KATHERINE [Pron: kath′rən] i kulele le Estados Unidos niku laha a nga hi ni 16 wa malembe i lo bapatizwa kota Mboni ya Jehova. I wa xumayela hi kuhiseka kanilezi vanhu vatsongwani va nga amukela a mahungu yo saseka ka xipanze lexi a nga xumayela ka xona. I ngalo: “Nzi lo gonza mahungu xungetano hi vanhu lava va nga khongela ka Nungungulu kasi a rumela munhu lezaku a va vuna ku mu tiva. A kutala ka zikhati nzi wa xuva ku kuma munhu wa tshamela lego, kanilezi a nzi tshukangi nzi mu kuma.”

Anzhako ka ku xumayela malembe ka xipanze xalexo, Katherine i lo sangula ku alakanyela ku rura aya ka xipanze lexi a vanhu va kona va amukelako khwatsi a mahungu ya Mufumo. Hambulezo, i wa nga tsumbi lezaku i ta zi kota. Wutomini gakwe i wa no enza khati ginwe basi a siya ngango wakwe — niku lezo zive za maviki mambiri ntsena — kanilezi siku ni siku i wa va xuva nguvu. Hambulezo, a kuxuva kakwe ka ku kuma litsako hi ku vuna lava va hlotako Jehova ku wa hi ka hombe. Anzhako ka ku ehleketisisa hi matshamu yo tsalangana lawa a nga wa ta rurela ka wona, i lo tsalela a ravi ga le Guam zonake a kuma mahungu lawa a nga ma lava. Hi Julho wa 2007, na a hi ni 26 wa malembe, Katherine i lo rura aya Saipã, ku nga xihlale xo kari Bimbini ga Pacífico xi kumekako ka pfhuka wa ku ringana 10.000 wa tikilometro kusukela kaya kakwe. Xana a kurura kakwe ku vile ni wuyelo muni?

Xikhatanyana nzhako ka ku ngha a chikele ka bandla giswa, Katherine i lo kumana na Doris, a wasati a nga hi kwalomo ka 45 wa malembe, loyi a nga vumela xigonzo xa Biblia. Anzhako ka kuva va gonzile a zipimo zinharu zo sangula za bhuku A Biblia Gi Gonzisako, i lo sangula ku karateka. I ngalo: “Doris i wa hi xigonzani xa xi nene nguvu; nzi wa nga lavi ku tshuka nzi mu luza. Nzi wa nga se tshuka nzi fambisa xigonzo xa Biblia xo khanzakanya, hikwalaho nzi wa alakanya lezaku Doris i wa lava makabye a buvileko kasi ku gonza naye, kuzilava wa tanga yakwe.” Katherine i lo kombela Jehova hi mukhongelo kasi a mu vuna ku kuma makabye wa xisati a fanelekako loyi a nga wa ta mu nyika xigonzani xakwe xa Biblia. Zonake i lo boha ku byela Doris lezaku i lava ku mu lavela munhu munwani wo gonza naye.

Katherine i ngalo: “Na nzi nga se kumbuka mhaka leyo, Doris i lo nzi byela lezaku i wa lava ku bhula na mina xungetano hi xikarato xo kari. Anzhako ka kuva a nzi hlawutele, nzi lo mu byela lezi Jehova a nzi vunisileko zona a ku yimisana ni xikarato xo fana ni lexo. I lo nzi bonga.” Hi kulanzela Doris i lo byela Katherine aku: “Jehova i tirisa wena kasi ku nzi vuna. A siku go sangula u ngata laha kaya, nzi wa mbhetile tihora to  tala na nzi lera Biblia. Nzi wa kari nzi rila, na nzi kombela Nungungulu lezaku a rumela munhu wo ta nzi vuna ku zwisisa a Biblia. Anzhako ka lezo, u lota laha kaya ka mina. Jehova i hlamulile mukhongelo wa mina!” Katherine i huma ni mihloti loku a alakanya siku lego. I ngalo: “A magezu ya Doris mave hlamulo wa mukhongelo wa mina. Jehova i lo nzi komba lezaku nzi nga simama ku gonza naye.”

Doris i lo bapatizwa hi 2010, niku zalezi i fambisa zigonzo zo tala za Biblia za yena wutsumbu. Katherine i ngalo: “A nzo ku bonga hi lezi a kuxuva ka mina ka ku lava ku vuna munhu lezaku ava nanza ga Jehova ku tatisekileko!” Nyamutlha, Katherine i tira na a tsakile kota phayona go hlawuleka ka xihlale xa Cosrai le Pacífico.

