1-3. a) Zini lezi kuzilava zi mahekileko ka Evodia na Sintike? b) Hi nga maha yini kasi ku potsa zikarato za tshamela lego? (Wona mufota laha hehla.)

HA GI nyika nguvu lisima a Biblia hakuva ha zi tiva lezaku i Bhuku ga Nungungulu. A Biblia gi na ni wusungukati gi hi vunako ku potsa zikarato, gi tlhela gi hi luleka loku hi maha zihoxo. Makunu hi maha yini loku gi hi nyika wusungukati? Ehleketa hi vavasati vambiri va totilweko va nga hanya ka zana ga malembe go sangula, Evodia na Sintike. A Biblia gi wula lezaku va wa nga zwani, kanilezi a gi hi byeli xigelo xa kona. A hi alakanyeleni lezi zi kotekako ku ngha zi mahekile.

² Kuzilava Evodia i rambile vamakabye vo kari kasi ku taga navo laha kaya. Kanilezi a nga rambangi Sintike. Hi nzhako ka xikhati, Sintike i lozwa vanwani na va bhula hi lezi zi nga nanzihisa zona zakuga lezo, a se zangara nguvu. Za koteka ku a ti wutisile lezi: ‘Za maheka futsi ku Evodia a nga nzi rambi? Kasi a hi vanghana?’ Sintike i alakanyile ku Evodia a nga mu rambangi hi ku kala a nga mu ranzi. Makunu Sintike i lo ramba vanhu valavo va nga rambilwe hi Evodia kasi a taga navo kanilezi a nga rambangi Evodia! Kuzilava a xiyimo lexi xi karatile vanwani lomu bandleni. A Biblia gi komba  ku Paule i kawukile vamakabye lavo va vambiri a tlhela a va kuca kuva va zwanana. Za koteka ku va mu ingisile va simama va tirela Jehova na va tsakile. — Va Le Filipi 4:2, 3.

³ Ni nyamutlha kambe, hi nga tshuka hiva ni zikarato ni makabye wo kari lomu bandleni. Kanilezi loku hi lanzela a wusungukati gi nga lomu ka Biblia, hi nga lulamisa zikarato lezo, hambu ku zi potsa. Niku loku hi ingisa lezi a Biblia gi wulako, hi komba ku hakunene ha gi nyika lisima a Bhuku ga Jehova. — Tisimu 27:11.

4, 5. A Biblia gi hi nyika wusungukati muni xungetano hi ku ti khoma?

⁴ A hi xontlhe xikhati zi olovako ku ti khoma. Hi nga ha zangara nguvu loku a wokari a hi rukatela kutani ku hi mahela kubiha, kuzilava hi kota ya mahanyela ya lomu hi tako hi kona, hlonge ya hina kutani matshamela ya miri wa hina. Niku zi nga hi bayisa nguvu loku a munhu loye a hi rukatelako kutani a hi mahelako kubiha a hi makabye. Wusungukati muni hi gi kumako lomu ka Mhaka ya Nungungulu gi nga hi vunako?

⁵ Jehova wa zi tiva lezi zi nga humelelako loku a munhu a nga ti khomi. Loku hi zangarile hi nga tshuka hi wula kutani ku maha zilo hi gumako hi ti sola hi zona. Lomu ka Biblia, Jehova i hi gonzisa ku ti khoma, aku: “U ngave ni moya wa ku hatlisela ku zangara.” Hi nga alakanyela a zikarato zo tala hi zi potsako loku hi ingisa a wusungukati lego ga ku nga hatliseli ku zangara! (Gonza Mutshawuteli 7:9; Mavingu 16:32.) A Biblia gi tlhela gi hi byela ku hi tsetselela vanwani kambe. Jesu i te loku hi nga tsetseleli vanwani, Jehova yenawu a nga ta hi tsetselela. (Mateu 6:14, 15) Xana wa kombisa lihlaza-mbilu u tsetselela vanwani kutani za lava ku u chukwatisa zokari mhakeni leyi?

