1-3. Zimaho muni zi nga maha lezaku a Pentekosta wuva siku go hlawuleka, niku a zimaho lezo zi tatisisile kuyini xiprofeto xa Mitsalo? (Wona mufota laha hehla.)

YI WA hi mixo ya Sonto, na zi hi kwalomo ka ma 9. Gi wa hi siku go hlawuleka ka lava va nga hi kona le Jerusalema. Gi wa hi siku ga mubuzo niku gi wa hi sabado kambe. Handle ko kanakana, a minyikelo ya mixo yi wa sina yi mahilwe laha tempeleni. Makunu a vanhu vontlhe va wa kari va cuwukela hi mahlo yo pswhuka laha a mupristi wa hombe a nga kari a ti longisela kasi ku maha a munyikelo wa ku nziwitela wa zibaba zimbiri za mavele maswa zi mahilweko ni comelo. (Levi 23:15-20) A munyikelo lowo wu wa komba a kusangula ka nguva ya kutshovelwa ka tirigu. Lego gi wa hi lembe ga 33 Nguveni ya Hina, niku gi wa hi siku ga Pentekosta.

² Laha zontlhe lezo zi nga kari zi maheka tempeleni, ku wa kari ku tshinela xikhati xa kuva ku maheka nchumu wunwani wa lisima nguvu ku hunza zona. Wu wa nga ta maheka laha tempeleni, kanilezi wu wa ta maheka ka yindlu yo kari ya xitezi doropeni galego. A ntlawa wo kari wa xipimo xa 120 wa maKristu wu wa tlhangene ka yindlu leyo, na wu “simamisa kukhongeleni.” (Miti. 1:13-15) Lezi zi nga lava ku va humelela zi yelana nguvu lezi a mupristi wa hombe a nga zi yimela ka Pentekosta yinwe ni yinwani, niku zi wa tatisa xiprofeto xi nga wulilwe hi muprofeti Joeli kwalomo ka 800 wa malembe nzhako.  (Joe. 2:28-32; Miti. 2:16-21) Kanilezi i nchumu muni walowo wa lisima nguvu wu nga lava ku maheka?

³ Gonza Mitiro 2:2-4. A moya wa ku basa wa Nungungulu wu lo chululwa ka ntlawa lowo wa maKristu ma nga tlhangene ka yindlu ya le xitezi. (Miti. 1:8) Va lo sangula ku profeta, kutani ku kustumunya, xungetano hi zilo zo hlamalisa lezi va nga zi wonile ni ku zizwa. Ka xidlemo xo kari xi chikeleko anzhako ka xikhatanyana, mupostoli Pedro i lo tlhamusela a ku zi wa wula yini lezi zi nga humelele. Hi kulanzela i lo byela vaingiseli vakwe aku: “Hunzulukani, mu bapatizwa nwentlhelele vitweni ga Jesu Kristu, kutsetselelweni ka zionho za nwina; zonake mu ta amukela a xinyikiwo xa moya wa ku basa.” A xipimo xa 3.000 wa vanhu va lo vumela a xirambo lexo, va bapatizwa ka siku galego, va tlhela va amukela a moya wa ku basa lowu va nga tsumbisilwe. — Miti. 2:37, 38, 41.

4. a) Hikuyini hi faneleko ku chela kota hi lezi zi nga humelela hi Pentekosta? b) Hi xihi xinwani ximaho xo hlawuleka xi nga humelele hi siku galego ka malembe nzhako? (Wona tlhamuselo wa lahasi.)

⁴ Hikuyini a Pentekosta wa 33 Nguveni ya Hina a nga wa lisima nguvu ka hina? A nga mahi wa lisima hi kota ya lezi zi nga humelela tempeleni le Jerusalema. Kanilezi i hlawulekiswa hi lezi Jesu Kristu, kota mupristi wa hombe, a nga tatisa zimaho lezo za wuprofeti. ^[1] A mupristi wa hombe i nyikele ka Jehova a zibaba zimbiri ntsena za xikombiso. A zibaba lezo zi comelweko zi nga nyikelwa tempeleni zi wa yimela a vapizani va totilweko, lava va tekilweko xikari ka vanhu va nga mbhelelangiko kasi va maha vana va Nungungulu. Hi ndlela leyo ku lo vululwa ndlela ya lezaku a ‘mihanzu yo sangula’ ya vanhu hi magumo yiya tilweni yi ya nghena ka Mufumo lowu wu to neha makatekwa ya tsanza-vahlayi ka vanhu vontlhe vo ingisa. (Jak. 1:18; 1 Ped. 2:9) Hikwalaho, kani hi na ni kutsumba ka ku ya hanya na Jesu le tilweni, kani hi na ni kutsumba ka ku hanya kala kupinzuka paradiseni kwalaha misaveni, a wutomi ga hina ga khumbiwa nguvu hi zimaho za siku lego!

