1, 2. a) Kurula muni loku hi nga vako nako zezi? b) Hikuyini zi kalako zi nga koteki a kuva ni kurula ko mbhelela zezi? (Wona mufota laha hehla.)

HONTLHENI hi lava ku rula wutomini ga hina. A hi lavi ku tshama na hi karatekile. Hikwalaho, ha mu bonga nguvu Jehova hi lezi a hi nyikako a “kurula” kakwe. A kurula loko ku nga hi vikela ka maalakanyo ya hava lawa ma vangako kukarateka. (Va Le Filipi 4:6, 7) Kota vanhu va ti hendleletileko ka Jehova, hi na ni ‘kurula na Nungungulu’ kambe. Lezo zi wula ku hi na ni wunghana ga gi nene naye. — Va Le Roma 5:1.

² Hambulezo, a xi se chikela a xikhati xa ku Nungungulu a tisa kurula ko mbhelela laha misaveni. Hi hanya masikwini yo gumesa niku hi ranzelwe hi vanhu va tihanyi. Hikwalaho, hi kumana ni zikarato zo tala. (2 Timote 3:1-4) Hi fanele kulwa na Satani kambe ni tigonzo ta mawunwa leti a ti vuvumisako. (2 Va Le Korinte 10:4, 5) Kanilezi lexi xi nga hi mahako hi karateka nguvu ku vukelwa hi maxaka ya hina lawa ma kalako ma nga khozeli Jehova. A yo kari ma nga hi hleka hi kota ya lezi hi zi kholwako kutani ku hi lumbeta maku hi vanga kuhambana  laha ngangweni. A manwani ma nga ha wula lezaku loku hi nga tsiki ku tirela Jehova, hi nga ta hava maxaka yabye. Makunu hi fanele ku maha yini loku a maxaka ya hina ma hi vukela? Hi nga zi kotisa kuyini ku simama hi rulile loku lezo zi humelela?

3, 4. a) A tigonzo ta Jesu ti wa va khumbisa kuyini vanhu? b) Hi kwihi laha zi nga wa ta karata nguvu a kuva mulanzeli wa Jesu?

³ Jesu i wa zi tiva lezaku a hi vontlhe va nga wa ta vumela tigonzo takwe. I wa zi tiva kambe lezaku a vo kari va wa ta vukela vapizani vakwe. Hikwalaho, zi wa ta lava lezaku va tiya-hlana. A ku vukelwa loko ku wa ta khumba a kurula ka mingango yabye. Hikwalaho, i te: “Mu nga alakanyi muku nzi tile a ku neha kurula misaveni; a nzi telangi ku neha kurula, kanilezi a supado. Hakuva nzi tele ku ta hambanyisa a munhu ni raru wakwe, a nhanyana ni mamani wakwe, a katamwane ni nwingi wakwe; ni va le ngangweni wa munhu va ta maha valala vakwe.” — Mateu 10:34-36.

⁴ Jesu i wa lava ku wula yini a xikhati a ngaku: “Mu nga alakanyi muku nzi tile a ku neha kurula misaveni”? I wa lava ku a vanhu va zi tiva lezaku a ku maha vapizani vakwe zi ta va vangela zikarato. Hambulezo, a kungo gakwe ku wa nga hi ku hambanisa mingango, kanilezi ku wa hi ku gonzisa lisine xungetano hi Nungungulu. (Johani 18:37) Hambulezo, a vapizani vakwe va wa fanele ku zi tiva lezaku zi nga ta va olovela kuva valanzeli vakwe, nguvunguvu loku a vanghana vabye kutani maxaka va nga amukeli lisine.

5. Zini lezi a valanzeli va Jesu va nga kumana nazo?

⁵ Jesu i wulile lezaku a ku vukelwa hi va laha ngangweni xinwe xa zilo lezi a valanzeli vakwe va faneleko ku zi timisela. (Mateu 10:38) Kasi ku mu tsakisa, a vapizani vakwe va timisele a xikhati va nga hlekiwa kutani ku tsikiwa hi maxaka yabye. Kanilezi va kumile zo hunza lezi va nga zi luza. — Gonza Marku 10:29, 30.

