1. Hambu lezi Jehova a tlakukileko nguvu, i ramba vanwani lezaku va maha yini?

JEHOVA i tlakukile nguvu. Hi yena Muvangi wa zilo zontlhe, niku hi Yena yece a nga ni wutlhari ni ntamu wu nga gumelwiko. Joba i zi zwisisile lezo. Anzhako ka loku Jehova a wutisile Joba hi mitiro Yakwe ya kuvanga, Joba i lo hlamula aku: “Nza zi tiva lezaku wena wa zi kota ku maha zilo zontlhe, ni lezaku a kuxuva ka wena a ku na ku tsanzekiswa.” (Joba 42:2) Hambu lezi Jehova a zi kotako ku maha ni xihi a xi lavako — na a nga lavi xivuno — kusukela kwale kusanguleni, i kombisa liranzo hi ku ramba vanwani lezaku va tira naye kasi a tatisa kungo gakwe.

2. I ntiro muni wa lisima lowu Jehova a nyikileko Jesu lezaku a wu maha?

² A xivangwa xo sangula xa Nungungulu i N’wana wakwe wa moya a belekilweko yece. Jehova i lo vumelela a N’wana wakwe lezaku a mu vuna ku vanga zilo zontlhe le’zinwani, a za moya ni za nyama. (Joh. 1:1-3, 18) Xungetano hi Jesu, mupostoli Paule i lo tsala lezi: “A zilo zontlhe zi vangilwe ha yena, le tilweni ni laha misaveni, a zilo zi woniwako ni lezi zi nga woniwiko, kutani zitshamu za wuhosi, kutani mifumo, kutani vafumeli va mimoya, kutani mintamu; zontlhe zi vangilwe hi yena, zi vangelwa  yena.” (Kol. 1:15-17) Hikwalaho, Jehova i dzunzile N’wana wakwe hi ku tira naye kuvangeni ka zilo ni ku byela vanwani a ntiro wa lisima lowu a N’wana wakwe a wu mahako.

3. Zini lezi Jehova a kombeleko Adamu ku maha, niku hikuyini?

³ Jehova i kombele vanhu kambe lezaku va tira naye. Hi xikombiso, i kombele Adamu lezaku a chula mavito a zihari. (Gen. 2:19, 20) Hi nga alakanyela a litsako la Adamu laha a nga kari a cuwukisa a zivangwa lezo, a hlola matshamela ya zona, ni ku hlawula vito gi tshamako khwatsi ka xinwe ni xinwani! Jehova ngha a zi chulile ha yece — hi yena a nga vanga zona. Hambulezo, hi kota ya liranzo i kombele Adamu lezaku a zi chula. I tlhelile a nyika Adamu a lungelo ga ku anzisa simu ga Edeni gi maha Paradise ga misava yontlhe. (Gen. 1:27, 28) Lexi xi nga tsakisiko hi lezaku Adamu hi magumo i lo hlawula ku tsika ku tira na Nungungulu, lezi zi nga neha khombo ka yena wutsumbu ni ka pswalo wakwe wontlhe. — Gen. 3:17-19, 23.

4. A vanhu vanwani va tirisile kuyini na Nungungulu kasi ku maha kuranza kakwe?

⁴ Hi kufamba ka xikhati, Nungungulu i lo kombela vanhu vanwani lezaku va tira naye kutatiseni ka kungo gakwe. Noa i lo aka a taru legi gi mu ponisileko zinwe ni ngango wakwe ka Ntalo wa misava yontlhe. Mosi i lo tlhatlhisa vaIsraeli le Gipite. Joxua i lo nghenisa vaIsraeli ka Tiko ga Xitsumbiso. Solomoni i lo aka tempeli le Jerusalema. Maria ive mamani wa Jesu. Vontlhe a vanhu lavo vo tsumbeka ni vanwani vo tala va tirile na Jehova kasi ku maha kuranza kakwe.

