1, 2. a) Zini lezi Jehova a wulileko lezaku zi wa ta maheka masikwini ya hina? b) Ziwutiso muni lezi zi to hlamuliwa ka nzima leyi? (Wona mufota laha hehla.)

NA A wulawula hi xikhati lexi hi hanyako ka xona, Jehova i profetile aku: “Masikwini lawo khume ga vavanuna va tirimi ti tsalangeneko ta matiko, va ta khomelela nzhungweni wa nguwo wa muJuda, vaku: Hi ta famba na nwina, hakuva hi zwile lezaku Nungungulu i na nwina.” (Zak. 8:23) A ku fana ni vavanuna lavo va khume vo fananisa, lava va nga ni kutsumba ko hanya laha misaveni va “khomelela nzhungweni wa nguwo wa muJuda.” Va tizwa matshanza hi ku tirisana ni “vaIsraeli va Nungungulu” lava va totilweko hi moya, na va zi tiva lezaku Jehova wa katekisa vatotilweko vakwe. — Gal. 6:16.

² A ku fana na muprofeti Zakaria, Jesu i khanyisile a wumunwe go tangalisa legi a vanhu va Nungungulu va nga nago. I wulawulile hi valanzeli vakwe kota mitlawa yimbiri, “ntlhambi wu tsongwani” ni “tiyivu tinwani,” kanilezi i wulile lezaku va wa tava “ntlhambi munwe” wu nga ni “murisi munwe.” (Luka 12:32; Joh. 10:16) Hambulezo, a kuyelana ka mitlawa leyi ya yimbiri ku vuxa ziwutiso: 1) Xana lava va tiyivu tinwani va na ni xilaveko xa ku tiva mavito ya vontlhe lava va totiwako nyamutlha? 2) A maKristu ma totilweko ma fanele ku ti wonisa kuyini? 3) U fanele ku maha yini loku a wokari lomu bandleni ga wena a sangula  kuga xibaba ni kunwa vinya Xialakanyisweni? 4) Xana u fanele ku karateka loku u wona kuengeteleka ka ntsengo wa vanhu va gako xibaba ni kunwa vinya ke? A hi kambisiseni a hlamulo wa xinwe ni xinwani xa ziwutiso lezi.

3. Hikuyini zi kalako zi nga koteki ku tiyiseka lezaku himani a to maha xipanze xa lava va 144.000?

³ Xana lava va tiyivu tinwani va na ni xilaveko xa ku tiva mavito ya vontlhe lava va totiwako nyamutlha? A hlamulo wo kongoma ku ahihi. Hikuyini? Hakuva hambu loku a munhu a amukela a kuvitanwa ka le tilweni, lexo xirambo ntsena, a hi xitiyisekiso xo gumesa xa lezaku i ta wu kuma a nchachazelo. Hi xigelo lexo, Satani i vuxa “vaprofeti va mawunwa . . . kasi ku pengisa ni vahlawulilweko loku zi koteka.” (Mat. 24:24) A ku na munhu a zi kotako ku tiva lezaku a muKristu wo kari a totilweko i ta amukela kutani a nga ta amukela a nchachazelo wakwe wa le tilweni; kala loku Jehova a lamula munhu loye, a mu wona lezaku wa ringanelwa hi wona. Jehova hi yena a to boha a tlhela a mu nyika a xifungo xo gumesa xikhatanyana mahlweni ka kufa kakwe na a tsumbekile kutani mahlweni ka ‘kuxaniseka ka hombe.’ (Kuv. 2:10; 7:3, 14) Hikwalaho, ni wihi munhu a hanyako misaveni inyamutlha a ngo ti mbhetela sikira hi ku funya loku o zama ku tiyiseka lezaku himani xikari ka vanhu va Nungungulu loyi hi magumo a to maha xipanze xa lava va 144.000. ^[1]

4. Loku zi nga koteki ku tiva a mavito ya vatotilweko vontlhe va hanyako misaveni nyamutlha, hi nga ‘fambisa’ kuyini navo?