6. Zini hi faneleko ku zi alakanya loku a maxaka ya hina ma hi vukela?

⁶ Hambu loku a maxaka ya hina ma hi vukela hi kota ya lezi hi khozelako Jehova, hi simama hi ma ranza. Hambulezo, hi fanele ku alakanya lezaku Nungungulu na Kristu hi vona hi faneleko ku va ranza nguvu a ku hunza ni wihi munhu munwani. (Mateu 10:37) Hi fanele ku alakanya kambe lezaku Satani a nga tirisa liranzo leli hi nga nalo hi maxaka ya hina kasi ku hi maha hi nga tsumbeki ka Jehova. A hi woneni ziyimo zo kari zo binza, ni lezi hi nga timiselisako zona loku zi humelela.

7. U fanele ku xi wonisa kuyini a xiyimo xa wena loku a nuna kutani sati a nga tireli Jehova?

⁷ A Biblia gi wula lezaku vontlhe va chadako “va ta karateka”. (1 Va Le Korinte 7:28) Kanilezi, loku u chadile ni munhu a nga khozeliko Jehova, lezo zi nga engetela kukarateka ngangweni wa wena. Hambulezo, za lisima ku uva ni mawonela ya Jehova loku u hi ka xiyimo lexo. I hi byela lezaku a hi faneli ku tlhatlha wukati kutani ku hambana ni nuna kutani sati hi ku kala a nga khozeli Jehova basi. (1 Va Le Korinte 7:12-16) Hambu loku a nuna wa wena a nga tireli Jehova kutani a nga rangeli ngango wukhozelini ga lisine, u fanele ku simama u mu komba xichavo kota hloko ya ngango wa wena. Ni loku a sati wa  wena a nga tireli Jehova, u fanele ku mu ranza nguvu u tlhela u mu khatalela. — Va Le Efesusi 5:22, 23, 28, 29.

8. Ziwutiso muni u nga ti mahako loku a nuna wa wena kutani sati a ku vekela mimbhingano ka wukhozeli ga wena?

⁸ U ta maha yini loku a nuna wa wena kutani sati a ku vekela mimbhingano ka wukhozeli ga wena? Hi xikombiso, a nuna wa makabye wo kari i mu byelile lezaku i fanele ku tirisa masiku yo kari ntsena hi viki kasi aya ntirweni wa kuxumayela. Loku u hi ka xiyimo xo fana ni lexo, ti wutise lezi: ‘A nuna wa mina kutani sati wa mina o nzi beletela ku khozela Jehova hi kumbhelela? Loku zi nga hi zona, nzi nga maha lezi a nzi kombelako ke?’ Loku u tiva ku ringanisela, u tava ni zikarato zitsongwani wukatini ga wena. — Titusi 3:2.

9. A muKristu a nga gonzisisa kuyini a vana vakwe lezaku va nyika xichavo a papai kutani mamani a nga hiko muKristu?

⁹ Zi nga tshuka zi karata ku gonzisa vana va wena loku a nuna wa wena kutani sati a nga tireli Jehova. Hi xikombiso, u fanele ku gonzisa vana va wena a ku ingisa xileletelo xa Biblia xaku: “Chava a raru wa wena ni nyine wa wena.” (Va Le Efesusi 6:1-3) Kanilezi u ta kuyini loku a nuna wa wena kutani sati a nga hanyi hi matshinya ya milayo ya Biblia? U nga va vekela xikombiso xi nene a vana va wena hi ku nyika xichavo a nuna wa wena kutani sati. Ehleketa hi matshamela yakwe ya ma nene u tlhela u mu byela lezaku wa xalala nguvu hi zilo za zi nene lezi a mahako. U nga wulawuli za hava hi nuna wa wena kutani sati mahlweni ka vanana. Wutshanwini ga lezo, tlhamusela vana va wena lezaku a munwe ni munwani i tlhatlhekile ku hlawula ku tirela Jehova kutani ku nga mu tireli. Loku u gonzisa vana va wena lezaku va nyika xichavo a papai wabye kutani mamani a nga hiko muKristu, a xikombiso xabye xa xi nene xi nga kuca nuna wa wena kutani sati lezaku a gonza xungetano hi Jehova.

