1. Hlawutela ximaho xi kombako a lisima la ku tiva xikhati hi nga ka xona ni ku chela kota hi lezi zi mahekako. (Wona mufota laha hehla.)

A GOTSOVANYANO wu lava kusangula. A mukhomi wa xitshamu i yimile laha xiluvelweni a hoyozela vontlhe va nga kona. A wucenje ga sangula. A vaingiseli va zi tiva lezaku xikhati xa ku lava ko tshama kona. Va lava ku ingisela a wucenje lego go saseka niku va donela mari a tikanelo leti ti to vekiwa. Kanilezi kuzilava va kona va nga kala ku demba ndleve ka mukhomi wa xitshamu, kutani ku zizwa lezaku a wucenje gaba. Va simama va fambafamba kutani ku bhula ni vanghana vabye, a va zi woni ku a gotsovanyano wu sangulile. A xikombiso lexi xi komba lezi zi nga mahekako loku hi kohlwa a xikhati hi nga ka xona kutani lezi zi humelelako laha hi nga kona. Lexi xigonzo xa lisima ka hina hakuva zezanyana ku ta sangula ximaho xa hombe nguvu, niku xi fanele ku hi kuma na hi longile. Ximaho muni xalexo?

2. Hikuyini Jesu a nga byela vapizani vakwe lezaku va ‘rinzela’?

² Jesu Kristu i tlharihisile a vapizani vakwe lezaku va rinzela va tlhela va ti karatela ku ta kunwa hi “kugumesa ka tiko”  na va longile. I lo va byela lezi: “Tlharihani, mu rinzela ni ku khongela; hakuva a mu zi tivi lezaku xi tava xikhati muni.” Anzhako ka lezo, i lo va byela hi kuphindaphinda aku: “Rinzelani.” (Mateu 24:3; gonza Marku 13:32-37.) A matimu ya Mateu wonawu ma komba ku Jesu i tlharihisile vapizani vakwe hi mhaka leyi. I va byelile lezi: “Rinzelani, hakuva a mu gi tivi a siku legi yi ta ngata ha gona a Hosi ya nwina.” I lo phinda kambe aku: “Tshamani mu longile, hakuva a N’wana wa munhu wata hi xikhati lexi mu nga xi alakanyiko.” A tlhela a phinda aku: “Rinzelani, hakuva a mu gi tivi siku ni xikhati.” — Mateu 24:42-44; 25:13.

3. Hikuyini hi chelako kota hi xitlharihiso xa Jesu?

³ A Timboni ta Jehova ta chela kota hi xitlharihiso xa Jesu. Ha zi tiva lezaku hi hanya “xikhatini xa magumo” niku a “kuxaniseka ka hombe” ku ta sangula zezanyana! (Danieli 12:4; Mateu 24:21) Kota lezi Jesu a profetileko, a vanhu va Jehova va xumayela mahungu yo saseka ya Mufumo misaveni yontlhe. Ka xikhati xalexi xa xinwe, hi wona tiyimpi, mababyi, kutsekatseka ka misava, ni tindlala matlhelweni yo tala. Ku na ni pfilupfilu ya wukhongeli ni wugevenga ga hombe ku hunza kale. (Mateu 24:7, 11, 12, 14; Luka 21:11) Zalezi hi rinzela hi mahlo yo pswhuka a xikhati lexi Jesu a tota kasi ku ta tatisa a kungo ga Papai wakwe. — Marku 13:26, 27.

4. a) Hikuyini hi kholwako lezaku Jesu wa gi tiva a siku legi a Har–Magedoni yi to sangula hi gona? b) Hambu lezi hi nga tiviko a siku ga kusangula ka kuxaniseka ka hombe, zini hi nga tiyisekako hi zona?