5. I ntiro muni lowu hi zi kotako ku patseka ka wona, niku Jehova i wo wu tsanza ku maha ke? (Wona mufota kusanguleni ka nzima.)

⁵ Inyamutlha, Jehova i hi kuca ku seketela Mufumo wa wuMessia hi ntamu wa hina wontlhe. Ku na ni tindlela to tala ta ku maha ntiro lowo wo basa. A tokari a ti kumiwi hi maKristu wontlhe, kanilezi hontlheni hi nga patseka ntirweni wa ku xumayela a mahungu yo saseka ya Mufumo. Hi lisine, Jehova a nga tsanzeki ku maha ntiro lowo ha yece. Ngha a hlawulile ku wulawula ni vanhu laha misaveni ha yece na hi kwale tilweni. Jesu i wulile lezaku Jehova na a tirisile hambu maribye kasi ku huwelela a Hosi ya wuMessia. (Luka 19:37-40) Hambulezo, Jehova wa hi vumelela kuva “zitiri-kulobye.” (1 Kor. 3:9) Mupostoli Paule i lo tsala lezi: “Kota lezi hi tirisanako naye ha mu khongotela lezaku mu nga amukeli tipswalo ta Nungungulu mahala.” (2 Kor. 6:1) A ku tira na Nungungulu wudzunzo ga hombe, legi gi hi nyikako litsako la hombe. A hi woneni zigelo zi tsongwani.

6. A N’wana wa matewula wa Nungungulu i tlhamuselisile kuyini lezi a nga ti zwisa zona hi ku tira ni Dadani wakwe?

⁶ Kusukela kale, a malanza ya Jehova ma kuma litsako hi ku tira naye. A N’wana wa matewula wa Nungungulu, loyi ku wulawuliwako hi yena kota xikombiso xo mbhelela xa wutlhari, i kombisiwa na a wula lezi: “Jehova i lo nzi vanga kusanguleni ka ndlela yakwe, . . . Nzi wa hi zinwe naye, kukotisa xigogo xa mitiro. Nzi mu tsakisa siku ni siku, na nzi tsaka xontlhe xikhati mahlweni kakwe.” (Mav. 8:22, 30) Jesu i wa tira hi kutsaka ni Dadani wakwe, na a tsaka hi lezi a nga zi maha ni ku tiva lezaku Jehova wa tsaka hi yena. Ahati hina ke?

7. Hikuyini a ntiro wa kuxumayela wu hi nyikako litsako?

⁷ Jesu i wulile lezaku a ku nyika ni ku nyikiwa zontlhe za tsakisa. (Miti. 20:35) Hi kumile litsako hi ku gonzisiwa lisine, niku ha  kuma litsako hi ku byela vanwani a lisine lelo. A xikhati hi byelako vanwani a lisine la Biblia, hi wona vanhu va nga ni ndlala hi tlhelo ga moya na va tsaka hi ku tiva Nungungulu ni ku zwisisa a lisine la Mhaka yakwe va tlhela va wona lisima la kona. Za khumba a mbilu ya hina a ku wona vanhu lavo na va cica maalakanyo yabye ni mahanyela yabye. Ha zi zwisisa lezaku a ntiro wo xumayela mahungu yo saseka wa lisima nguvu. Wu va vululela ndlela ya ku kuma wutomi ga pinzukelwa lava va tlhanganyiswako na Nungungulu. (2 Kor. 5:20) A ku na ntiro wu tsakisako nguvu a ku hunza ku vuna vanhu lezaku va hanya hi ndlela yi to va maha va kuma wutomi ga pinzukelwa!