10. A vapswali va maKristu va nga gonzisisa kuyini vana vabye lezaku va ranza Jehova?

¹⁰ A vapswali vo kari va nga hiko maKristu va nga ha lava lezaku a vana vabye va maha  mibuzo ya masiku ya tifiriyado kutani ku gonza tigonzo ta wukhongeli ga mawunwa. A nuna a nga tlhela a beletela sati wakwe wa muKristu a ku gonzisa Biblia vanana. Kanilezi hambu ka ziyimo lezo, a sati a nga maha zontlhe a zi kotako kasi ku va gonzisa lisine. (Mitiro 16:1; 2 Timote 3:14, 15) Hi xikombiso, loku a nuna a nga zi lavi ku a sati wakwe a tshama a gonza Biblia ni vanana kutani ku famba navo mitlhanganweni, a sati i ta ingisa xileletelo lexo. Hambulezo, a nga simama a hlota tindlela ta ku bhula ni vanana hi lezi a zi kholwako kala laha zi kotekako hi kona. Hi ndlela leyo, va nga gonza hi Jehova ni milayo yakwe xungetano hi le’zo saseka ni le’zo biha. (Mitiro 4:19, 20) Hi magumo, a vanana va ta ti hlawulela hi voce lezaku va ta tirela Jehova kutani va nga ta mu tirela. * (Wona tlhamuselo wa lahasi.) — Deuteronome 30:19, 20.

11. Xini xi nga vangako zikarato xikari ka wena ni maxaka lawa ma nga mu tireliko Jehova?

¹¹ Kuzilava a xikhati hi nga sangula ku gonza Biblia ni Timboni ta Jehova, a hi ma byelangi nchumu maxaka ya hina. Kanilezi laha a kukholwa ka hina ku ngaya ku kula, hi wonile ku i chukwana hi va byela lezaku hi lava ku tirela Jehova. (Marku 8:38) Hambulezo, kuzilava a kutsumbeka ka wena ka Jehova ku vuxile guwa xikari ka wena ni maxaka ya wena. A hi woneni a zilo zo kari u nga mahako kasi ku hlota kurula ni maxaka ya wena u tlhela u simama u tsumbeka ka Jehova.

12. Xini xi nga mahako maxaka ya hina ma hi vukela, niku hi nga kombisa kuyini lezaku ha ma zwisisa?

¹² Zama ku tiva lezi a maxaka ya wena ma ti zwisako zona. Ha tsaka nguvu hi lezi hi tivako lisine la Biblia. Hambulezo, a maxaka ya hina ma nga ha alakanya lezaku hi vumele ku xengwa kutani ku hi ti nghenisile ka wukhongeli go kala ku toloveleka. Loku hi nga ti patsi navo ka mibuzo ya tifiriyado, va nga ha alakanya lezaku a ha ha va ranzi. Va nga tlhela va chava ku a xikhati hi tofa hi ta tsayisiwa hi Nungungulu. Hi fanele ku zama ku zwisisa lezi va zi alakanyako hi tlhela hi va ingisela loku va wulawula kasi hi tiva ku xini xi va karatako. (Mavingu 20:5) Mupostoli Paule i wa zama ku tiva a kupima ka “vanhu vontlhe” kasi a va gonzisa a mahungu yo saseka. Loku hi zama ku zwisisa maxaka ya hina, zi nga hi vuna ku tiva ndlela ya ku ma gonzisa lisine. — 1 Va Le Korinte 9:19-23.