6. Zini zi nga humelelako loku hi nga ti khomi?

⁶ Loku hi nga ti khomi, hi nga tshama ni xiviti hambu kuza hi venga munwani. Hi nga tshuka hi maha vanwani kambe lomu bandleni vava ni tshamela lego. Loku hi tshama ni xiviti, hambu loku hi zama ku fihla, a vanwani va ta gumesa va zi pola. Kota wuyelo ga kona, a vamakabye va nga sangula ku fambela kule na hina. (Mavingu 26:24-26) A madota ma ta tirisa Biblia kasi ku zama ku hi vuna ku ti tlhatlha ka zanga ni xiviti kasi hi tsetselela vanwani. (Levi 19:17, 18; Va Le Roma 3:11-18) Loku ma hi vuna, xana hi ta lanzela zileletelo zi nga ka Mhaka ya Jehova?

7, 8. a) Jehova i va rangelisa kuyini vanhu vakwe? b) Zileletelo muni hi zi kumako lomu ka Biblia, niku hikuyini hi faneleko ku zi lanzela?

⁷ Inyamutlha Jehova i rangela vanhu vakwe va nga laha misaveni a tlhela a va gonzisa. Hi ndlela muni? I yimisile Kristu lezaku a maha “hloko ya bandla,” niku Kristu i yimisile “nanza gi tsumbekileko ni go tlhariha” lezaku gi gonzisa ni ku rangela vanhu va Nungungulu. (Va Le Efesusi 5:23; Mateu 24:45-47) A ku fana ni hubye yi fumako ya zana ga malembe go sangula, a nanza legi gi nyika nguvu lisima a Biblia hi kota ya lezi gi nga Mhaka ya Nungungulu. (Gonza 1 Va Le Tesalonika 2:13.) Zileletelo muni hi zi kumako lomu ka Biblia?

 ⁸ A Biblia gi hi byela ku hi fanele kuya mitlhanganweni hi kukhanzakanya. (Maheberu 10:24, 25) Gi kuca hontlheni lezaku hi kholwa tigonzo taleti ta tinwe ti gonzisiwako hi Biblia. (1 Va Le Korinte 1:10) Gi tlhela gi hi byela ku hi fanele ku ‘lava Mufumo kuranga.’ (Mateu 6:33) A Biblia gi hi leletela ku xumayela hi muti ni muti, lomu ku hunzahunzako nguvu vanhu, ni kontlhe ku nga ni vanhu. (Mateu 28:19, 20; Mitiro 5:42; 17:17; 20:20) Gi leletela madota lezaku ma hlayisa bandla kasi gi tshama gi basile. (1 Va Le Korinte 5:1-5, 13; 1 Timote 5:19-21) Gi hi byela kambe lezaku hi fanele ku tshama hi basile mirini wa hina hi tlhela hi potsa ku alakanyela kutani ku maha zilo zi vengiwako hi Jehova. — 2 Va Le Korinte 7:1.

9. Himani loyi Jesu a mu yimisileko lezaku a hi vuna ku zwisisa a Mhaka ya Nungungulu?

⁹ A vokari va nga ha alakanya lezaku a ku laveki munhu lezaku a va tlhamusela Biblia. Kanilezi kusukela hi 1919, Jesu i tirisa “nanza gi tsumbekileko ni go tlhariha” kasi ku vuna vanhu va Nungungulu lezaku va zwisisa lezi a Biblia gi zi gonzisako va tlhela va zi lanzela. Loku hi ingisa Biblia, a bandla gi ta tshama gi basile, gi hi ni kurula, gi tlhela gi hi ni kuzwanana. Ti wutise lezi: ‘Nzi ta tsumbeka ka Jesu, nzi lanzela zileletelo za nanza gi tsumbekileko ke?’