⁴ Loku hi hi gotsovanyanweni, ha xi tiva a xikhati lexi a nzima yinwe ni yinwani yi sangulako hi xona. Hambulezo, a zi koteki ku tiva lezaku a kuxaniseka ka hombe ku ta sangula rini hi kukongoma. A xikhati a nga hi laha misaveni, Jesu i te: “Lego siku ni lexo xikhati a ku na munhu a zi tivako, hambu tingelosi ta tilo, hambu ni N’wana, sine Dadani yece.” (Mateu 24:36) Lisine ku lezi Jesu a nga yena a to rangela a Har–Magedoni, za koteka ku ngha makunu na a zi tiva ku a yimpi leyo yi ta sangula rini. (Kuvululelwa 19:11-16) Kanilezi hina a hi se gi tiva a siku kutani xikhati lexi a kugumesa ku to chikela hi xona. Hi xigelo lexo, za lisima nguvu kuva hi rinzela. Jehova i sina a bohile lezaku a kuxaniseka ka hombe ku ta sangula rini, niku siku ni siku hiya hi tshinela kusuhani. Ku “nga ta tindeka.” (Gonza Habakuka 2:1-3.) Hikuyini hi tiyisekako hi mhaka leyi?

5. Nyika xikombiso xa lezi a ziprofeto za Jehova zi tatisekisako zona hi xikhati xa zona.

⁵ A ziprofeto zontlhe za Jehova zi tatiseka hi xikhati xa zona! Hi xikombiso, ehleketa hi siku legi a nga tlhatlhisa hi gona a vanhu vakwe le Gipite. I mahile lezo hi 14 ka Nisani wa lembe ga 1513 mahlweni ka Kristu. Loku ku hunzile xikhati, Mosi i lo tsala lezi xungetano hi siku lego: “A kugumeseni ka 430 wa malembe, hi siku lego a mabandla wontlhe ya Jehova ma nga huma  tikweni ga Gipite.” (Eksodusi 12:40-42) A malembe lawo ya 430 ma sangulile hi 14 ka Nisani wa lembe ga 1943 mahlweni ka Kristu, a xikhati lexi a xitsumbiso xa Jehova xa ku katekisa a pswalo wa Abrahama xi nga sangula ku tira. (Va Le Galatia 3:17, 18) Anzhako ka xikhati xo kari, Jehova i lo byela Abrahama aku: “Zi tive khwatsi lezaku a pswalo wa wena wu tava valuveli a tikweni legi gi nga hiko gabye, va ta ya khoza; va ta xaniswa 400 wa malembe.” (Genesisi 15:13; Mitiro 7:6) A malembe lawo ya 400 ma sangulile hi lembe ga 1913 mahlweni ka Kristu a xikhati lexi Ixmaeli a nga sangula ku chepeta Isaka. Ma mbhelile ka siku legi Jehova a nga tlhatlhisa hi gona vaIsraeli le Gipite. (Genesisi 21:8-10; Va Le Galatia 4:22-29) Kunene, Jehova i vekile a siku legi a nga wa ta tlhatlhisa hi gona vanhu vakwe na ka ha kiyela mazana ya malembe!

6. Hikuyini hi nga tiyisekako lezaku Jehova i ta tlhatlhisa vanhu vakwe?

⁶ Joxua munwe wa vaIsraeli lava va nga tlhatlhiswa le Gipite. Anzhako ka malembe yo tala, i lo alakanyisa a vanhu aku: “Ma zi tiva khwatsi hi timbilu tontlhe ta nwina ni mihefemulo yontlhe ya nwina, lezaku ku hava ni ginwe gezu ka wontlhe magezu yo saseka lawa Jehova Nungungulu wa nwina a ma wulileko hehla ka nwina, ma nga kala ku maheka; kanilezi ma mahekile wontlhe, ku hava ni gezu ginwe gi wileko hasi.” (Joxua 23:2, 14) Jehova i tsumbisile ku tlhatlhisa vanhu vakwe kuxanisekeni ka hombe ni ku va nyika wutomi ga pinzukelwa misaveni yiswa. Niku hi nga tsumba ku lezo zi ta maheka. Hikwalaho, loku hi lava ku hanya misaveni yiswa, hi fanele ku rinzela.