8. Zini lezi a vokari va zi wulileko xungetano hi litsako la ku tira na Jehova?

⁸ Hambu lezi hi tsakako a xikhati lexi a vanhu va amukelako mahungu lawa hi xumayelako, ha tsaka kambe hi ku tiva lezaku hi tsakisa Jehova niku wa nyika lisima kutikarata loku hi ku mahako kasi ku mu tirela. (Gonza 1 Va Le Korinte 15:58.) Marco, a hanyako Italia, i ngalo: “Nzi tsaka nguvu hi ku tiva lezaku nzi mahela Jehova zontlhe zi nga ntanwini wa mina; a nzi maheli munhu a to rivala lezi nzi mahileko.” Franco, loyi yenawu a hanyako le Italia, i ngalo: “Hi ku tirisa a Mhaka yakwe ni malulamiselo yakwe ya moya, Jehova wa hi alakanyisa siku ni siku lezaku wa hi ranza niku zontlhe lezi hi mu mahelako za lisima, hambu loku a kutikarata ka hina ku wonekisa ku khwatsi a hi ka nchumu. Hi xigelo lexo, a ku tira na Nungungulu zi nzi maha nzi tsaka nzi tlhela nzi ti wona na nzi hanyela xo xi tiva.”

9. Kubohana muni ku nga kona ka Jehova na Jesu niku hikuyini?

⁹ A ku tira ni vanhu hi va ranzako zi maha lezaku hi tshinela ka vona hi tlhela hi tiva wumunhu gabye ni matshamela yabye. Hi tiva makungo yabye ni lezi va lavako ku ma tatisisa zona. Jesu i tirile na Jehova hi tibiliyoni ta malembe, niku va lo wumba kubohana ko tiya nguvu ka liranzo. Na a wulawula hi kubohana kabye, Jesu i te ngalo: “Mina na Dadani hi munwe.” (Joh. 10:30) Va vile ni wumunwe ga hombe, laha va nga tira zinwe hi kuzwanana.

10. Hikuyini a kuxumayela ku hi tshinetako ka Nungungulu ni ka vanwani?

¹⁰ Jesu i lo kombela Jehova hi mukhongelo lezaku a hlayisa vapizani vakwe. Hikuyini? I lo khongela aku: “Kasi va fela ku tshama munwe, khwatsi hi hina hi nga munwe.” (Joh. 17:11) A xikhati lexi hi ti karatelako ku hanya hi matshinya ya milayo ya Nungungulu ni ku maha ntiro wa kuxumayela, hi zwisisa a matshamela yakwe yo tsakisa. Hi tlhela hi wona a ku hikuyini zi nga wutlhari a ku mu tsumba ni ku lanzela wurangeli gakwe. A xikhati hi tshinelako ka Nungungulu, yenawu o tshinela ka hina. (Gonza Jakobe 4:8.) Hi tshinela ka vamakabye va hina va moya kambe hakuva a zikarato lezi hi kumanako nazo ni zilo zi hi nyikako litsako hi zalezi za zinwe niku hi na ni makungo yalawa ya manwe. Kunene,  hi tira zinwe, hi tsaka zinwe, hi tlhela hi timisela zinwe. Octavia, a hanyako Grã-Bretanya i ngalo: “A ku tira na Jehova zi nzi tshineta ka vanwani hakuva a wunghana ga hina a ga ha seketelwi ka ku tivana ntsena, kanilezi gi seketelwa ka kuva ni kungo ginwe ni ku famba ndlela yinwe.” Hi zalezo u ti zwisako zona na wenawu? Wa tshinela ka vanwani loku u wona a kutikarata loku va ku mahako kasi ku tsakisa Jehova ke?

11. Hikuyini hi to tshinela nguvu ka Jehova ni ka vamakabye va hina misaveni yiswa?

¹¹ Hi nga hava ni liranzo la hombe hi Nungungulu ni vanhu-kuloni zalezi, hambulezo, misaveni yiswa li tava la hombe nguvu ku hunza nyamutlha. Hi nga ehleketa hi ntiro lowu hi to wu maha! Hi ta hoyozela lava va to vuxiwa hi tlhela hi va gonzisa tindlela ta Jehova. A misava yi ta lava ku mahiwa paradise. Leyo a hi mitiro yi tsongwani, hambulezo yi ta tsakisa nguvu hi lezi hi to tira hi mbilu yinwe hi tlhela hi maha vanhu vo mbhelela Mufunweni wa wuMessia! A vanhu vontlhe va ta tshinelelana va tlhela va tshinela ka Nungungulu wabye, loyi handle ko kanakana a to “xurisa zontlhe lezi zi hanyako.” — Tis 145:16.