5. Hi zi tivisa kuyini lezaku a hi wontlhe maKristu ma totilweko ma totiwako hi ndlela yo fana?

⁵ Loku u wa hi munwe wa vapizani lava va vileko ni nchumu wo khwatsi lirimi la nzilo hlokweni yabye, u wa nga ta tshuka u gi rivakelwa a siku lego. U wa nga ta kanakana ni kutsongwani lezaku u totilwe hi moya wa ku basa, nguvunguvu loku wenawu u wa amukele a xinyikiwo xo hlamalisa xa ku wulawula lirimi la matiko-wundle. (Miti. 2:6-12) Kanilezi xana vontlhe lava va totiwako hi moya wa ku basa va totiwa hi ndlela yaleyo yo hlamalisa leyi a ntlawa lowuyani wa 120 wa vapizani wu nga totiwa hi yona ke? Ahihi. A vanhu vanwani lava va nga hi kona le Jerusalema ka siku lego va totilwe kubapatizweni kabye. (Miti. 2:38) A ku wonekangi tirimi to khwatsi ta nzilo tihlokweni tabye. Tlhatakumbiri, a hi wontlhe maKristu ma totilweko ma nga totiwa kubapatizweni ka wona. A vaSamaria va totilwe hi moya wa ku basa anzhako ka xikhati xo kari na va bapatizilwe. (Miti. 8:14-17) Hi tlhelo ginwani, ka khati go kari go kala ku toloveleka, Korneliu ni ngango wakwe va totilwe na va nga se bapatizwa. — Miti. 10:44-48.

6. Xini lexi a vatotilweko vontlhe va xi amukelako, niku xi va khumbisa kuyini?

⁶ Hikwalaho a hi vontlhe va totiwako hi ndlela yo fana. Kuzilava a vokari va tekele ku zi zwisisa lezaku va na ni kuvitanwa ka le tilweni, kasi a vanwani va zi zwisisile hi kutsongwani-kutsongwani. Hambulezo, na ku nga khataliseki lezi va totiswako zona, a munwe ni munwani wabye i na ni lezi zi tlhamuselwako hi mupostoli Paule zaku: “Na mu kholilwe mu lo fungiwa hi moya wa ku basa lowu wu tsumbisilweko, lowu wu nga seve wa tshomba ya hina.” (Efe. 1:13, 14) A tirela lego go hlawuleka ga moya wa ku basa gi maha ku khwatsi i mali ya ku vekisa nchumu, kutani xitiyisekiso xa lezi zi  tako. A muKristu a totilweko i kuma kutiyiseka ka hombe hi kota ya seve lowo, kutani xitiyisekiso lexo a xi amukeleko. — Gonza 2 Va Le Korinte 1:21, 22; 5:5.

7. Zini lezi a muKristu munwe ni munwani a totilweko a faneleko ku maha kasi a amukela a nchachazelo wa le tilweni?

⁷ Xana a ku amukela seve lowo xitiyisekiso xa lezaku a muKristu loye i ta ya hanya tilweni ke? Ahihi. A munhu loye wa tiyiseka lezaku i vitanilwe. Kanilezi a ku amukela kutani ku nga amukeli a nchachazelo wa le tilweni zi khegela ka kutsumbeka kakwe. Pedro i zi tlhamusele hi ndlela leyi: “Hikwalaho, vamakabye, pinyamelani nguvu hi ku tiyisa a kuvitanwa ni kuhlawulwa ka nwina; hakuva loku mu maha lezo, cima mu nga ta [tsanzeka]; hakuva hi ku maha lezo mu ta nyikiwa a ku enghena mufunweni wu nga mbheliko wa Hosi ya hina ni Muhanyisi Jesu Kristu.” (2 Ped. 1:10, 11) Hikwalaho, a muKristu munwe ni munwani a totilweko i fanele ku ti karatela ku simama a tsumbekile. Loku a nga mahi lezo, a kuvitanwa kakwe, kutani xirambo xakwe xa le tilweni, xi nga ta mu vuna nchumu. — Maheb. 3:1; Kuv. 2:10.