Ku na ni vamakabye va xinuna ni va xisati va ku hunza 100 va tako hi ka matiko yo hambanahambana (va nga ni 19 kuya ka 79 wa malembe) va tirako lomu ku nga ni xilaveko xa hombe le Micronésia. A kutizwa ka vamakabye lavo vo hiseka ku kombiswa khwatsi hi magezu ya Erica, loyi a rurileko aya Guam hi 2006 na a hi ni 19 wa malembe. I ngalo: “A ku tira kota phayona ka wutshamu legi a vanhu va kona va nga ni tora ga lisine za tsakisa nguvu. Nzi mu bonga nguvu Jehova hi kuva a nzi vunile ku nghenela ntiro lowu. Leyo hi yona ndlela ya chukwana ya ku tirisa wutomi ga mina!” Nyamutlha, Erica i tsaka nguvu hi ku tira kota phayona go hlawuleka le Ebeye xihlaleni xa Marshall. Hambulezo, a ku tira ka tiko ginwani zi na ni zikarato kambe. A hi woneni zinharu za zona ni ku wona lezi lava va rurileko vaya Micronésia va yimisanisileko zona nazo.

Mahanyela. Anzhako ka ku ngha a chikele xihlaleni xa Palau hi 2007, Simon wa 22 wa malembe i lo hatla a wona lezaku a mali a nga yi kumako kasi ku ti hanyisa xipanze xitsongwani ntsena xa leyi a nga yi kuma tikweni gakwe ga mabeleko, le Inglaterra. “Nzi wa fanele ku gonza ku nga xavi ni xihi nzi xi lavako. Zalezi, nzi hlawula khwatsi a zakuga za ku xava, niku nzi renzelekela ka zitolo zo hlayanyana kasi nzi kuma zilo za ku maheka. Loku ku onheka nchumu, nzi lavetela tipesa ta kale nzi ti xava zonake nzi lava munhu wo nzi vuna ku lungisa.” Xana a xilaveko xa ku hanya wutomi go olova xi mu khumbisile kuyini? Simon i ngalo: “Zi nzi vunile ku tiva lezi hakunene zi lavekako wutomini zi tlhela zi nzi gonzisa ku hanya hi zilo zitsongwani. A ku khatala ka Jehova ka woneka nguvu ka makhati yo hambanahambana. Ka ntlhanu wa malembe ni mambiri lawa nzi nga seno, a nzi se tshuka nzi vumala zakuga kutani wutshamu ga ku etlela.” Hakunene, Jehova wa seketela lava va hanyako wutomi go olova kasi ku rangisa Mufumo.—Mat. 6:32, 33.

Kuxuva kaya. Erica i ngalo: “Nzi na ni kuzwanana ka hombe ni ngango wa mina, hikwalaho nzi wa chava ku tshuka a wutireli ga mina gi nga fambi khwatsi hi kota ya kuxuva kaya.” Zini a nga maha kasi ku ti longisela? “Na nzi nga se rura, nzi lo gonza a tinzima ta Murinzeli ti wulawulako hi kuxuva kaya. Lezo zi nzi vunile nguvu a ku longiselela mbilu ya mina kasi ku yimisana ni xikarato lexo. Ka yinwe ya tinzima leto, a mamani wo kari i lo tiyisekisa a nhanyana wakwe lezaku Jehova i ta mu khatalela, hi ku wula lezi: ‘Jehova a nga ku khatalela  nguvu a ku hunza mina.’ A magezu lawo hakunene ma nzi tiyisile.” Hannah ni nuna wakwe Patrick va tira Majuro, xihlaleni xa Marshall. Hannah i hlula xikarato lexi hi ku veka kupima kakwe ka vamakabye va bandla legi va nga ka gona. I ngalo: “Xontlhe xikhati nzi bonga Jehova hi vamakabye va hina va misava yontlhe hakuva vonawu va wumba ngango wa mina. Loku ku wa nga hi xivuno xabye xa liranzo, na nzi nga zangi nzi zi kotile ku tira lomu ku nga ni xilaveko xa hombe.”