13. Hi nga wulawulisa kuyini ni maxaka ya hina ma nga kholwiko?

¹³ Wulawula navo hi ndlela ya kurula. A Biblia gi ngalo: “Ngha kuwulawula ka nwina ku hi ni tipswalo xontlhe xikhati.” (Va Le Kolosi 4:6) A ku maha lezo a zi olovi.  Hambulezo, hi nga kombela Jehova lezaku a hi nyika moya wakwe wa ku basa kasi wu hi vuna ku khoma maxaka ya hina hi kurula ni wunene. Hi nga zami ku kaneta ni yihi gonzo ya mawunwa va yi kholwako. Loku va wula kutani ku maha nchumu wu hi bayisako, hi nga tekelela vapostoli. Paule i te: “Loku hi rukatelwa hi tlhela hi katekisa; loku hi xaniswa, hina ha timisela; loku hi panzwa wuxezi, hina ha khongotela.” — 1 Va Le Korinte 4:12, 13.

14. Hi wahi mabhinzu ya kuva ni mahanyela ma nene?

¹⁴ Vana ni mahanyela ma nene. Hikuyini lezo zi nga za lisima? Hambu lezi a ku wulawula hi ndlela yo rula zi nga hi vunako ku hlayisa kurula ni maxaka ya hina, a mahanyela ya hina wonawo ma ngava ni ntamu. (Gonza 1 Pedro 3:1, 2, 16.) Komba maxaka hi mahanyela ya wena lezaku a Timboni ta Jehova ti hanyisana khwatsi wukatini ga tona, ta hlayisa khwatsi vanana, ti hanya hi milayo ya Biblia, niku ta xi tiva lexi ti hanyelako xona. Hambu loku a maxaka ya hina ma nga tshuki ma amukela lisine, hi ta tsaka hi ku tiva lezaku a mahanyela ya hina ma mu tsakisa Jehova.

15. Hi nga ti longiselisa kuyini na ka ha hi mahlweni kasi hi potsa ku kanetisana ni maxaka ya hina?

¹⁵ Ti longisele na ka ha hi mahlweni. Alakanyela ziyimo zi nga vuxako kukanetisana ni maxaka ya wena, u gumesa u gonza ku u ta kuyini loku zi humelela. (Mavingu 12:16, 23) Hi zalezo a makabye wo kari wa le Australia a nga maha. A nwingi wakwe wa xinuna i wa nyenya nguvu lisine niku a zikhati zinwani i wa tlhela a zangara. Hikwalaho, loku va lava ku mu enzela, yena ni nuna wakwe va wa ranga hi ku kombela Jehova lezaku a va vuna ku ti khoma kasi va nga mu hlamuli hi ndlela ya hava loku a zangara. Va wa alakanyela zilo zo tsakisa za ku ya bhula hi zona va tlhela va ti pimela xikhati kasi ku potsa mabhulo yo leha lawa ma nga wa ta maha lezaku va kanetisana hi zilo za wukhongeli.

16. Xini xi nga ku vunako ku nga tizwi nanzu loku u nga zwanani ni maxaka ya wena?

¹⁶ Hi lisine, a hi nge zwanani ka zontlhe ni maxaka ya hina ma nga khozeliko Jehova. Hikwalaho, loku mu nga zwanani ka zokari, u nga ha tizwa nanzu hakuva wa va ranza niku u lava ku va tsakisa. Kanilezi alakanya lezaku u fanele ku tsumbeka nguvu ka Jehova a ku hunza ku tsumbeka ka maxaka ya wena. Loku ma zi wona ku u khomile zi tiya ka mhaka leyo, ma nga tshuka ma zi zwisisa lezaku a ku tirela Jehova i nchumu wa lisima nguvu. A wu nge kurumeti munhu lezaku a amukela lisine. Kanilezi, u nga va maha va wona lezi a ku hanya hi milayo ya Jehova zi ku vunisako zona. Hi lisine, Jehova i va nyika lungelo go fana ni legi a hi nyikileko ga ku hlawula ku mu tirela. — Isaya 48:17, 18.

