Ziwutiso za vagonzi
A xipimo 37 xa Ezekieli xi wulawula hi tinhonga timbiri ti tlhavinyetilweko ti maha yinwe. Zi wula yini lezo?
Hi ku tirisa muprofeti wakwe Ezekieli, Jehova i lo profeta lezaku a vanhu vakwe va wa ta tlhela Tikweni gi Tsumbisilweko niku va wa ta tlhela va bohana kota tiko ginwe. A xiprofeto lexo xi kombile kambe lezaku lava va khozelako Nungungulu masikwini yo gumesa va wa ta bohana kota vanhu vanwe.
Jehova i byelile muprofeti wakwe Ezekieli lezaku a teka tinhonga timbiri a tsala zokari. Ka yinwe, i wa fanele ku tsala ku: “Ya Juda ni vanghana vakwe xikari ka Israeli,” le’yinwani aku: “Ya Josefa, i nhonga ya Efraime ni vontlhe a vanghana vakwe xikari ka yindlu ya Israeli.” A tinhonga leto ti wa ta gumesa ti maha “nhonga yinwe” canjeni ga Ezekieli. — Ezekieli 37:15-17.
A gezu “Efraime” gi wula yini? A lixaka la ka Efraime hi lona li nga vuvumile nguvu mufunweni wa nwalungu wa Israeli wa khume ga tixaka. Hi lisine, a hosi yo sangula ya mufumo lowo, ku nga Jeroboamu, yi wa hi ya lixaka la ka Efraime. (Deuteronome 33:13, 17; 1 Tihosi 11:26) A lixaka lelo li tile hi ka Efraime, n’wana Josefa. (Mitsengo 1:32, 33) Josefa i wa nyikilwe makatekwa yo hlawuleka hi papai wakwe, Jakobe. Hikwalaho, zi wa fanela a kuva a “nhonga ya Efraime” yi yimela a khume ga tixaka leti ti nga wumba a mufumo wa nwalungu. Hi lembe ga 740 mahlweni ka Kristu, na za ha hi kule ni ku Ezekieli a profeta, a vaAssiria va lo hlula a mufumo wa nwalungu wa Israeli, va khoma vanhu vaya wukhumbini. (2 Tihosi 17:6) Anzhako ka malembe yo kari, a vaBabuloni va lo hlula a vaAssiria. Hikwalaho, a xikhati lexi Ezekieli a nga tsala xiprofeto xakwe xungetano hi tinhonga timbiri, a kutala ka vaIsraeli va wa hangalakele Mufunweni wa Babuloni.
Hi lembe ga 607 mahlweni ka Kristu, a vaBabuloni va lo hlula a mufumo wa le dzongeni wa Juda, va khoma vanhu vaya Babuloni. Za koteka kambe ku ngha va tekile ni wihi munhu wa mufumo wa nwalungu wa Israeli a nga sele. A tihosi ta Mufumo wa le dzongeni ti wa hi ta lixaka la ka Juda. A vapristi vonawu va wa hanya le Juda hakuva va wa tira tempeleni le Jerusalema. (2 Kronekele 11:13, 14; 34:30) Hikwalaho zi wa fanela kuva a nhonga “ya Juda” yi yimela a tixaka timbiri leti ti nga wumba a mufumo wa le dzongeni.
A tinhonga leti ta timbiri ti tlhavinyetilwe rini? Lezo zi mahekile hi lembe ga 537 mahlweni ka Kristu, a xikhati lexi a vanhu va mufumo wa le dzongeni ni wa nwalungu va nga suka wukhumbini va tlhela Jerusalema kasi ku ya aketa a tempeli. A tiko ga Israeli gi wa nga ha avanyiswangi. A vaIsraeli va lo vuxetela ku khozela Jehova na va hi zinwe. (Ezekieli 37:21, 22) A kubohana loko ku wa profetilwe kambe hi Isaya na Jeremia. — Isaya 11:12, 13; Jeremia 31:1, 6, 31.