8, 9. a) Hikuyini a kutala ka vanhu zi va karatelako ku zi zwisisa loku a munhu a totiwa? b) A munhu i zi tivisa kuyini lezaku i rambilwe kasi kuya tilweni?

⁸ A kutala ka malanza ya Nungungulu nyamutlha zi nga ha ma karatela a ku zwisisa lezi a vanhu va totiswako zona, niku za zwisiseka. Wona a ma totiwangi. A kungo go sangula ga Nungungulu ku wa hi lezaku a vanhu va hanya kala kupinzuka laha misaveni. (Gen. 1:28; Tis. 37:29) A kuhlawulwa ka vokari lezaku va ya fuma kota tihosi ni vapristi le tilweni a hi nchumu wo toloveleka. I lulamiselo go hlawuleka. A kuvitanwa loko ku cica nguvu a maalakanyo, mawonela ya zilo, ni kutsumba ka munhu a xikhati lexi a totiwako. — Gonza Va Le Efesusi 1:18.

⁹ Kanilezi a munhu a nga zi tivisa kuyini lezaku i na ni kuvitanwa ka le tilweni? A nga zi tivisa kuyini lezaku i amukele a seve lowo wo hlawuleka ke? A hlamulo wu woneka khwatsi ka magezu lawa Paule a nga byela vamakabye va totilweko le Roma, lava va “vitanilweko a kuva vobasa.” I lo va byela lezi: “A mu amukelangi a moya wa wukhumbi lezaku mu tlhela mu chava; kanilezi nwina mu lo amukela a moya wa wun’wana, lowu hi vitanako ha wona, hiku: Abba! Dadani! Ni wona moya wutsumbu wu kustumunya zinwe ni moya wa hina lezaku hi vana va Nungungulu.” (Rom. 1:7; 8:15, 16) Hi magezu ma tsongwani, Nungungulu i dlunyatisela munhu loye hi moya wakwe lezaku wa rambiwa kasi kuva xiga-tshomba xa lulamiselo ga Mufumo. — 1 Tes. 2:12.

10. A bhuku ga 1 Johani 2:27 gi lava ku wula yini loku giku a muKristu a totilweko a nga lavi ku gonzisiwa hi munhu munwani?

¹⁰ Lava va nyikiwako xirambo lexo xo hlawuleka hi Nungungulu a vazi va lava wukustumunyu ginwani. A va na xilaveko xa ku kombela munhu munwani lezaku a tiyisa lezi zi nga va humelela. Jehova a nga siyi kukanakana ni kutsongwani maalakanyweni ni timbilwini tabye. Mupostoli Johani i byela maKristu lawo ma totilweko aku: “Nwina mu totilwe hi loyi wa kubasa, ma zi tiva zilo zontlhe.” I engeta aku: “Kanilezi a kutotiwa loku mu ku amukeleko hi ka yena ku tshamile ka nwina, a za ha laveki lezaku mu gonziswa hi munhu; kanilezi kota lezi a kutota kakwe ku mu gonzisako zontlhe zi nga zinene, na ku nga hi na wunwa, tshamani ka yena kota lezi ku mu gonzisileko.” (1 Joh. 2:20, 27) A vanhu lavo va na ni xilaveko xa gonziselelo ya moya a ku fana ni vanwani. Kanilezi a va na xilaveko xa ku tiyisiwa hi munwani lezaku va totilwe. Va nyikilwe xitiyisekiso hi moya wa ku basa, lowu wu nga wona ntamu wa hombe ka yontlhe yi nga kona wuakweni!

11, 12. Zini lezi a muKristu a totilweko a nga ha ti wutisako, kanilezi zini lezi a kalako a nga tshuki a kanakana?

¹¹ A xikhati lexi a moya wa ku basa wu mu  nyikako kutiyiseka loko, a muKristu a totilweko i cica nguvu. Jesu i wulawulile hi kucica loko ka le nzeni kota ku ‘belekwa luswa.’ ^[2] (Joh. 3:3, 5) I loya mahlweni a tlhamusela aku: “U nga hlamali hi lezi nzi ngaku ngalo ka wena: mu fanele hi ku belekiwa luswa. A mheho yi pupuxa laha yi ranzako kona, u gizwa lungu ga yona, kanilezi a ku tivi laha yi tako ha kona, ni lomo yi yako kona; hizalezo vontlhe lava va belekilweko hi moya.” (Joh. 3:7, 8) Zi te dlunya lezaku a zi koteki ku tlhamusela khwatsi a kuvitanwa loko ka lava va nga kala ku vitaniwa.

