezaku a vakhozeli vakwe va mu pimanyisa va tlhela va ranzana. (1 Johani 4:8-11) Loku hi ranza vanhu, hi komba lezaku hi lava kuva “vana va Raru wa [hina] loyi a nga le tilweni.” (Mateu 5:43-48) A nayo wo sangula wa hombe ka yontlhe ku ranza Jehova; a wa wumbiri ku ranza vanwani. (Mateu 22:37-40) A yinwe ya tindlela ta ku komba lezaku ha va ranza vanhu ku va gonzisa a mahungu yo saseka ya Mufumo wa Nungungulu. Loku hi ingisa a nayo wa Jehova wa kuva hi ranza vanwani, nguvunguvu a vamakabye va hina, a liranzo la hina hi yena li ta ‘mbheleliswa.’ — 1 Johani 4:12, 20.

15. a) Makatekwa muni lawa Jehova a hi nyikako zezi? b) Makatekwa muni hi to ma kuma xikhatini xi tako?

¹⁵ Kota lezi hi kholwako ka nzhiho, Jehova wa hi tiyisa lezaku a zionho za hina za “vinyetelwa.” Wa hi tsetselela hi kumbhelela. (Gonza Mitiro 3:19-21.) Kota lezi hi sinako hi wulawulile hi zona, a nzhiho wu vulula ndlela ya ku Jehova a amukela vanhu vo kari kota vana vakwe le tilweni. A vanhu lavo hi vatotilweko. (Va Le Roma 8:15-17) I ramba lava va “tiyivu tinwani” lezaku va nghena ngangweni wakwe laha misaveni. Anzhako ka loku va kumile kumbhelela, ku tava ni kuringwa ko gumesa. Loku va simama ku tsumbeka ka Jehova, i ta va amukelawo kota vana vakwe. (Va Le Roma 8:20, 21; Kuvululelwa 20:7-9) Xontlhe xikhati, Jehova i ta ranza vana vakwe vontlhe. A nzhiho wu ta simama ku hi nehela makatekwa kala kupinzuka. (Maheberu 9:12) Jehova i hi nyikile xinyikiwo lexi xo saseka nguvu, niku a nga kona a zi kotako ku hi wutlela.

16. A nzhiho wu hi tlhatlhisisa kuyini?

¹⁶ Loku hi ti sola ka zionho za hina, a ku na nchumu lowu Satani a nga wu mahako wu to hi valela ku nghena ngangweni wa Jehova. Jesu i file “kanwe” basi. A nzhiho wu hakhelwe za kala kupinzuka. (Maheberu 9:24-26) Adamu i hi nehele kufa, kanilezi a muphahlo wa Jesu wu hi nehela wutomi ga pinzukelwa. A nzhiho wu nga hi tlhatlhisa ka tiko ga Satani wu tlhela wu hi tlhatlhisa ka kufa. — Maheberu 2:14, 15.

17. A liranzo la Nungungulu li ku khumbisa kuyini?

¹⁷ A zitsumbiso zontlhe za Nungungulu zi ta tatiseka. A ku fana ni milayo leyi a yi vekileko ka zivangwa zakwe yi kalako yi nga cici, Jehova a nga ta tshuka a cica. A nga ta tshuka a hi wisa tingana. (Malaki 3:6) Jehova a nga hi nyiki a wutomi basi. I hi nyika liranzo lakwe kambe. “Hina ha li tiva, hi kholilwe ka liranzo leli Nungungulu a hi ranzileko ha lona. Nungungulu liranzo.” (1 Johani 4:16) A zitsumbiso zakwe za tatiseka xontlhe xikhati. Zezanyana a misava yi ta maha paradise go saseka. Vontlhe lava va to hanya ka xikhati lexo va ta pimanyisa Jehova va tlhela va ranzana. A zivangwa zontlhe za le tilweni ni za laha misaveni zi taku: “A kukhesa, ni wudzunzo, ni wutlhari, ni kubonga, ni wudumo, ni wuhosi, ni ntamu, a zive ka Nungungulu wa hina kala kupinzuka ni kupinzuka. Amen.” — Kuvululelwa 7:12.