⁴ Loku zi nga koteki ku ma tiva hi kutiya a mavito ya vontlhe vaIsraeli va moya lava va hanyako misaveni nyamutlha, lava va tiyivu tinwani va ta zi kotisa kuyini ku “famba” navo? Wona lezi a xiprofeto xa Zakaria xi zi wulako xungetano hi khume ga vavanuna vo fananisa. A vavanuna lavo va wa ta “khomelela nzhungweni wa nguwo wa muJuda, vaku: Hi ta famba na nwina, hakuva hi zwile lezaku Nungungulu i na nwina.” Hambu lezi a Biblia gi kumbukako muJuda munwe, hi lisine a gi wuli munhu munwe hakuva a vavanuna lavo ve “hi ta famba na nwina.” Hikwalaho, a muJuda loye i yimela vanhu vo tala! Hi xigelo lexo, a ku na xilaveko xa ku tiva a muJuda munwe ni munwani wa moya kasi ku famba naye. Kanilezi hi fanele ku tiva a vanhu lavo kota ntlawa, hi tlhela hi va seketela na va tshamisile zalezo. A ku na wutshamu ni ginwe laha a Mitsalo yi kucako ku lanzela munhu wa nyama. A Murangeli wa hina hi Jesu. — Mat. 23:10.

5. Xitlharihiso muni lexi a vatotilweko va faneleko ku ehleketa khwatsi hi xona, niku hikuyini?

⁵ Lava va gako xibaba ni kunwa vinya Xialakanyisweni va fanele ku ehleketa khwatsi hi xitlharihiso lexi xi nga ka 1 Va Le Korinte 11:27-29. (Gonza.) Paule i lava ku wula yini ka magezu lawo? A muKristu a totilweko a ngaga ni kunwa hi kungafaneliko loku a nga hlayisi kuzwanana ku nene na Jehova. (Maheb. 6:4-6; 10:26-29) A xitlharihiso lexo xi alakanyisa maKristu ma totilweko lezaku a ma se wu kuma a nchachazelo. Ma fanele ku simama ma ti tsitsirita ‘kala ma ya kuma a nchachazelo wa kuvitanwa ku tlakukileko loku ma nga vitanelwa kona hi Nungungulu ka Kristu Jesu.’ — Fil. 3:13-16.

6. A maKristu ma totilweko ma fanele ku ti wonisa kuyini?

⁶ Paule i pimiselwe ku khongotela maKristu ma totilweko lezaku mava “ni mafambela lawa ma faneleko a kuvitanwa loku [ma] nga vitanwa ha kona.” Va ta zi mahisa kuyini lezo? Paule i loya mahlweni aku: “Muva ni kutikoramisa kontlhe, ni lihlaza-mbilu,  mu timiselana hi liranzo, mu pinyamela a ku hlayisa a wunwe ga moya hi xiboho xa kurula.” (Efe. 4:1-3) A moya wa Jehova wu vuvumisa kutikoramisa, a wu vuvumisi matshanza. (Kol. 3:12) Hi kutikoramisa, a vatotilweko va zi tiva lezaku a va amukeli moya wo tala wa ku basa ku hunza lava va nga ni kutsumba ka ku hanya laha misaveni. A va ti wuli lezaku va na ni wutivi kutani kuvululelwa ko hlawuleka; niku a va zami kambe ku ti maha ku khwatsi va hunza vanghana hi ndlela yo kari. Va wa nga ta tshuka kambe va byela vanwani lezaku vonawu va totilwe niku va fanele ku sangula kuga xibaba ni kunwa vinya; va wa ta ti koramisa va vumela lezaku loyi a vitanako vatotilweko hi Jehova.

7, 8. Zini lezi a vatotilweko va nga faneliko ku zi rinzela, niku hikuyini?

