Zviwutiso zva vagondzi

A “vangakholwiko” lava va wuliwako hi Pawule ka 2 Va Le Korinte 6:14 hi vamani?

Ka 2 Va Le Korinte 6:14 hi lera lezvi: “Mu nga bohiwi kanga mun’we ni vangakholwiko.” Loku hi cuwuka a mongo wa kona, zvi woneka khwatsi lezvaku Pawule i wulawula hi vanhu lava va kalako va nga lumbi a bandla ga wuKristu. A mazwisisela lawa ma seketelwa hi mavhesi man’wani ya Bhibhiliya lomu Pawule a tirisako a gezu “a nga kholwiko” kutani “vangakholwiko”.

Hi cikombiso, Pawule i kawuka a maKristu hi lezvi ma yako tribhunali “ka vangakholwiko!” (1 Va Le Korinte 6:6) Ka vhesi legi, a “vangakholwiko” ku wuliwa a valamuli lava va nga tira tribhunali ya Korinte. Ka papilo gakwe ga wumbiri, Pawule i wulile lezvaku Sathani i ‘vhalile a kupima ka lava va nga kholwiko’. A matihlo ya vangakholwiko lavo ma ‘vhalilwe’ a ku khwatsi ma no vhaliwa hi nguwo kasi ma nga woni a mahungu ya manene. A vangakholwiko lavo a va mahangi nchumu kasi ku tirela Jehovha, kota lezvi Pawule a nga ranga a tlhamusela, aku: “Loku a munhu a tlhelela ka Jehovha, a vhewu yo susiwa.” — 2 Va Le Korinte 3:16; 4:4.

A vangakholwiko vo kari zvitlula-milayo niku va khozela vanungungulu va mawunwa. (2 Va Le Korinte 6:15, 16) Kanilezvi a hi vontlhe a vangakholwiko va vhukelako a malandza ya Jehovha. A vokari va yi tsakela a lisine. A votala va na ni nuna kutani sati a nga muKristu niku va simama zvin’we na va tsakile. (1 Va Le Korinte 7:12-14; 10:27; 14:22-25; 1 Pedro 3:1, 2) Kanilezvi, contlhe cikhati Pawule i tirisa a gezu ‘a nga kholwiko’ kasi ku wula a vanhu lava hi va kumbukileko laha hehla, lava va kalako va nga lumbi a bandla ga wuKristu, legi gi wumbiwako hi “lava va nga kholwa ka Hosi”. — Mitiro 2:41; 5:14; 8:12, 13.

A tshinya ga nayo gi nga ka 2 Va Le Korinte 6:14 gi nyika wurangeli ga lisima ka maKristu ka zviyimo zvontlhe zva wutomi niku gi tolovela ku tshahiwa kota wusungukati ga wutlhari ka maKristu lawa ma lavako nuna kutani sati wo chadha naye. (Matewu 19:4-6) Hi wutlhari, a muKristu a ti nyikeleko a tlhela a bhabhatisiwa a nga lavi munhu wo chadha naye cikari ka vangakholwiko hakuva a mahanyela ya vangakholwiko, makungo yabye ni lezvi va zvi kholwako zvi hambene kule nguvhu ni zva muKristu wa lisine.

Kanilezvi ahati ke lava va gondzako a Bhibhiliya va tlhela va hlengela ni bandla ga wuKristu? Ahati a vahuweleli vo kala ku bhabhatiswa? A ku vonawu vangakholwiko? Ahihi. A vanhu lava va nga vhumela a lisine la mahungu ya manene, va kombisako a kukula hi tlhelo ga moya va kongoma kubhabhatisweni a va faneli ku wuliwa ku vangakholwiko. ( Va Le Roma 10:10; 2 Va Le Korinte 4:13) Na a nga se bhabhatiswa Korneliyu i wa wuliwa ku “munhu wo pinyama, a nga chava Nungungulu”. — Mitiro 10:2.

Makunu, a ku zvi wa tava wutlhari ku a muKristu a ti nyikeleko a namorara a tlhela a chadha ni muhuweleli wo kala ku bhabhatiswa kota lezvi hi kukongoma a wusungukati ga Pawule ka 2 Va Le Korinte 6:14 gi nga tiriko ka ciyimo leci? Ahihi, zvi wa nga tava wutlhari. Hikuyini? Hi kota ya wusungukati go kongoma legi Pawule a nyikileko a maKristu lawa ma felweko hi vanuna. Pawule i tsalile lezvi: “I tlhatlhekile ku chadha ni loyi a mu lavako, saseka lezvaku i wa chadhe ntsena Hosini.” (1 Va Le Korinte 7:39) Hi kuyelana ni wusungukati legi, a maKristu ma ti nyikeleko ma kuciwa ku ti lavela wo chadha naye ntsena cikari ka lava va nga “Hosini”.