Zini lezi a xiprofeto xa Ezekieli xi zi wulileko xungetano hi wukhozeli gi basileko? Xi wulile lezaku Jehova i ta maha ku vontlhe lava va mu khozelako ‘vava munwe.’ (Ezekieli 37:18, 19) Xana a xiprofeto lexi xa tatiseka masikwini ya hina? Ina. A xiprofeto lexi xi sangulile ku tatiseka hi 1919. Mahlweni ka lezo, Satani i wa zamile ku avanyisa a vanhu va Nungungulu va tshamisa zezo kala kupinzuka. Kanilezi hi 1919, va lo xaxametiswa hi kutsongwani-kutsongwani, va tlhela va patsiwa kambe.
Ka xikhati lexo, a kutala ka vanhu va Nungungulu va wa hi ni kutsumba ka kuva tihosi ni vapristi le tilweni zinwe na Jesu. (Kuvululelwa 20:6) Va wa fana ni nhonga ya Juda. Hambulezo, ku wa hi vanhu va tsongwani va nga hi ni kutsumba ko hanya kala kupinzuka laha misaveni. Laha a xikhati xi ngaya xi hunza, a ntsengo wa lava va nga ni kutsumba loko ko hanya laha misaveni wu lo engeteleka. (Zakaria 8:23) Va wa fana ni nhonga ya Josefa.
Nyamutlha a mitlawa leyi yi mu tirela zinwe Jehova. Yi na ni Hosi yinwe kambe, ku nga Jesu Kristu. Ka xiprofeto xa Ezekieli, ku wulawuliwa hi Jesu kota “nanza ga mina Davida.” (Ezekieli 37:24, 25) Jesu i khongelele valanzeli vakwe ka Dadani wakwe aku: “[Ngha] vontlhe va fela kuva munwe, kota lezi wena Dadani u nga ka mina, na mina nzi nga ka wena.” * (Wona tlhamuselo wa lahasi.) (Johani 17:20, 21) Jesu i tlhelile a profeta lezaku a ntlhambi wu tsongwani wa vapizani vakwe va totilweko wu wa tava “ntlhambi munwe” ni lava va “tiyivu tinwani.” (Johani 10:16) Kota lezi Jesu a zi wulileko, a vanhu vontlhe va Nungungulu nyamutlha va bohene, lava va rinzelako ku ya hanya tilweni ni lava va rinzelako ku hanya laha misaveni!
^ nzi. 10 A xikhati lexi Jesu a nga wulawula hi xiwoniso xa masiku yo gumesa, i hlawutele mifananiso yo tala ka vapizani vakwe. U ta wona lezaku i rangile hi ku wulawula hi “nanza gi tsumbekileko ni go tlhariha,” wu nga ntlawa wu tsongwani wa vamakabye va totilweko lava va nga wa ta rangela vanhu va Nungungulu. (Mateu 24:45-47) Hi kulanzela, i lo hlawutela mifananiso yi nga wulawula hi vatotilweko vontlhe. (Mateu 25:1-30) Hi magumo, i lo wulawula hi lava va nga wa ta seketela vamakabye va Kristu va tlhela va hanya kala kupinzuka laha misaveni. (Mateu 25:31-46) Hi kufanana, a xikhati lexi a xiprofeto xa Ezekieli xi nga sangula ku tatiseka xikhatini xa hina, xi wa tira ka lava va nga ni kutsumba ko hanya tilweni kuranga. Niku hambu lezi a khume ga tixaka ta mufumo wa Israeli ti kalako ti nga toloveli ku tiriswa kasi ku yimela lava va to hanya kala kupinzuka laha misaveni, a kubohana ku tlhamuselwako ka xiprofeto lexi ku hi alakanyisa a kubohana ku nga kona xikari kabye ni vatotilweko.