⁷ Hambu lezi a ku kuma xirambo xa le tilweni gi nga lungelo ga hombe, a maKristu ma totilweko a ma rinzeli ku nyikwa wudzunzo go hlawuleka hi vanwani. (Efe. 1:18, 19; gonza Va Le Filipi 2:2, 3.) A moya wa Jehova wu nyikile vona a wukustumunyu ga lezo. A ku bikelwangi a tiko gontlhe. Hikwalaho, a va hlamali loku a vanhu va nga tekeli ku kholwa lezaku hakunene va totilwe hi moya wa ku basa. Hi lisine va zi zwisisa lezaku a Mitsalo ya hi tlharihisa xungetano hi ku tsutsumela ku kholwa munhu a ti wulako lezaku i nyikilwe xiavelo xo hlawuleka hi Nungungulu. (Kuv. 2:2) Hi xigelo lexo, va wa nga ta tshuka va tirisa a kutotiwa kabye kota karaxa go ti tivekisa hi gona ka vanwani. A kutala ka zikhati va wa nga taza va zi kumbuka kambe loku va hlawutela matshango yabye ka vanwani, kasi ku potsa ku ti kokela wudzunzo. Va wa nga ta ti kulisa kambe hi nchachazelo lowo wa xikhati xa ha tako. — 1 Kor. 1:28, 29; gonza 1 Va Le Korinte 4:6-8.

⁸ Ahandle ka lezo, a maKristu ma totilweko a ma ti woni na ma lumba ntlawa wo kari wo hlawuleka. A ma hloti vanhu vanwani va ti wulako lezaku va na ni kuvitanwa loko kasi ku wumba kubohana ko kari navo, kutani ku ti wumbela mitlawa ya xigonzo xa Biblia ya vona voce. (Gal. 1:15-17) Lezo zi wa ta vanga kuhambana lomu bandleni zi tlhela zi lwisana ni moya wa ku basa, lowu wu vuvumisako kurula ni wumunwe. — Gonza Va Le Roma 16:17, 18.

9. Hikuyini u faneleko ku ti wonela ka ndlela leyi u khomako hi yona lava va gako xibaba ni kunwa vinya Xialakanyisweni? (Wona a kwadru “ A liranzo ‘a li mahi lezi zi nga faneliko.’”)

⁹ U fanele ku mu wonisa kuyini a munhu a gako xibaba ni kunwa vinya Xialakanyisweni? Jesu i byelile vapizani vakwe aku: “Nwina nwentlhe mu vamakabye.” I loya mahlweni aku: “Loyi a ta nga ti kukumukisa i ta koramiswa; ni loyi a ti koramisako i ta kukumukiswa.” (Mat. 23:8-12) Hikwalaho, zi wa nga tava zi nene ku tlakusa munhu, hambu loku a hi makabye wa Kristu. Loku gi wulawula hi madota ya maKristu, a Biblia gi hi kuca ku pimanyisa a kukholwa ka lava va hi rangelako, kanilezi a gi tshuki gi hi kuca ku lanzela munhu wa nyama kota murangeli wa hina. (Maheb. 13:7) Lisine lezaku a Mitsalo yi wulawula hi vokari va ringanako ku ‘dzunziwa hi kuengetelweko.’ Hambulezo, a vanhu lavo a va dzunziwi hi kota ya kuva vatotilweko, kanilezi va dzunziwa hi kuva “varisi va nene” ni lezi va ‘pinyamako kukaneleni ni kugonziseni.’ (1 Tim. 5:17) Hikwalaho, lava va nga ni kuvitanwa ka le tilweni va nga ta tlhatlheka loku a vanwani va va nyika wudzunzo gi nga faneliko. A xo biha nguvu kambe hi lezaku loku hi va maha vanhu vo hlawuleka, zi ta va karatela kuva vanhu vo ti koramisa. (Rom. 12:3) A hi lavi kuva xikhunguvanyiso ka vamakabye lavo va Kristu! — Luka 17:2.

