1, 2. Mupostoli Paule i kombisile kuyini lezaku i wa bonga a tipswalo ta Nungungulu?

MUPOSTOLI Paule i wa wula hi kutlhatlheka aku: ‘A tipswalo ta Nungungulu a nzi nyikiwangi tona mahala.’ (Gonza 1 Va Le Korinte 15:9, 10.) I wa zi tiva khwatsi lezaku Nungungulu i wa mu mahele wuxinji ga hombe go kala gi nga mu ringani. Phela i wa hi muxanisi wa maKristu.

² Ka masiku yo gumesa ya wutomi gakwe, Paule i lo tsalela Timote aku: “Nza mu bonga Kristu Jesu a Hosi ya hina, loyi a nga nzi nyika ntamu, hakuva i nzi hlayile loyi a tsumbekileko, a nzi veka ntirweni wakwe.” (1 Timote 1:12-14) Wu wa hi ntiro muni? Paule i lo byela a madota ya bandla ga le Efesusi aku: “A nzi khatali nchumu hi kuhanya ka mina, a nzi wuli lezaku ku na ni lisima ka mina, kasi nza fela ku mbheta a kufamba ka mina, ni ntiro lowu nzi wu amukeleko hi ka Hosi Jesu, lezaku nzi kustumunya hi ivangeli ya tipswalo ta Nungungulu.” — Mitiro 20:24.

3. I ntiro muni wo hlawuleka lowu Paule a nyikilweko? (Wona mufota kusanguleni ka nzima.)

 ³ Yi wa hi “ivangeli” muni leyi Paule a nga xumayela, niku yi wa kombisa kuyini a tipswalo ta Jehova? Paule i byelile maKristu ya le Efesusi aku: “Mu zwile hi wunekwa ga tipswalo leti nzi nyikilweko tona hi kota ya nwina.” (Va Le Efesusi 3:1, 2) Jesu i byelile Paule lezaku a xumayela a ivangeli ka lava va nga kala va nga hi vaJuda. Zi wa koteka makunu ku a vanhu va matiko va maha xipanze xa Mufumo lowu wu nga mandleni ya Messia. (Gonza Va Le Efesusi 3:5-8.) Paule i xumayele hi kuhiseka niku i ma siyele xikombiso xi nene a maKristu nyamutlha. I kombisile lezaku a tipswalo ta Nungungulu laha kakwe a ti vangi ta mahala; a ti xakelwangi.

4, 5. Hikuyini hi nga wulako lezaku a ‘ivangeli ya Mufumo’ hi yona ivangeli ya “tipswalo ta Nungungulu”?

⁴ Xikhatini lexi xa magumo, a vanhu va Jehova va nyikilwe ntiro wa ku xumayela “a ivangeli . . . ya Mufumo . . . ka matiko wontlhe.” (Mateu 24:14) A ivangeli ya Mufumo hi yona “ivangeli ya tipswalo ta Nungungulu” kambe. Hi ndlela muni? A makatekwa wontlhe hi to nyikwa hi Mufumo wa Nungungulu hi ta ma kuma hi kota ya wunene ga Jehova. (Va Le Efesusi 1:3) Paule i bongile a tipswalo ta Jehova hi ku xumayela hi kuhiseka. Xana ha pimanyisa xikombiso xakwe? — Gonza Va Le Roma 1:14-16.

⁵ Ka nzima yi hunzileko, hi gonzile lezi hina vanhu va vaonhi hi vunekisako zona hi tipswalo ta Jehova hi tindlela to tsalangana. Kota lezi hi vunekileko nguvu, hi fanele ku gonzisa vanwani lezi Jehova a kombisisako zona a liranzo lakwe ni lezi va nga vunekisako zona. Hi tihi tindlela leti hi nga vunako hi tona vanwani lezaku va bonga tipswalo ta Nungungulu ke?

6, 7. A xikhati hi tlhamuselako a nzhiho ka vanhu, hi hangalasa a mahungu yo saseka ya tipswalo ta Nungungulu hi ndlela muni?