10. A bhuku ga Ezekieli gi tlhamuselisa kuyini a xipanze xa le tilweni xa hlengeletano ya Jehova?

¹⁰ Lomu ka Biblia hi gonza hi tiva lezaku a malanza ya Jehova ya le tilweni wonawu ma xaxametilwe khwatsi. Hi xikombiso, Ezekieli i wonile muwoniso wa Jehova na a fambisa kareta yo tsutsuma nguvu yi nga zi kota ku djika yiya ni kwihi laha Jehova a nga ku lava. (Ezekieli 1:4-28) A kareta leyo yi yimela a xipanze xa le tilweni xa hlengeletano ya Jehova, lexi xi tekelako ku lanzela zileletelo zakwe. Lezo zi khumba a xipanze xa laha misaveni xa hlengeletano yakwe. Ehleketa hi kucica loku ku nga maheka hlengeletanweni ya Nungungulu ka khume ga malembe kuta seno. Alakanya lezaku hi Jehova a rangelako a kucica loko. Zezanyana Kristu ni tingelosi va ta lovisa tiko legi go biha. Ku nga ta hava ni munhu a to chakisa Jehova ni vito gakwe hambu ku sola mafumela yakwe!

11, 12. Zini lezi a hlengeletano ya Jehova yi zi mahako masikwini lawa yo gumesa?

¹¹ Ehleketa hi lezi a hlengeletano ya Jehova yi zi mahako masikwini lawa yo gumesa. Kuaka. A mazanazana ya vamakabye va xinuna ni va xisati va tirile hi kutikarata kasi ku aka tsinza giswa ga Timboni ta Jehova le Warwick, Nova York, Estados Unidos. A vatiri vanwani va kuziranza va makume ya mazana misaveni yontlhe va kari va aka tiSalawu ta Mufumo ni tihofisa ta ravi. A vatiri lavo va kuziranza va rangelwa hi Xipanze xa ku tsala miako ni ku aka misaveni  yontlhe. Ha va bonga nguvu a vamakabye vo tala va tirako hi kutikarata kuakeni loko! Niku ka matshamu wontlhe a vanhu va Jehova va maha zontlhe zi nga ntanwini wabye kasi ku vuna ku hakhela lezi zi lavekako kuakeni loko. Jehova wa katekisa a vanhu vakwe hi kutikoramisa kabye ni kutsumbeka loku va ku kombisako.— Luka 21:1-4.

¹² Gonziselelo. Jehova wa zi ranza ku gonzisa vanhu vakwe. (Isaya 2:2, 3) Ehleketa hi zikola hi nga nazo. Ku na ni Xikola xa Ntiro wa Wuphayona, Xikola xa Vavangeli va Mufumo, Xikola xa Gileade, Xikola xa Lava va ha hi ku Chikelako Beteli, Xikola xa Vawoneleli va Xipanze ni Vasati Vabye, Xikola xa Madota ya Bandla, Xikola xa Wutireli ga Mufumo, ni Xikola xa Ziro za Kometi ya Ravi ni Vasati Vabye. Niku lomu ka saite ya hina ya jw.org ku na ni Biblia ni mabhuku manwani hi tirimi to tala. A saite ya hina kambe yi na ni xipanze xa vanana ni xa mingango, ni xipanze xa ku haxa mahungu. Wa tirisa saite jw.org ka wukhozeli ga ngango ni xikhati u xumayelako ke?