¹² Lava va vitanilweko hi ndlela leyo va nga ha ti wutisa lezi: ‘Hikuyini nzi nga hlawuliwa? Hikuyini ku nga hlawuliwa mina wutshanwini ga manyani?’ Va nga tlhela va kanakana lezaku hakunene va ringanelwa. Kanilezi a va kanakani lezaku va rambilwe. A timbilu tabye ti tele hi litsako ni kubonga. Va ti zwisa ku khwatsi hi lezi Pedro a nga ti zwisa zona a xikhati a nga pimiselwa ku wula lezi: “A khesiwe Nungungulu tlhelo Dadani wa Hosi ya hina Jesu Kristu, loyi hi kota ya wuxinji gakwe ga hombe a nga hi beleka luswa, hiva ni kutsumba ku hanyako hi kuvuka ka Jesu Kristu hi ka vafileko, lezaku hiva ni tshomba leyi yi nga boliko, yi nga hiko na zivi, leyi yi nga wuniko, yi vekelweko nwina le tilweni.” (1 Ped. 1:3, 4) A xikhati lexi a vatotilweko va gonzako magezu lawo, a va kanakani lezaku a Dadani wabye wa le tilweni i kari a wulawula na vona wutsumbu.

13. A maalakanyo ya munhu ma cicisa kuyini a xikhati a totiwako hi moya wa ku basa, niku ku vangiwa hi yini?

¹³ Na ma nga se amukela wukustumunyu lego ga moya wa Nungungulu, a maKristu lawo ma wa xalala hi kutsumba ka ku hanya laha misaveni. Ma wa xuva a xikhati lexi Jehova a to basisa misava leyi, niku ma wa lava kuva kona ka xikhati lexo xi tako xa makatekwa. Kuzilava ma wa tlhela ma ti alakanyela na ma amukela maxaka ya wona ni vanghana na va vuka hi ka vafileko. Ma wa rinzela hi mahlo yo pswhuka a ku aka tiyindlu ma hanya ka tona ni kuga mihanzu ya tisinya va byalileko ha voce. (Isa. 65:21-23) Makunu, hikuyini a maalakanyo yabye ma cicileko? A hi ku khwatsi vo kala va nga ha ma tsakeli a makatekwa lawo. A va cicangi maalakanyo hi kota ya kukarateka ko kari kutani ku djudjeka kupima. A hi ku khwatsi vo kala va nga ha zi lavi ku hanya laha misaveni, a ku khwatsi hi loku va no tshuka va alakanya lezaku a ku hanya kala kupinzuka laha misaveni zi ta popa kutani ku karalisa; a hi ku khwatsi va no navela ku ya wona zilo za le tilweni kambe. Wutshanwini ga lezo, va cicile maalakanyo hi kota ya kutira ka moya wa Nungungulu lowu wu va vitanileko, kutani ku va ramba, wu tlhela wu cica maalakanyo yabye ni kutsumba kabye.

14. A vatotilweko va gi wonisa kuyini a wutomi gabye laha misaveni?

¹⁴ Makunu xana hi fanele ku alakanya lezaku a vatotilweko va xuva kufa ke? Paule i pimiselwe ku hlamula xiwutiso lexi hi magezu lawa: “Hizinene, hina lava hi nga ka lowu xaxa ha keta ni ku binzwa; hakuva a hi lavi ku wu tlhatlha, kanilezi hi ranza ku ambala lowu wunwani, kasi lezi zi fako zi fela ku mitiwa hi kuhanya.” (2 Kor. 5:4, Tradução do Novo Mundo.) A va mbhelelwangi hi litsako la kuhanya loku; a va naveli lezaku ku mbhela hi xihatla. Hi lisine va xuva nguvu ku tirisa siku ginwe ni ginwani kasi ku tirela Jehova na va hi zinwe ni vanghana vabye ni maxaka. Hambulezo, na ku nga khataliseki lezi va mahako, a va rivali a kutsumba ko ngangamela loku va nga nako hi xikhati lexi xa ha tako. — 1 Kor. 15:53; 2 Ped. 1:4; 1 Joh. 3:2, 3; Kuv. 20:6.