17, 18. Xini xi nga ku vunako loku a xaka gi tsika Jehova?

¹⁷ A zo ku bayisa loku a xaka ga wena gi susiwa kutani gi ti susa bandleni. Zi nga tlhela zi ku khwatsi munhu a ku tlhavako hi mukwana laha ka xifuva. U nga ku timiselisa kuyini a kubayisa loko?

¹⁸ Veka kupima ntirweni wa Jehova. Loku u hi ka xiyimo lexo, u fanele ku tiyisa kukholwa ka wena. Gonza Biblia siku ni siku, u longisela mitlhangano u tlhela uya mitlhanganweni ya kona, u simama ku xumayela u tlhela u khongela ka Jehova kasi a ku nyika ntamu wa ku timisela. (Juda 20, 21) Ahati loku u maha zontlhe lezo, a kubayisa ku nga hunzi ke? U nga tsukuli! Simama u veka kupima ntirweni wa Jehova. Hi kufamba ka xikhati, lezo zi ta ku vuna ku wonelela maalakanyo ya wena ni mbilu ya wena. Hi zalezo zi nga humelela a mutsali wa Lisimu 73. Kuve ni xikhati lexi zi nga mu karatela ku wonelela maalakanyo yakwe. Kanilezi a ku khozela Jehova zi mu vunile ku wona zilo hi ndlela yi nene. (Lisimu 73:16, 17) Wenawu u nga zi kota.

19. U nga kombisisa kuyini xichavo hi ndlela leyi Jehova a tsayisako hi yona vanhu vakwe?

¹⁹ Vumela kutsayisa ka Jehova. Jehova wa zi tiva lezaku a kutsayisa kakwe ku ta vuna vontlhe, a ku patsa ni loyi a susilweko bandleni. Hambu lezi zi bayisako nguvu loku a wokari hi mu ranzako a tsayisiwa, lezo zi nga mu vuna ku a wuya ka Jehova hi kufamba ka xikhati. (Gonza Maheberu 12:11.) Na ha ha rinzela ku a wuya ka Jehova, hi fanele ku vumela wurangeli ga Jehova ga ku “nga mahi wunghana” ni lava va susilweko bandleni. (1 Va Le Korinte 5:11-13) A ku maha lezo a zi olovi. Kanilezi hi fanele ku potsa ku bhula navo hambu hi telefone, timesaji, mapapilo kutani tindlela tinwani.

20. Zini hi faneleko ku zi rinzela?

²⁰ U nga mbhelelwi hi kutsumba! A liranzo “li tsumba zilo zontlhe”. Hikwalaho, hi rinzela lezaku a maxaka ya hina ni vanghana va tlhelela ka Jehova. (1 Va Le Korinte 13:7) Loku u wona lezaku a xaka ga wena ga cica zokari ka mahanyela ya gona, u nga gi khongelela ka Jehova lezaku gi kuma ntamu hi ku gonza Biblia gi tlhela gi vumela xirambo xakwe xaku: “Tlhelela ka mina.”— Isaya 44:22.

21. Zini u faneleko ku maha loku a maxaka ya wena ma ku vukela hi kota ya lezi u lanzelako Jesu?

²¹ Jesu i te hi fanele ku mu ranza nguvu ku hunza ni wihi munhu. Jesu i wa tiyiseka lezaku a vapizani vakwe va wa tava ni kutiya-hlana loku ku lavekako kasi va simama va tsumbeka kakwe hambu loku a maxaka ma va vukela. Hikwalaho, loku a maxaka ya wena ma ku vukela hi lezi u lanzelako Jesu, tsumba Jehova. Mu kombele lezaku a ku vuna ku timisela. (Isaya 41:10, 13) Tsaka hi ku tiva lezaku Jehova na Jesu va xalala nguvu hi wena niku va ta ku katekisa hi kota ya kutsumbeka ka wena.