13. Zini lezi a vanhu va Jehova va faneleko ku maha?

¹³ I lungelo ga hombe a ku lumba hlengeletano ya Jehova ni ku tiva lezi a zi lavako ka hina! Kota lezi hi tivako lezi zi tsakisako Nungungulu, hi fanele ku mu ingisa, hi maha lezi zi lulamileko. Niku hambu lezi a vanhu vo tala va ranzako ku maha zilo za kubiha, hina hi fanele ku ‘venga kubiha,’ a ku fana na Jehova. (Tisimu 97:10) A hi faneli ku tshuka hi fana ni lava “va wulako zo biha lezaku zi sasekile, a zo saseka vaku zi bihile.” (Isaya 5:20) Hi lava ku tsakisa Jehova, hikwalaho hi ti yimisele ku tshama hi basile hi matlhelo wontlhe. (1 Va Le Korinte 6:9-11) Lezi Jehova a hi byelako lomu ka Biblia za hi vuna. Ha mu ranza niku hi lava ku tsumbeka mahlweni kakwe. Hikwalaho hi ingisa zileletelo zakwe laha kaya, lomu bandleni, le ntirweni, le xikoleni, kutani ni kwihi hi nga kona. (Mavingu 15:3) Ehleketa hi zipanze zo kari zi lavako lezaku hi tsumbeka ka Nungungulu.

14. A vapswali va nga kombisa kuyini lezaku va tsumbeka ka Jehova?

¹⁴ Ndlela yo gonzisa vana va hina. Lomu ka Biblia Jehova i nyika vapswali a zileletelo xungetano hi lezi va faneleko ku gonzisisa zona a vana vabye. A maKristu ma fanele ku ti wonela lezaku ma nga nghenelwi hi mapimisela ma tolovelekileko ka tiko legi. (Va Le Efesusi 2:2) Hi xikombiso, ka matshamu yo kari a papai a nga ha alakanya lezi: ‘Lomu ka hina, a vanana va gonziswa hi vavasati.’ Kanilezi a Biblia gi leletela a vapapai lezaku va gonzisa vana vabye xungetano hi Jehova. (Va Le Efesusi 6:4) A vapswali va ranzako Jehova va lava ku a vana vabye vava ni wunghana go tiya na Jehova, go fana ni legi Samueli a nga hi nago na a ha hi xifanyana. — 1 Samueli 3:19.

15. Hi nga tsumbekisa kuyini ka Jehova a xikhati hi lavako ku maha ziboho za hombe?

¹⁵ Mamahela ya ziboho. Loku hi lava ku maha ziboho za hombe wutomini, hi fanele ku ranga hi ku tiva a mawonela ya Jehova ka mhaka leyo kasi hi tsumbeka kakwe. A Biblia ni hlengeletano yakwe zi nga hi vuna. Hi xikombiso, a vapswali vo kari va sukileko tikweni gabye vaya ka ginwani va boha ku rumela zihlangi zabye kaya kasi zi ya tshama ni maxaka. Hi ndlela leyo, a papai ni mamani va simama va tira kasi va kuma mali. Lisine ku lexo xiboho xa munhu wutsumbu, hambulezo a patswa wu fanele ku ti wutisa lezi: ‘Jehova i ta xi wonisa kuyini a xiboho xa hina?’ (Gonza Va Le Roma 14:12.) Zi wa tava zi nene a ku ranga hi ku ehleketa hi lezi a Biblia gi zi wulako na hi nga se maha xiboho xa lisima xungetano hi ngango wa hina ni ntiro wa hina. Hi lava ku vuniwa hi Papai wa hina hakuva a hi zi koti ku fambisa a mazambo ya hina hi hoce. — Jeremia 10:23.

16. a) Xikarato muni lexi a mamani wo kari a kumeneko naxo anzhako ka ku pswala n’wana wakwe? b) Zini zi mu vunileko ku maha xiboho xa xi nene?