⁶ A vanhu vo tala nyamutlha a va tizwi nanzu loku va onha, hikwalaho a va zi zwisisi ku hikuyini a vanhu va lavako nzhiho. Seno kambe a ntsengo wa vanhu va zwisisako lezaku a wutomi gabye a gi va nyiki litsako wuya wu kula. Niku loku va nga se bhula ni Timboni ta Jehova, a vanhu vo tala a va zi tivi ku a xionho xini, kona xi va khumbisa kuyini, niku zini zi lavekako kasi va tlhatlhiswa ka xona. Anzhako ka ku zwisisa ku a xionho xini, a vanhu va timbilu ti nene va bonga hi ku tiva lezaku Jehova i rumele N’wana wakwe misaveni kasi ku ta hi tlhatlhisa ka xionho ni kufa. Jehova i mahile lezo hi kota ya liranzo lakwe la hombe ni tipswalo takwe. — 1 Johani 4:9, 10.

⁷ Wona lezi Paule a nga wula xungetano hi N’wana a ranzekako wa Jehova: “Hi kuma ha yena a kutirulwa ka hina hi kota ya nkhata wakwe, ku nga kutsetselelwa ka zihambuko za hina, hi ku ringana ni kutala ka tipswalo [ta Jehova].” (Va Le Efesusi 1:7) A muphahlo wa Kristu hi wona a xikombiso xa hombe xa liranzo la Nungungulu hi hina niku wu kombisa a wuhombe ga tipswalo Takwe. Za tangalisa a ku tiva lezaku loku hi kholwa ka muphahlo wa Jesu, hi  ta tsetselelwa zionho za hina hi tlhela hiva ni livalo li basileko! (Maheberu 9:14) Lawo hakunene mahungu yo saseka ma ringanako ku bhulela vanwani!

8. Hikuyini a vanhu va vaonhi va faneleko ku tlhela va tlhanganiswa na Nungungulu?

⁸ Loku a vanhu va nga kholwi ka muphahlo wa Jesu, Nungungulu i va wona kota valala. Hikwalaho, hi na ni ntiro wa ku va byela lezaku va nga maha vanghana va Nungungulu. Mupostoli Johani i tsalile lezi: “Loyi a kholwako ka N’wana i na ni wutomi ga pinzukelwa; kanilezi loyi a nga ingisiko N’wana a nga ta wona wutomi, hakuva a khulo ga Nungungulu gi tshamile hehla kakwe.” (Johani 3:36) Ha tsaka hi ku tiva lezaku a muphahlo wa Kristu wu hi vululela ndlela ya ku maha vanghana va Nungungulu. Paule i zi tlhamusele hi ndlela leyi: “Na nwina lava mu nga hambukile kakwe xikhatini xa kale, mu hi valala kupimeni ka nwina hi mitiro ya nwina ya kubiha. kanilezi makunu i mu tlhanganyisile naye mirini wa nyama yakwe hi kufa kakwe.” — Va Le Kolosi 1:21, 22.

9, 10. a) I ntiro muni lowu Kristu a nyikileko vamakabye vakwe va totilweko? b) A “tiyivu tinwani” ti vunisa kuyini a vatotilweko?

⁹ Kristu i nyikile vamakabye vakwe va totilweko laha misaveni “a ntiro wa kutlhanganyisa.” Paule i va byelile lezi: “Zontlhe lezi zita hi ka Nungungulu, loyi a hi tlhanganyisileko naye hi Kristu, a hi nyika a ntiro wa kutlhanganyisa, hakuva Nungungulu i wa hi ka Kristu loku a tlhanganyisa tiko zinwe naye, lezaku a nga ha va hlayeli a zihambuko zabye; makunu i hi nyikile a mhaka ya kutlhanganyisa. Hikwalaho hina hi mitsumi ya Kristu, hi Nungungulu a mu khongotelako ha hina; ha mu khongotela hi kota ya Kristu, ngha mu tlhanganyiswa ni Nungungulu.” — 2 Va Le Korinte 5:18-20.

¹⁰ Lava va “tiyivu tinwani” va na ni lungelo ga ku vuna vatotilweko ntirweni lowo. (Johani 10:16) Kota “mitsumi” ya Kristu, kutani zirunwa zakwe, a “tiyivu tinwani” ti maha a xipanze xa hombe xa ntiro wa kuxumayela, ti gonzisa vanhu a lisine ni ku va vuna kuva ni wunghana gi nene na Jehova. Lexo xipanze xa lisima xa ntiro wa ku xumayela a ivangeli ya tipswalo ta Nungungulu.