15. Zini zi nga hiko xikombiso xa lezaku a munhu i totilwe hi moya wa ku basa?

¹⁵ Kuzilava wa ti wutisa lezaku a wu amukelangi a xirambo lexo xo saseka ke. Loku u alakanya lezaku za koteka ku ngha u totilwe, ehleketa hi ziwutiso lezi za lisima. U ti wona  na u hiseka nguvu wutirelini ke? U mugonzi wa hombe wa Mhaka ya Nungungulu loyi a ranzako ku kela a “zilo zi etileko za Nungungulu” ke? (1 Kor. 2:10) U wonile makatekwa yo hlawuleka ya Jehova ntirweni wa wena wa kuxumayela? U na ni kuxuva ka hombe nguvu ka ku maha kuranza ka Jehova? Wa ti wona na u hi ni wutihlamuleli ga hombe nguvu ga ku vuna vanwani hi tlhelo ga moya? U wonile xitiyisekiso xo kari xa woko ga Jehova wutomini ga wena wutsumbu ke? Makunu, loku a hlamulo wa wena ka ziwutiso lezi a hi ina wo tiya, zi wula lezaku u nako a kuvitanwa ka le tilweni ke? Ahihi. Hikuyini? Hakuva lezo a zi humeleli ntsena lava va nga ni kuvitanwa ka le tilweni. A moya wa Jehova wu tira hi ndlela yaleyi ya yinwe ni ka lava va nga ni kutsumba ka ku hanya laha misaveni. Hi lisine loku u kari u ti wutisa lezaku xana a wu amukelangi a kuvitanwa ka le tilweni, lezo ha zoce xikombiso xa lezaku a wu vitaniwangi. Lava va vitanilweko hi Jehova a va ti wutisi lezaku va vitanilwe kutani a va vitaniwangi! Va zi tiva lezaku va vitanilwe!

16. Hi zi tivisa kuyini lezaku a hi vontlhe lava va amukelako moya wa Nungungulu va vitanilweko kasi kuya tilweni?

¹⁶ Lomu ka Mitsalo, hi kuma zikombiso zo tala za vavanuna va kukholwa lava va nga khumbiwa nguvu hi moya wa ku basa; hambulezo va wa nga hi nako a kutsumba ka ku ya hanya tilweni. Johani Mubapatizi munwe wabye. Jesu i mu dzunzile nguvu, kanilezi i wulile lezaku Johani i wa nga ta patsiwa Mufunweni wa le tilweni. (Mat. 11:10, 11) Davida yenawu i wa susumetiwa hi moya wa ku basa. (1 Sam. 16:13) I wa hi wanuna wa wumoya ga hombe niku i tlhelile a pimiselwa ku tsala zipanze za Biblia. (Mar. 12:36) Hambulezo, ka Pentekosta, Pedro i wulile lezaku Davida “a nga kanzihangi aya matilweni.” (Miti. 2:34) A moya wa ku basa wu tirile hi ndlela ya ntamu ka vanhu lavo, kanilezi a wu va nyikangi wukustumunyu go hlawuleka ga lezaku va hlawulilwe kasi ku ya hanya tilweni. Lezo a zi wuli lezaku xova kona xi nga va maha va nga ringanelwi. Zi wula lezaku Jehova i wa ta va vuxa kasi ku hanya paradiseni kwalaha misaveni. — Joh. 5:28, 29; Miti. 24:15.

17, 18. a) I nchachazelo muni lowu a kutala ka malanza ya Nungungulu ma wu rinzelako nyamutlha? b) Ziwutiso muni hi to wulawula hi zona ka nzima yi lanzelako?

¹⁷ A kutala ka malanza ya Nungungulu nyamutlha a ma na kuvitanwa ka le tilweni. Ma na ni kutsumba kunwe na Davida, Johani Mubapatizi, ni vavanuna vanwani ni vavasati vo tsumbeka va xikhatini xa kale. A ku fana na Abrahama, va rinzela ku hanya hasi ka lulamiselo ga Mufumo. (Maheb. 11:10) Xikhatini lexi xa magumo, laha misaveni kova ni misalela ntsena ya lava va hlawulilweko kasi ku ya hanya tilweni. (Kuv. 12:17) Lezo zi wula lezaku a kutala ka lava va 144.000 va hlawulilweko va sina va file na va tsumbekile.

¹⁸ Makunu lava va nga ni kutsumba ka ku hanya laha misaveni va fanele ku mu wonisa kuyini a munhu a ti wulako lezaku i na ni kutsumba ka le tilweni ke? Loku a wokari lomu bandleni ga wena a sangula kuga xibaba ni kunwa vinya Xilalelweni xa Hosi, u fanele ku maha yini? Xana u fanele ku karateka hi ku wona kuengeteleka ka ntsengo wa lava va ti wulako lezaku va na ni kuvitanwa ka le tilweni? A ziwutiso lezi zi ta hlamuliwa ka nzima yi lanzelako.