XINI xi nga ku tiyisako lezaku hakunene Jehova wa ku khatalela? A xinwe xa zigelo hi lezi a Biblia gi wulako lezo hi kukongoma. Pedro wo ranga 5:7 i ngalo: “Vekani hehla ka yena kontlhe a kukarateka ka nwina, hakuva wa mu khatalela.” Zikombiso muni zi ku tiyisako lezaku Jehova Nungungulu wa khatala hi wena?

Nungungulu i na ni matshamela lawa u nga wa ta ma lava ka vanghana va wena va hombe. A vanhu va mahelanako wunene ni ku nyikana zilo va tolovela ku maha vanghana va hombe. Kota lezi zi nga fihlaliko, Jehova i mahela vanhu a wunene ni ku va nyika zilo siku ni siku. Wona xikombiso xinwe: “Wa tsuwukisa gambo gakwe hehla ka vobiha ni ka vosaseka, a nisa vula hehla ka valulamileko ni ka va nga lulamangiko.” (Mat. 5:4) Zini zi mahiwako hi kuwoninga ka gambo ni vula? Xikari ka zilo zo tala zi mahiwako hi zona, Nungungulu i ‘xurisa vanhu hi zakuga, a tatisa timbilu tabye hi kutsaka.’ (Miti. 14:17) Jehova i maha lezaku a misava yi humesa zakuga zo tala, niku zilo zi tsongwani zi hi mahako hi tsaka nguvu a ku hunza zakuga zo nanziha.

Makunu hikuyini a votala va fako hi ndlala? Hi lezi a tihosi ti lwelako ku fuma ni ku lava mali wutshanwini go vuna vanhu lezaku va hanya khwatsi. Lokuloku Jehova i ta susa xikarato lexo hi ku valeta mifumo ya xikhati lexi hi Mufumo wa le tilweni, lowu a Hosi ya kona ku nga N’wana wakwe. Ka xikhati lexo, i hava a to xaniseka hi ndlala. Kanilezi hambu zalezi Nungungulu wa wundla  malanza yakwe yo tsumbeka. (Tis. 37:25) A hi xikombiso xa kukhatala kakwe lexo ke?

A munghana mu nene wa ti nyika xikhati xo tshama na wena. A nga ha mbheta xikhati xo tala na a bhula na wena hi zilo mu zi ranzako hi wumbiri ga nwina. Niku loyi a nga munghana mu nene wa demba ndleve loku u mu hlawutela zikarato za wena. Jehova ke, wa demba ndleve hi ndlela leyo? Handle ko kanakana! Wa ingisa mikhongelo ya hina. Hikwalaho, a Biblia gi hi kuca ku ‘simama hi tiyile kukhongeleni,’ ni ku ‘khongela hi nga tsiki.’ — Rom. 12:12; 1 Tes. 5:17.

Jehova i tsakela ku mbheta xikhati xo kota kwihi na a ingisela mikhongelo ya wena? Ha kuma hlamulo ka xikombiso xo kari xi nga lomu ka Biblia. Laha a nga lava ku hlawula vapostoli vakwe, Jesu i lo “simamisa wusiku gontlhe a khongela ka Nungungulu.” (Luka 6:12) Ka mukhongelo lowo kuzilava Jesu i kumbukile vapizani vakwe vo tala hi mavito, a ehleketa hi matshamela ni gome gabye, a gumesa a kombela Papai wakwe lezaku a mu vuna ku va hlawula. Laha gi ngaca ku sangula ku huma gambo, Jesu i wa zi tiva lezaku i hlawulile lava va nga ringanelwa khwatsi hi ku maha vapostoli vakwe. Jehova loyi a “zwako mikhongelo,” wa xalala hi ku ingisela mikhongelo yontlhe yi humako mbilwini. (Tis. 65:2) Hambu loku a munhu a mbheta xikhati xo leha na a khongela hi nchumu wu mu karatako nguvu, Jehova a nga mu tsemarisi.

Loku zita mhakeni yo tsetselela, hambu vanghana va hombe za tshuka zi va karatela. Ka zikhati zinwani, a vanhu va tsema wunghana ga mawongwe hi kuva zi va nonohela ku tsetselelana. Jehova a nga tshamisangi lezo. A Biblia gi ramba vanhu vontlhe va timbilu ti nene lezaku va kombela ku tsetselelwa hi yena, “hakuva i ta tsetselela hi matsenya.” (Isa. 55:6, 7) Xini xi kucako Nungungulu lezaku a tsetselela hi matsenya?

A xinwe xa zigelo liranzo lakwe la hombe. I lo ranza nguvu tiko laha ka kuza a nyikela N’wana wakwe, Jesu, kasi ku tlhatlhisa vanhu ka xionho  ni makhombo ma nehiwako hi xona. (Joh. 3:16) Hi lisine, a nzhiho wu maha zo hunza lezo. Hi ku tirisa muphahlo wa Kristu, Jehova i tsetselela hi matsenya vontlhe a va ranzako. Mupostoli Johani i lo tsala lezi: “Loku hi vumela a zionho za hina, Nungungulu i tsumbekile ni kululama, lezaku a hi tsetselela a zionho za hina.” (1 Joh. 1:9) Hi kota ya lezi Jehova a tsetselelako, a vanhu va nga zi kota ku simama vava vanghana vakwe, niku a ku tiva lezo zi khumba nguvu mbilu ya hina.

A munghana wa lisine wa vuna vanwani loku va lava ku vuniwa. Ahati Jehova ke, yenawu wa maha lezo? A Mhaka yakwe yi ngalo: “Hambu loku awa [loyi a nga nanza ga Nungungulu], a nga ta wela magumo, hakuva Jehova i mu khomile hi woko.” (Tis. 37:24) Jehova i ‘khoma woko ga malanza yakwe’ hi tindlela to tala. Wona tshango gi lanzelako ga le xihlaleni xa Caribe, Santa Cruz.

A nhanyana wo kari i wa vangelwa zikarato hi zigonzani-kulobye hi lezi a nga kala ku bayethela mujeke hi kota ya wukhongeli gakwe. Anzhako ka ku kombela Jehova lezaku a mu vuna, i lo boha ku yimisana ni mhaka leyo. Ka ntiro wu nga lanzela va nga nyikwa ka aula go kari, i lo hlawula ku wulawula hi ku bayethela mujeke. Na a tirisa Bhuku Ga Mina Ga Mahungu Ya Biblia, i lo tlhamusela lezi a matimu ma wulawulako hi Xadraque, Mexake, na Abed-nego ma nga yelanisa zona ni xiboho xakwe. I te ngalo: “Jehova i lo vikela a vaHeberu lavo va vanharu hi lezi va nga ala ku khozela xifananiso.” A gumesa a humesa bhuku lego kasi ku nyika lava va nga hi kona. A 11 wa zigonzani-kulobye zi lo teka. Hi ku wona lezaku Jehova i mu nyikile ntamu ni wutlhari kasi ku nyika wukustumunyu hi mhaka leyo yo karata, a nhanyana loye i lo tsaka nguvu.

Loku u tshuka u kanakana lezaku Jehova wa ku khatalela, ehleketa hi mitsalo yo kota Tisimu 34:17-19; 55:22; ni 145:18, 19. Wutisa vanhu va nga ni malembe yo tala na va hi Timboni lezaku Jehova i va khatalelisa kuyini. Niku loku u lava ku vuniwa hi Nungungulu, mu byele mhaka ya wena hi mukhongelo. Zalezo u ta wona lezi Jehova a ku ‘khatalelisako’ zona.