Ku maha wunghana. Simon i ngalo: “Loku u chikela ka tiko ginwani, a zilo zontlhe u zi wonako zi hambene ni lezi u zi tivako. Ka zikhati zo kari nzi xuva ku wula zilo zo hlekisa zi tlhela zi zwisisiwa khwatsi.” Erica i ngalo: “Kusanguleni, nzi wa alakanya ku a nga kona a zi lavako ku maha wunghana na mina, kanilezi lezo zi nzi vunile ku ehleketa hi xigelo xa mina xa ku rura. A nzi rurangi hi ku lava ku wuyelwa kanilezi hi ku lava ku mu mahela zo tala Jehova.” I lo engeta aku: “Hi kufamba ka xikhati, nzi lo kuma vanghana va va nene, lava nzi va ranzako.” Simon i lo ti karata nguvu kasi ku gonza xiPalau, lezi zi mu vunako ku ‘vulula mbilu yakwe’ ka vamakabye va xipanze lexo. (2 Kor. 6:13) A kutikarata loku a nga ku maha kasi ku gonza a lirimi lelo ku lo mu maha a ranziwa hi vamakabye. Kunene, loku lava va rurako va tira hi mbilu yinwe ni vamakabye va xipanze lexo, vontlhe va kuma nchachazelo wa kuva ni wunghana gi nene lomu bandleni. Hi wahi mabhinzu manwani ma kumiwako hi lava va ti hendleletako hi kuziranza kasi ku ya tira lomu ku nga ni xilaveko xa hombe ke?

Mupostoli Paule i te ngalo: “Loyi a xwanyako nguvu, i ta tshovela nguvu.” (2 Kor. 9:6) A tshinya ga nayo gi nga ka magezu lawa hakunene ga tira ka lava va engetelako wutireli gabye. Mihanzu muni va ‘tshovelako nguvu’ le Micronésia?

Le Micronésia, za ha koteka ku sangula zigonzo za Biblia ni ku wona ha wece lezi a vanhu lava va gonzako lisine la Mhaka ya Nungungulu va tlhela va hanya hi lona va kulisako zona hi tlhelo ga moya. Patrick na Hannah va xumayele le Angaur kambe, xi nga xihlale xa xitsongwani xi nga ni xipimo xa 320 wa vahanyi. Anzhako ka ku xumayela tihweti timbiri, va lo kuma wasati a nga wundla vana yece. I lo tekela ku vumela xigonzo xa Biblia, a pswonga lisine zonake a maha kucica ka hombe wutomini gakwe. Hannah i ngalo: “Anzhako ka xigonzo xinwe ni xinwani, hi wa suka hi mibhasikeni ya hina na hi cuwukana hi tlhela hiku: ‘Ha ku bonga Jehova!’” Hannah i engeta aku: “Nza zi tiva lezaku Jehova ngha a vunile wasati loye hi ndlela yo kari lezaku a tiva lisine, kanilezi hi kota ya ku tira lomu ku nga ni xilaveko, hi zi kotile ku kuma munhu loyi wo fana ni yivu hi mu vuna lezaku a tiva Jehova. Lezo zi maha xipanze xa makatekwa ya hombe ka wontlhe hi ma kumileko wutomini ga hina!” Kota kuwula ka Erica, “loku u vuna munhu lezaku a tiva Jehova, u kuma litsako la hombe nguvu!”

Ka matiko yo tala, ku na ni xilaveko xa hombe xa vaxumayeli va Mufumo. Xana wena u ngava munwe wa lava va rurako vaya lomu ku nga ni xilaveko? Kombela Jehova hi mukhongelo lezaku a tiyisa a kuxuva ka wena ka ku lava ku anzisa a wutireli ga wena. Bhula hi mhaka leyo ni madota ya laha bandleni, kutani muwoneleli wa xipanze, hambu lava va tshukileko vava ni lungelo ga ku ya tira lomu ku nga ni xilaveko. Loku a makungo ya wena ma sangula ku tiya, tsalela a ravi legi gi wonelelako a xipanze lexi u tsakelako ku ya tira ka xona lezaku u kuma mahungu yo engeteleka. * Kuzilava wenawu u nga nghena ka ntlawa wa makume ya mazana ya vamakabye va xinuna ni va xisati—vaswa ni vahombe, magwenza ni vachadileko—lava va ti hendleletileko hi kuziranza va tlhela vazwa litsako la ku “tshovela nguvu.”