7, 8. a) Wu wa hi wihi a ntiro wa varinzeli zikhatini za kale, niku lezo zi hi gonzisa yini? b) Nyika xikombiso xa lezi zi nga humelelako loku a varinzeli va etlela na va hi ntirweni.

⁷ Ha kuma xigonzo ka varinzeli lava va nga wonelela a madoropa zikhatini za kale. A kutala ka madoropa lawo, a ku patsa ni Jerusalema, ma wa bhiyelwe hi makhurisi yo tlakuka kasi a valala va nga kumi ko nghena hi kona. A varinzeli va wa tshama hehla ka makhurisi lawo, va wona a matlhelo wontlhe ya doropa lego. A varinzeli vanwani va wa tshama lomu tinyangweni ta doropa. Va wa fanele ku rinzela wusiku ni mumu, niku loku va wona nala na ata, va wa fanele ku tlharihisa vanhu lomu doropeni. (Isaya 62:6) Va wa li tiva a lisima la ku kala va nga etleli va tlhela va cuwukisa zontlhe zi mahekako. Loku va nga mahi lezo, zi wa koteka ku kufa vanhu vo tala. — Ezekieli 33:6.

⁸ Josefo, loyi a nga tsala matimu ya vaJuda, i lo tlhamusela lezi a vaRoma va nga zi kotisa zona ku nghena Jerusalema hi lembe ga 70 anzhako ka Kristu. A varinzeli va xipanze xo kari xa doropa lego va wa etlele. Kota wuyelo ga kona, a masochwa ya vaRoma ma lo zi kota ku nghena. Ma loya tempeleni, ma ya yi hisa ma tlhela ma lovisa Jerusalema gontlhe. Lexo xive xona xipanze xo gumesa ka kuxaniseka ka hombe nguvu ka tiko ga Juda.

9. Zini lezi a vanhu vo tala va kalako va nga zi tivi?

⁹ A mifumo yo tala nyamutlha yi veka masochwa ni michini ya ku wonelela ya ha hi ku humako kasi ku rinzela mimbhingano ya yona. A mifumo leyo yi wonelela ni wihi munhu kutani nchumu wu nga vekako tiko  gabye mhangweni. Kanilezi a yi zi tivi lezaku ku na ni mufumo wunwani wa ntamu nguvu le tilweni wu rangelwako hi Kristu Jesu. Zezanyana a mufumo lowo wu talwa yimpi ni mifumo leyi yi nga laha misaveni. (Isaya 9:6, 7; 56:10; Danieli 2:44) Hi rinzela siku lego hi mahlo yo pswhuka niku hi lava ku ta kunwa na hi longile. Hi xigelo lexo, hi chela kota hi ziprofeto za Biblia hi tlhela hi simama ku tirela Jehova hi kutsumbeka. — Tisimu 130:6.

10, 11. a) Hi fanele ku ti wonela yini, niku hikuyini? b) Xini xi ku tiyisako lezaku Satani wa maha vanhu va nga cheli kota hi ziprofeto za Biblia?

¹⁰ Hi nga alakanyela a murinzeli a mbhetileko wusiku gontlhe na a hanyanya. Ka tihora to gumesa, laha gi yako kuceni, zi mu karatela nguvu ku simama a hanyanya hakuva i karele nguvu. Hinawu hi hanya masikwini yo gumesa ya tiko legi. Laha hi yako hi tshinela kugumeseni, ziya zi hi karatela nguvu ku simama hi hanyanya. Gi tava khombo ga hombe loku ho tsanzeka ku rinzela zezi! A hi woneni zilo zinharu lezi zi nga hi mahako hi etlela.