11, 12. Hikuyini ma nga mahungu yo saseka ka vanhu a ku tiva lezaku va nga khongela ka Jehova ke?

¹¹ A vanhu vo tala va khongela kasi ku susa zikarato hlokweni, kanilezi a va kholwi lezaku Nungungulu hakunene wazwa mikhongelo yabye. Va fanele ku tiva lezaku Jehova ‘Muzwi wa mikhongelo.’ Muyimbeleli Davida i tsalile lezi: “Wena loyi u  zwako mikhongelo, a nyama yontlhe yi tata ka wena. A zigoho zi nzi binzela mina, kanilezi u ta tsetselela a zihambuko za hina.” — Tisimu 65:2, 3.

¹² Jesu i byelile vapizani vakwe aku: “Loku mu kombela xa nchumu hi vito ga mina, nzi ta xi maha.” (Johani 14:14) Lezo zi wula lezaku hi nga kombela ni wihi “nchumu” wu zwananako ni kuranza ka Jehova. Johani i tsalile lezi: “A kutsumba loku hi nga nako ka yena hi loku, kaku i ta hizwa loku hi kombela nchumu lowu wu yelanako ni kuranza kakwe.” (1 Johani 5:14) Zi nene nguvu ku vuna vanhu lezaku va zwisisa ku a mukhongelo a wu susi zikarato hlokweni ntsena; kanilezi i ndlela ya ku tshinela ka Jehova “xitshanwini [xakwe] xa wuhosi xa tipswalo.” (Maheberu 4:16) Loku hi gonzisa vanhu a ku khongela hi ndlela yi faneleko, ka Munhu a faneleko, ni ku kombela zilo zi faneleko, hi va vuna ku maha vanghana va Jehova ni ku kuma kuchavelelwa loku va xaniseka. — Tisimu 4:1; 145:18.

13, 14. a) I lungelo muni go saseka nguvu legi a vatotilweko va tova nago xikhatini xi tako? b) I ntiro muni wo hlawuleka lowu a vatotilweko va to mahela vanhu?

¹³ Jehova i ta kombisa tipswalo takwe hi ndlela yi anzileko nguvu “zikhatini lezi za ha tako.” Hi ndlela muni? Nungungulu i ta va nyika lungelo go saseka nguvu lava va 144.000 va to fuma na Kristu le tilweni. Paule i tlhamusele lungelo lego laha a nga tsala lezi: “Nungungulu loyi a teleko wuxinji, hi kota ya liranzo lakwe la hombe leli a hi ranzileko ha lona, i lo hi hanyisa zinwe na Kristu laha hi nga file hi kota ya zihambuko za hina (mu hanyisilwe hi tipswalo). I lo hi vuxa zinwe naye, ni ku hi tshamisa zinwe naye le tilweni ka Kristu Jesu, lezaku a zikhatini lezi za ha tako a fela ku kombisa a wukulu ga hombe ga tipswalo takwe, hi wunene gakwe legi a hi maheleko gona nzeni ka Kristu Jesu.” — Va Le Efesusi 2:4-7.

¹⁴ Za karata ku alakanyela a zilo zo saseka lezi Jehova a vekeleko maKristu ma totilweko lezi ma to ya zi kuma a xikhati lexi ma to fuma na Kristu le tilweni. (Luka 22:28-30; Va Le Filipi 3:20, 21; 1 Johani 3:2) Jehova i ta “kombisa a wukulu ga hombe ga tipswalo takwe” ka vatotilweko hi ndlela yo hlawuleka. Va ta wumba “Jerusalema giswa,” a muswika wa Kristu. (Kuvululelwa 3:12; 17:14; 21:2, 9, 10) Va ta tira na Jesu kasi “ku holisa matiko.” Va ta vuna vanhu lezaku tlhatlheka ka nzhwalo wa xionho ni kufa va tlhela va va vuna ku kuma kumbhelela. — Gonza Kuvululelwa 22:1, 2, 17.

15, 16. Jehova i ta kombisa kuyini tipswalo takwe ka “tiyivu tinwani” xikhatini xi tako?