10. U nga kombisa kuyini lezaku u na ni xichawo hi maKristu ma totilweko?

 ¹⁰ Hi nga kombisisa kuyini xichawo xi faneleko hi lava Jehova a hlawulako ku va tota? Hi wa nga ta va maha ziwutiso za ximunhu xungetano hi kutotiwa kabye. Hi ndlela leyo, hi potsa ku nghenela zilo zi nga hi lumbiko. (1 Tes. 4:11; 2 Tes. 3:11, NM) A hi faneli ku alakanya lezaku a vapswali, a nuna kutani sati, kutani maxaka manwani ya munhu a totilweko ma ta totiwawo. A wuxaka a gi tiri laha ka ku totiwa. (1 Tes. 2:12) Hi fanele ku valela mbilu ya hina kambe loku yi hi kuca ku wutisela a nuna kutani sati wa munhu a totilweko lezaku i ti zwisa kuyini hi ku tiva lezaku va nga ta hanya zinwe Paradiseni. Wutshanwini ga ku maha ziwutiso lezi zi nga vangako kubayisa ka mbilu, hontlheni hi nga tsumba hi kutiya lezaku Jehova i ta vulula canja gakwe a “xurisa zontlhe lezi zi hanyako.” — Tis. 145:16.

11. Hi ti vikela yini loku hi potsa ku “hlawula vanhu”?

¹¹ Lava va nga ni mawonela ma nene hi maKristu ma totilweko va ti vikela ka khombo ga hombe. A Mitsalo yi komba lezaku ku nga tshuka ku humelela “vamakabye va mawunwa” lomu bandleni. (Gal. 2:4, 5; 1 Joh. 2:19) A vakhohlisi lavo va nga tlhela va ti wula lezaku maKristu ma totilweko. Ahandle ka lezo, a maKristu yo kari ma totilweko ma nga ha hambuka kukholweni. (Mat. 25:10-12; 2 Ped. 2:20, 21) Loku hi potsa a ntlhamu wa ku “hlawula vanhu,” hi nga ta humesiwa lisineni hi vanhu lavo. A kukholwa ka hina ku nga ta bayisiwa kambe loku a muKristu wo kari wa masiku a tsika lisine. — Juda 16.

12, 13. Hikuyini hi nga faneliko ku karateka nguvu hi ntsengo wa lava va gako xibaba ni kunwa vinya Xialakanyisweni?

¹² Ka malembana lawa, ka woneka kuengeteleka ka ntsengo wa vanhu va gako xibaba ni kunwa vinya Xialakanyisweni xa kufa ka Kristu. Lezo zi woneka na zi nga zwanani ni kuhunguka loku ku nga woneka ka makume ya malembe ma hunzileko. Xana hi fanele ku karateka hi lezo? Ahihi. A hi woneni zigelo zi tsongwani.

¹³ ‘Jehova wa va tiva lava va nga vakwe.’ (2 Tim. 2:19) Lava va hlayako a ntsengo Xialakanyisweni a va na ku zi tiva lezaku hi mani loyi hakunene a nga ni kutsumba ka le tilweni. A ntsengo wa lava va gako ni kunwa wu patsa ni lava va alakanyako lezaku va totilwe, na va nga totiwangi. A vokari va nga sangulile kuga xibaba ni kunwa vinya hi kufamba ka xikhati va zi tsikile. A vanwani va na ni mababyi ya mapimo kutani ya mbilu ma va mahako va alakanya lezaku va ta ya  fuma na Kristu le tilweni. Hikwalaho, a ntsengo wa lava va gako xibaba ni kunwa vinya a wu kombi a ntsengo wa lisine wa vatotilweko va nga kona misaveni.

14. Zini lezi a Biblia gi wulako xungetano hi ntsengo wa vatotilweko va tova kona misaveni a xikhati lexi a kuxaniseka ka hombe ku to sangula ke?