¹¹ Satani i khohlisa vanhu. Hi yena “a hosana ya legi tiko.” Xikhatanyana mahlweni ka kufa kakwe, Jesu i lo alakanyisa vapizani vakwe hi mhaka leyi makhati manharu. (Johani 12:31; 14:30; 16:11) Satani i tirisa wukhongeli ga mawunwa kasi ku khohlisa vanhu. Hi zalezo zi mahako vanhu vo tala nyamutlha va nga cheli kota hi ziprofeto za Biblia lezi zi kombako ziku dlunya lezaku a kugumesa ka tiko legi ku laha kusuhani nguvu. (Zefania 1:14) Za woneka khwatsi lezaku Satani “i pfhupelisile a kupima ka lava va nga kholwiko.” (2 Va Le Korinte 4:3-6) Kota wuyelo ga kona, a xikhati hi zamako ku byela vanhu lezaku a kugumesa ka tiko ku tshinele niku zalezi Kristu wa fuma, a kutala kabye a va lavi ni ku zizwa. Ve ngalo: “Hunzani muya kunwani.”

12. Hikuyini hi nga faneliko ku tsika Satani a hi khohlisa?

¹² Hambu lezi a votala va kalako va nga khatali hi ziprofeto za Biblia, a hi faneli ku  va tsika va hi tsema hlana. Ha zi tiva ku hikuyini zi nga za lisima a ku rinzela. Paule i byelile vamakabye vakwe aku: ‘Nwina ma zi tiva khwatsi lezaku a siku ga Jehova gata.’ A engeta aku: “Gita kota khamba ni wusiku.” (Gonza 1 Va Le Tesalonika 5:1-6.) Jesu i lo hi tlharihisa aku: “Ngha mu tshama mu longile; hakuva a N’wana wa munhu i ta wuya hi xikhati mu nga xi alakanyiko.” (Luka 12:39, 40) Zezanyana Satani i ta khohlisa vanhu, a va maha va alakanya lezaku ku na ni kurula ni kutshamiseka lomu tikweni, vaku: “Matiko ma etlele, a ku na nchumu.” Ka xikhati xalexo, a siku ga Jehova gi ta chikela hi xitshuketi, va dzuka. Ahati hina ke? Loku hi lava ku ta kunwa na hi longile, na hi nga lavi ku khohliswa zinwe ni vanhu la’vanwani, hi fanele ku ‘rinzela, ni ku ti khoma.’ Hi xigelo lexo, hi fanele ku lera a Mhaka ya Nungungulu siku ni siku hi tlhela hi ehleketa hi lezi Jehova a hi byelako.

13. A moya wa tiko wu khumbisa kuyini a mapimo ya vanhu, niku hi nga potsisa kuyini ku kukuletwa hi wona?

¹³ A moya wa tiko wu pengisa mapimo ya vanhu. A vanhu vo tala nyamutlha va ti byela ku a va na xilaveko xa ku tiva Nungungulu. (Mateu 5:3) Va mbheta xikhati xabye ni ntamu na va lwela ku kuma zilo za tiko legi. (1 Johani 2:16) Ahandle ka lezo, nyamutlha ku na ni tixaka to tala nguvu ta zihungato ti kucako vanhu ku ranza ku ti tsakisa ni ku tatisa ni kwihi kunavela va nga nako. (2 Timote 3:4) A zilo lezo zi hambukisa vanhu ka lezi hakunene zi nga za lisima; a va cheli kota hi wunghana gabye na Nungungulu. Hi xigelo lexo, Paule i lo alakanyisa maKristu lezaku ma fanele “ku vuka wurongweni” hi ku nga rangisi kunavela kabye wutomini. — Va Le Roma 13:11-14.