 ¹⁶ Anzhako ka kuva a patswa wo kari wu yile matiko-wundle, wu lo pswala jaha, va alakanyela ku rumela xinwanana lexo ka vakokwani va xona. Kanilezi ka xikhati lexo, a sati wa kona i wa gonza Biblia ni Mboni ya Jehova. I lo gonza a tiva lezaku i ntiro wakwe a ku gonzisa n’wana wakwe xungetano hi Jehova. (Tisimu 127:3; Mavingu 22:6) A wasati loye i lo khongela ka Jehova, kota lezi a Biblia gi hi byelako, a kombela lezaku a mu vuna ku maha lezi zi lulamileko. (Tisimu 62:7, 8) I lo tlhela a bhulela makabye wa xisati loyi a nga mu gonzisa Biblia ni vanwani lomu bandleni. Hambu lezi a maxaka ni vanghana va nga tshamela ku mu byela lezaku a rumela xinwanana xabye ka vakokwani va xona, i lo boha ku maha lezi zi lulamileko. A nuna wakwe i wonile lezi a vamakabye va nga mu vunisa zona sati wakwe ni nwanana wabye. Zi lo mu khumba nguvu laha ka kuza a sangula ku gonza Biblia ni kuya mitlhanganweni ni ngango wakwe. Hi nga alakanyela lezi a mamani loye a nga tsakisa zona laha a nga wona lezaku Jehova i hlamulile mukhongelo wakwe!

17. Loku hi gonza a Biblia ni munhu, zileletelo muni hi faneleko ku zi lanzela?

¹⁷ Ndlela yo lanzela zileletelo. Loku hi tsumbeka ka Nungungulu, hi ta lanzela zileletelo hi nyikwako hi hlengeletano yakwe. Hi xikombiso, ehleketa hi lezi hi faneleko ku maha zalezi hi sangulako ku gonza ni munhu a bhuku Zini lezi a Biblia gi hi gonzisako? Hi kuciwa ku mbheta timeneti titsongwani anzhako ka xigonzo xinwe ni xinwani kasi ku vuna xigonzani lezaku xi engetela ku tiva hlengeletano ya Jehova. Hi nga tirisa a vidiyu Zini zi mahiwako lomu ka Salawu ya Mufumo?, ni broxura Hi Vamani va Mahako Kuranza ka Jehova Inyamutlha? Anzhako ka kuva hi mbhetile a bhuku Hi gonzise, hi nga vuna xigonzani lezaku xi engetela ku “tiyiswa kukholweni” hi ku gonza naxo a bhuku ‘Tshamani liranzweni la Nungungulu’ hambu loku xi bapatizwa na xa ha gonza. (Va Le Kolosi 2:7) Wa lanzela a zileletelo za hlengeletano ya Jehova?

18, 19. Hi zihi a zigelo zo kari za kuva hi bonga Jehova?

¹⁸ Hi na ni zigelo zo tala za kuva hi bonga Jehova! A xinwe xa zona hi lezaku hi kota ya “yena ha hanya, ha fambafamba, hi hi ni kuvakona ka hina.” (Mitiro 17:27, 28) I tlhelile a hi nyika a Bhuku gakwe, a Biblia. A ku fana ni maKristu ya le Tesalonika, ha xi nyika nguvu lisima a xinyikiwo lexo hakuva mahungu ma tako hi kakwe. — 1 Va Le Tesalonika 2:13.

¹⁹ A Biblia gi hi vuna ku tshinela ka Jehova, yenawu a tshinela ka hina. (Jakobe 4:8) Ha mu bonga nguvu Papai wa hina hi lezi a hi rambileko a ku lumba hlengeletano yakwe. Hi ti zwisa ku khwatsi hi mutsali wa tisimu loyi a ngaku: “Dumisani Jehova, hakuva i nene, hakuva a wuxinji gakwe ga kala kupinzuka.” (Tisimu 136:1) Ka vesi ginwe ni ginwani ga lisimu leli, a mutsali wa tisimu i phinda magezu lawa: “A wuxinji gakwe ga kala kupinzuka.” Loku hi tsumbeka ka Jehova hi tlhela hi lanzela zileletelo lezi a hi nyikako hi ku tirisa a hlengeletano yakwe, i ta hi nyika wutomi ga pinzukelwa niku i ta tsumbeka ka hina kala kupinzuka!