A gezu “Hosini” ni lawa yaku “ka Kristu” ma wula yini? Ka Va Le Roma 16:8-10 ni Va Le Kolosi 4:7 Pawule i wulawulile hi vanhu lava va nga “ka Kristu” kutani “Hosini”. Loku u lera a mavhesi lawo u ta wona lezvaku a vanhu lavo va ‘tirele Kristu zvin’we naye’, ‘va amukeleka’, ‘vamakabye vo randzeka’, ‘zvitiri zvo tsumbeka’ ni ‘malandza-kulori’.

Hi rini laha a munhu a mahako “nandza Hosini”? Zvi maheka a cikhati leci hi kuzvirandza a mahako lezvi a nandza gi mahako a tlhela a ti tsika. Jesu i tlhamusele aku: “Loku munhu a lava ku ndzi landzela i wa ti tsike, a rwala a mhandze yakwe ya hlomulo a simama ku ndzi landzela.” (Matewu 16:24) A munhu i sangula ku landzela Kristu a tlhela a ti veka hasi ka kurandza ka Nungungulu hi kumbhelela a cikhati leci a ti nyikelako ka Nungungulu. Andzhako ka lezvo, i ti hendleleta kasi a bhabhatiswa a maha nandza gi amukelekako niku lezvo zvi maha ku a zvi kota kuva ni wunghana ga ginene na Jehovha Nungungulu. a Hikwalaho, a ku ‘chadha Hosini’ zvi wula ku chadha ni munhu loyi a zvi kombisileko lezvaku hakunene mukholwa niku i nandza gi ti nyikeleko ga “Nungungulu ni ga Hosi Jesu Kristu”. — Jakobe 1:1

A munhu loyi a gondzako a Bhibhiliya ni Vakustumunyu va Jehovha a tlhela a kula hi tlhelo ga moya wa dzundziwa nguvhu. Kanilezvi a nga se ti nyikela ka Jehovha a tlhela a tsumbisa ku tirisa a wutomi gakwe ntirweni wa Jehovha. Wa ha hi lomu ka ku cica lezvi zvi lavekako. Na a nga se sangula ku ehleketa hi wukati, i fanele ku ranga hi ku cica lezvi zvi lavekako wutomini gakwe a tlhela ava muKristu a ti nyikeleko.

Zva fanela ku a muKristu a namorara a munhu loyi a alakanyelako ku wa chela kota hi cigondzo cakwe ca Bhibhiliya kuzvilava na a pimisa ku i ta mu rindzela kala a bhabhatiswa hi kona va to chadha? Ahihi. Loku a cigondzani ca Bhibhiliya ci pola lezvaku ku na ni muKristu a ti nyikeleko a lavako ku chadha naco kanilezvi a ngo maha lezvo ntsena andzhako ka loku ci bhabhatisilwe ci nga ha kuceka ku bhabhatisiwa hi zvigelo zva hava.

A kutala ka zvikhati, a munhu i maha muhuweleli wo kala ku bhabhatiswa hi cikhati co kari ntsena ca citsongwani a gumesa a kula a chikela ku bhabhatisiwa. Hikwalaho, a wusungukati legi gi nga laha hehla ga ku chadha ntsena Hosini a gi tsandzi. Kanilezvi ahati loku a munhu a hi ka tanga ya ku chadha, na a wundlilwe ngangweni wa wuKristu, na a hiseka bandleni hi malembe yo tala lezvo na a hi muhuweleli wo kala ku bhabhatiswa? Loku zvi tshamisile lezvo, cini ci nga mu maha a nga nyikeli a wutomi gakwe ka Jehovha? Hikuyini a chavako kuba zambo lego? Ova ni kukanakana ko kari? Hambu lezvi a kalako a nga hi a nga kholwiko a hi nge mu wuli ku i “Hosini”.

A wusungukati ga Pawule hi wukati gi nyikilwe kasi ku vhuna hina. (Isaya 48:17) Loku lava va to maha nuna ni sati, hi wumbiri gabye, va ti nyikele ka Jehovha a ciboho ca vona vambiri ci na ni ciseketelo co tiya ca moya. Va na ni mahanyela yo fana ni makungo yalawa ya man’we. Lezvo zvi vhuna nguvhu ku vava ni wukati go tsakisa. A ku tsika lezvo, loyi a ‘chadhako Hosini’ i komba lezvaku i tsumbekile ka Jehovha niku zvi neha makatekwa yo kala ma nga mbheli, hakuva “ka loyi a tsumbekako, [Jehovha] wa tsumbeka kakwe”. — Lisimu 18:25.

[Tlhamuselo wa lahasi]

 [Mufota ka maphajina 31]

“Ka loyi a tsumbekako, [Jehovha] wa tsumbeka kakwe”