14. Xitlharihiso muni hi xi kumako ka Luka 21:34, 35?

¹⁴ A hi lavi ku rangelwa hi moya wa tiko, kanilezi hi lava ku rangelwa hi moya wa Nungungulu. Hi ku tirisa moya wakwe, Jehova i hi vuna ku zwisisa khwatsi lezi zi to humelela zezanyana. (1 Va Le Korinte 2:12) ^[1] (Wona tlhamuselo le magumo ka nzima.) Kanilezi hi fanele ku ti wonela. Hambu zilo zo toloveleka zi nga hi colopetela ku tirela Jehova. (Gonza Luka 21:34, 35.) A vanwani va nga hi byela lezaku a hi tivi hi lezi hi kholwako lezaku hi hanya masikwini yo gumesa ya tiko legi. (2 Pedro 3:3-7) Kanilezi a hi faneli ku va tsika va hi mbheta ntamu. Ha tiyiseka lezaku a kugumesa ku laha nyongeni. Loku hi lava ku rangelwa hi moya wa Nungungulu, hi fanele ku tlhangana ni vamakabye va hina xontlhe xikhati.

15. Zini zi nga humelela Pedro, na Jakobe, na Johani, niku lezo zi nga mahekisa kuyini ka hina?

¹⁵ A kungambheleli ka hina ku maha lezaku zi hi karatela ku tshama hi tlharihile. Jesu i wa zi zwisisa ku a vanhu a va mbhelelangi niku va na ni gome. Ehleketa hi lezi zi nga maheka ka wusiku legi a nga  khonwa hi gona kasi a dawa. Hambu lezi a nga mbhelele, i wa zi tiva ku kasi ku simama a tsumbekile, i wa fanele ku kombela Papai wakwe lezaku a mu vuna. Jesu i lo kombela mupostoli Pedro, na Jakobe, na Johani lezaku va nga etleli a xikhati lexi a nga kari a khongela. Kanilezi va wa nga li zwisisi a lisima la ku tshama na va hanyanya. Va wa karele, niku va lo etlela. Jesu yenawu i wa karele, kanilezi i lo simama a hanyanya, a khongela ka Papai wakwe. A vapostoli vonawu na va mahile zalezo. — Marku 14:32-41.

16. Hi kuya hi Luka 21:36, Jesu i te hi fanele ku maha yini kasi hi zi kota ku ‘rinzela’?

¹⁶ Xini xi to hi vuna ku ‘rinzela,’ kasi a siku ga Jehova gi ta hi kuma na hi longile ke? Hi fanele kuva ni kuxuva ka hombe ka ku simama hi maha lezi zi faneleko. Kanilezi a hi lezo zoce. Masikwanyana mahlweni ka kufa kakwe, Jesu i byelile vapizani vakwe lezaku va fanele ku kombela Jehova xontlhe xikhati lezaku a va vuna. (Gonza Luka 21:36.) Kasi hi nga etleli xikhatini lexi xa magumo, hinawu hi fanele ku khongela ka Jehova xontlhe xikhati. — 1 Pedro 4:7.

17. Hi nga maha yini kasi a kugumesa loku ku to chikela zezanyana ku hi kuma na hi longile?

¹⁷ Jesu i te a kugumesa ku ta chikela “hi xikhati lexi mu nga xi alakanyiko.” (Mateu 24:44) Hikwalaho, hi fanele ku tshama na hi longile. Lexi a hi xikhati xa ku zama ku hanyisa lezi a tiko ga Satani gi nge zi ta hi nyika litsako. Lowo i noro ntsena. Kanilezi, hi ku tirisa Biblia, Jehova na Jesu va hi byela lezi hi nga rinzelisako zona. Hikwalaho, ngha hi chela kota hi ziprofeto za Biblia ni lezi zi tatisekisako zona. Ngha hi simama hi tshinela ka Jehova ni ku rangisa Mufumo wakwe wutomini ga hina. Hi ndlela leyo, a kugumesa ku ta ta hi kuma na hi longile. (Kuvululelwa 22:20) Hi zalezo zi lavekako kasi hi kuma wutomi!