12. A ntiro wa kuxumayela wu hi vikelisa kuyini?

¹² Hi fanele ku vikela a wumoya ga hina. Kota lezi hi hanyako ka tiko gi fumelwako hi Satani Diabolus ni lezi hi kalako hi nga mbhelelangi, za olova kuva hi lanzela a maalakanyo ni mahanyela ya hava ya tiko legi. A moya wa tiko hi nga wu fananisa ni mati ya congo ma hi kokako hiya lomu ko kala hi nga ku lavi. Kasi ma nga hi hluli, hi fanele ku hlambela hi ntamu wa hombe hiya lomu hi ku lavako. Hi kufanana, zi lava kutikarata kasi hi nga kokiwi hi moya wa tiko ga Satani. A xikhati lexi hi xumayelako vanwani, hi veka kupima ka hina ka zilo za moya lezi zi nga za lisima, na ku nga hi ka maalakanyo ma to daya a kukholwa ka hina. (Fil. 4:8) A ku xumayela zi tiyisa kukholwa ka hina, zi tlhela zi hi alakanyisa a zitsumbiso za Nungungulu ni milayo yakwe ya liranzo. Za hi vuna kambe lezaku hi simama kuva ni matlhari wontlhe ya moya. — Gonza Efesusi 6:14-17.

13. Joel i ti zwisa kuyini hi ntiro wa kuxumayela?

¹³ Loku hi tshama hi khomekile hi ntiro wa kuxumayela ni mitiro yinwani ya moya, hi nga ta xi kuma xikhati xa ku binziwa hloko hi zikarato za hina wutsumbu. Hikwalaho, za hi vikela. Joel, a hanyako Austrália, i ngalo: “A ntiro wa kuxumayela wa nzi vuna ku wona zilo kota lezi hakunene zi nga zona. Wu nzi alakanyisa a zikarato lezi vanhu va kumanako nazo ni mabhinzu lawa nzi ma kumako hi ku hanya hi matshinya ya milayo ya Biblia. A ntiro wa kuxumayela wu nzi vuna ku ti karatela ku simama nzi ti koramisa; lezo zi nzi nyika lungelo ga ku tsumba Jehova ni vamakabye va mina.”

14. Hikuyini a kutimisela ka hina ntirweni wo xumayela zi kombako lezaku a moya wa Nungungulu wu na hina?

¹⁴ A ntiro wa kuxumayela wu hi maha hi tiyiseka kambe lezaku a moya wa Nungungulu wu na hina. Hi xikombiso, hi nga ti alakanyela na u nyikilwe ntiro wa ku avela tipawa ti nga ni mavitamina xipanzeni xa nwina. U nga ta hola hi ntiro lowo ge hambu ku nyikwa mali ya xapa. Ahandle ka lezo, a kutala ka vanhu a va ti lavi tipawa leto niku va ta ku zonda hi lezi u va yelako nato. U nga simama kala rini ntirweni lowo? Hi ku swiriwa hi mahlamulela ya vanhu, kuzilava u nga tava ni ntamu wa ku simama hi xikhati xo leha. Hambulezo, a kutala ka hina ha timisela lembe ni lembe ntirweni wa kuxumayela, na hi tirisa mali ya hina wutsumbu hambu loku hi tseketselwa ni ku hlekiwa hi  vanhu va nga bongiko. Xana lexo a hi xikombiso xa lezaku a moya wa Nungungulu wu na hina?