¹⁴ A vatotilweko va ta ngha va hi kona matlhelweni yo tala ya misava a xikhati lexi Jesu a to ta va hlengeleta vaya tilweni. Na gi wulawula hi xikhati lexo, a Biblia gi wula lezi ha Jesu: “I ta ruma a tingelosi takwe na tiba mimpunzu yo vuma nguvu; ti ta tsombanyisa a vahlawulilweko vakwe hi ka mune wa matlhelo ya misava, kusukela magemeta-musi ya tilo kala ka manwani magemeta-musi.” (Mat. 24:31) A Mitsalo yi komba lezaku masikwini yo gumesa ku tava ni misalela ntsena ya vatotilweko. (Kuv. 12:17) Hambulezo, a Biblia a gi wuli lezaku vangani va to ngha va hi kona a xikhati lexi a kuxaniseka ka hombe ku to sangula.

15, 16. Zini hi faneleko ku zi zwisisa xungetano hi lava va 144.000 va hlawuliwako hi Jehova?

¹⁵ Jehova i hlawula vatotilweko hi xikhati lexi a xi lavako. (Rom. 8:28-30) Jehova i sangulile ku hlawula vatotilweko anzhako ka kufa ni kuvuxiwa ka Jesu, niku zi wonekisa ku khwatsi a maKristu wontlhe ya zana ga malembe go sangula ma wa totilwe. Kusukela ka zana ga malembe go sangula kala kusanguleni ka masiku yo gumesa, a kutala ka lava va nga ti wula lezaku valanzeli va Kristu va wa hi maKristu ya mawunwa; Jesu i va fananisile ni “nyasavari.” Hambulezo, Jehova i simamile a tota maKristu yo kari yo tsumbeka nzeni ka xikhati lexo, niku va wa fana ni “mavele” lawa Jesu a nga wulawula hi wona. (Mat. 13:24-30) Masikwini lawa yo gumesa, Jehova i simama a hlawula lava va to wumba a ntsengo lowo wa 144.000. ^[2] Loku a boha ku rinzela xikhati xo kari kasi ku hlawula vanhu vo va nyika lungelo lego, himani a to sola wutlhari gakwe? (Isa. 45:9; Dan. 4:35; gonza Va Le Roma 9:11, 16.) ^[3] Hi fanele ku ti wonela ku tekelela a vatiri lava va nga sola hi lezi a mutholi wabye a nga khomisa zona a vatiri lava va nga tholiwa ni gambo. — Gonza Mateu 20:8-15.

¹⁶ A hi vontlhe lava va nga ni kuvitanwa ka le tilweni va wumbako a “nanza gi tsumbekileko ni go tlhariha.” (Mat. 24:45-47) A ku fana ni lezi va nga maha ka zana ga malembe go sangula, Jehova na Jesu va gisa votala hi canja ga vanhu va tsongwani. Ka zana ga malembe go sangula maKristu ma tsongwani ntsena ma totilweko ma nga tirisiwa kasi ku tsala a Mitsalo ya wuKristu ya xiGreki. Nyamutlha kambe, maKristu ma tsongwani ntsena yo totiwa ma nyikwako a xiavelo xa ku phamela “zakuga hi xikhati xi faneleko.”

17. U gonzile yini ka nzima leyi?

¹⁷ Zini hi zi gonzileko ka mahungu lawa? Jehova i hlawulile ku chachazela vanhu hi tindlela timbiri to hambana. I hlawulile ku chachazela vaJuda va moya hi wutomi ga le tilweni, ni khume ga vavanuna vo fananisa hi wutomi ga laha misaveni. Hambulezo, i lava lezaku vontlhe va tsumbeka hi ndlela yo fana. A mitlawa yontlhe ya yimbiri yi fanele ku ti koramisa. Yi fanele kuva ni wumunwe. Niku yi fanele ku vuvumisa wumunwe lomu bandleni. Laha a masiku yo gumesa ma yako ma mbhela, ngha hina hontlheni hi ti yimisela ku tira kota ntlhambi wunwe mandleni ya Kristu.