¹⁵ Va Le Efesusi 2:7 i wula lezaku Nungungulu i ta kombisa tipswalo “zikhatini lezi za ha tako.” Ka xikhati lexo, a vanhu  vontlhe laha misaveni va ta vuneka hi “wukulu ga hombe ga tipswalo takwe.” (Luka 18:29, 30) A yinwe ya tindlela leti Jehova a to kombisa hi tona tipswalo takwe laha misaveni ku vuxa vanhu “zilahleni.” (Joba 14:13-15; Johani 5:28, 29) Hi vamani va to vuxiwa? Vavanuna ni vavasati vo tsumbeka lava va ngafa na Kristu a nga sefa ni vanhu va “tiyivu tinwani” lava va fako na va tsumbekile ka Jehova masikwini yo gumesa. A vanhu vontlhe lavo va kukholwa va ta vuxiwa kasi va simama ku tirela Jehova.

¹⁶ A vanhu va timiliyoni lava va ngafa na va nga mu tivi Nungungulu, vonawu va ta vuxiwa. Johani i tsalile lezi: “Nzi lo wona a vafileko, lava vahombe ni vatsongwani, na va yimile mahlweni ka xitshamu xa wuhosi, ku lo vululwa mabhuku. Ku lo vululwa ginwani bhuku gi nga bhuku ga wutomi; ni vafileko va lo lamulwa hi lezi zi tsalilweko mabhukwini hi mitiro yabye. A bimbi gi lo humesa a vafileko lava va nga hi ka gona, a lifu ni wutshamu ga vafileko zi lo humesa lava va nga hi ka zona; zonake munwe ni munwani i lo lamulwa hi mitiro yakwe.” (Kuvululelwa 20:12, 13) A vanhu lavo va to vuxiwa va tava ni lungelo ga ku gonza xungetano hi Jehova ni ku vumela a kufuma kakwe. Va ta gonza matshinya ya milayo ya Biblia ni zileletelo ziswa zi nga lomu “mabhukwini” va tlhela va hanya hi zona. A zileletelo lezo zi tava ndlela yinwani leyi Jehova a to kombisa hi yona tipswalo takwe.

17. Zini hi nga faneliko ku zi rivala a xikhati lexi hi xumayelako?

¹⁷ Zalezi za lisima nguvu ku hunza kale a ku xumayela mahungu yo saseka ya Mufumo hakuva a kugumesa ku laha kusuhani nguvu! (Marku 13:10) Hi fanele ku alakanya lezaku a kungo ga hina a xikhati hi xumayelako ku dumisa Jehova. Hi nga zi mahisa kuyini lezo? Hi fanele ku byela vanhu lezaku a makatekwa wontlhe lawa hi to ma kuma misaveni yiswa ma koteka ntsena hi kota ya tipswalo ta Jehova.

18, 19. Hi dumisa tipswalo ta Jehova hi ndlela muni?

¹⁸ A xikhati hi xumayelako vanhu, hi nga va tlhamusela lezaku a xikhati lexi a Mufumo wa Kristu wu to fuma, a vanhu va ta amukela makatekwa wontlhe ya nzhiho niku va taya va mbhelela hi kutsongwani-kutsongwani. A Biblia gi ngalo: “A zivangwa zi ta tirulwa wukhumbini ga kubola zi enghena kutlhatlhekeni ka kungangamela ka vana va Nungungulu.” (Va Le Roma 8:21) Lezo zi ta koteka ntsena hi kota ya tipswalo ta Jehova.

¹⁹ Hi na ni lungelo ga ku byela vanhu vontlhe xungetano hi xitsumbiso xo tsakisa nguvu xi nga ka Kuvululelwa 21:4, 5, xaku: “[Nungungulu] i ta kulula mihloti yontlhe mahlweni yabye. Ku nga ha ta va kona kufa, hambu ni hlomulo, kutani kurila ni kubayisa; hakuva a zilo zo sangula zi hunzile.” Niku Jehova, loyi a tshamileko xitshanwini xa wuhosi, i ngalo: “Langutani nzi maha zilo zontlhe ziva ziswa.” A tlhela aku: “Tsala, hakuva leti timhaka ti tsumbekile ti nene.” Loku hi xumayela mahungu lawo yo saseka ka vanwani hi kuhiseka, hi dumisa a tipswalo ta Jehova hakunene!