15. A ku xumayela mahungu yo saseka zi zwananisa kuyini ni kungo ga Nungungulu hi vanhu?

¹⁵ Hi nga alakanya lezi a ntiro wo xumayela mahungu yo saseka wu zwananisako zona ni kungo ga liranzo ga Nungungulu hi vanhu. I lava lezaku a vanhu va hanya laha misaveni na va ngafi; hambu lezi Adamu a nga onha, Jehova a nga cicangi a kungo gakwe. (Isa. 55:11) Wutshanwini ga lezo, i mahile malulamiselo kasi ku tlhatlhisa vanhu ka xionho ni kufa. Kasi ku tatisa kungo lego, Jesu i lota misaveni a ta nyikela wutomi gakwe kota muphahlelo wa ku tlhatlhisa a vanhu vo ingisa. Hambulezo, kasi va ingisa va wa fanele ku zwisisa lezi Nungungulu a zi lavako kabye. Hikwalaho, Jesu i tlhelile a gonzisa vanhu a zileletelo za Nungungulu a tlhela a laya vapizani vakwe lezaku va maha zalezo. Hi ku vuna vanhu lezaku va vuxa kuzwanana kabye na Nungungulu, hi maha ntiro wu zwananako khwatsi ni lulamiselo gakwe ga liranzo ga ku tlhatlhisa vanhu ka xionho ni kufa.

16. A ntiro wa hina wa kuxumayela wu yelanisa kuyini ni milayo ya hombe ya Nungungulu?

¹⁶ A ku vuna vanwani lezaku va kuma wutomi ga pinzukelwa zi komba liranzo la hina hi vanhu-kulori na Jehova, “loyi a ranzako lezaku vanhu vontlhe va hanyiswa, vava ni kutiva ka [lisine].” (1 Tim. 2:4) Laha va nga mu wutisa lezaku hi wihi nayo wa hombe ka yontlhe yi nyikilweko vaIsraeli, Jesu i lo hlamula aku: “U ta ranza Hosi Nungungulu wa wena hi mbilu ya wena yontlhe, ni muhefemulo wa wena wontlhe, ni kupima ka wena kontlhe. Lowu hi nayo wa hombe ni wa kuranga. Ni wa wumbiri wu fananako na wona, hi lowu: U ta ranza wakelene na wena kota lezi u ti ranzako wena.” (Mat. 22:37-39) Hi ku maha a ntiro wa kuxumayela, hi komba lezaku ha ingisa a milayo leyo. — Gonza Mitiro 10:42.

17. U ti zwisa kuyini hi wudzunzo ga ku xumayela a mahungu yo saseka?

¹⁷ A hi no ku kateka! Jehova i hi nyikile ntiro wu hi nehelako litsako, wu hi tshineta kakwe ni ka vanwani, wu tlhela wu hi vikela hi tlhelo ga moya. Wu hi nyika lungelo kambe ga ku komba a liranzo la hina hi Nungungulu ni vanhu-kulori. A ziyimo za vanhu va Nungungulu laha misaveni za hambanahambana, hambulezo vontlhe — a vaswa ni vakhosaheleko, a zisiwana ni la’vo ganya, lava va ntamu ni lava vo kala va nga hi nawo — va hlota tindlela ta ku bhulela vanwani a kukholwa kabye. Kuzilava wa vumelelana na Chantel, loyi a hanyako le França. I ngalo: “A Munhu wa ntamu nguvu ka vontlhe wuakweni, a Muvangi wa zilo zontlhe, a Nungungulu wo tsaka, i nzi byela lezi: ‘Famba! Wulawula! Wulawula hi mina na zi huma mbilwini. Nzi ku nyika a ntamu wa mina, ni Mhaka ya mina Biblia, ni xivuno xa le tilweni, ni vapangalati va laha misaveni, ni gonziselelo yi nga nyimiko, ni zileletelo hi xikhati xi faneleko.’ I lungelo ga hombe a ku maha lezi Jehova a hi kombelako ni ku tira zinwe ni Nungungulu wa hina!”