JESU, a kutala ka zvikhati i wa gondzisa xungentano hi mukhongelo. Masikwini yakwe, a varangeli va wukhongeli va vaJudha va wa khongela “lomu mahandzakanyeni ya maruwa ya hombe”. Hikuyini? “Kasi va woniwa hi vanhu.” Zvi te dlunya lezvaku va wa lava ku hlamaliwa hi kota ya kuhiseka kabye. A votala va wa maha mikhongelo yo leha, va wulawula zvalezvi zva zvin’we khati ni khati va khongelako, a ku khwatsi hi loku zvo lava ku “tatela magezu” kasi a mukhongelo wu zwiwa. (Matewu 6:5-8) Jesu i wulile lezvaku a mahela lego a gi vhuni nchumu, hi ndlela leyo, a vhuna lava va timbilu tinene a ku tiva lezvi va nga fanele ku zvi potsa mikhongelweni yabye. Kanilezvi i mahile zvo hundza ku va gondzisa lezvi va nga faneliko ku khongelisa zvona.

Jesu i gondzisile lezvaku a mikhongelo ya hina yi fanele ku kombisa lezvaku ha xuva a ku wona a kubasisiwa ka vito ga Nungungulu, kuta ka Mufumo wakwe, niku a kurandza kakwe ku mahiwa. Jesu i gondzisile kambe lezvaku zvinene a ku kombela Nungungulu lezvaku a hi vhuna ka zvilo zva hina wutsumbu. (Matewu 6:9-13; Luka 11:2-4) Hi ku tirisa a mifananiso, Jesu i kombile lezvaku kasi a mikhongelo ya hina yi zwiwa hi fanele ku phindaphinda ku khongela hi tlhela hiva ni kukholwa ni kutikoramisa. (Luka 11:5-13; 18:1-14) Niku i tiyisile lezvi a nga gondzisa hi cikombiso ca yena wutsumbu. — Matewu 14:23; Marku 1:35.

Handle ko kanakana, lezvi Jesu a nga gondzisa zvi vhunile a vapizani vakwe a ku chukwatisa a mikhongelo yabye. Hambulezvo, Jesu i rindzele kala ka wusiku gakwe go gumesa laha misaveni kasi a gondzisa a vapizani vakwe a mhaka ya lisima nguvhu xungetano hi mukhongelo.

Ka wusiku gakwe go gumesa, Jesu i mbhetile cikhati co leha na a tiyisa a vapostoli vakwe vo tsumbeka. Ci wa chikele a cikhati ca ku a va tivisa a zvilo zva zviswa. Jesu i te: “Mina ndzi ndlela, ni lisine, ni wutomi. A ku na munhu a tako ka Papayi na a ngati hi laha ka mina.” Hi ndzhako ka cikhati, i no va nyika a citsumbiso leci co tsakisa, aku: “Ni cihi mu kombelako hi vito ga mina, ndzi ta ci maha, kasi Papayi a fela ku dhumiswa hi laha ka N’wana. Ni cihi mu to kombela hi vito ga mina, ndzi ta ci maha.” Kugumeseni ka mabhulo yakwe, i te: “Kala lezvi a mu se kombela nchumu hi vito ga mina. Kombelani mu ta nyikiwa, kasi a kutsaka ka n’wina ku fela ku mbhelela.” — Johani 14:6, 13, 14; 16:24.

A magezu lawo ma wa hi ya lisima nguvhu. A bhuku go kari gi ma tlhamusela kota “kucica ka hombe matin’wini ya mukhongelo”. Jesu i wa nga wuli lezvaku a mikhongelo yi fanele ku tsika kuya ka Nungungulu yiya ka yena. Kanilezvi i wo vhulula a ndlela yiswa ya ku tshinela ka Nungungulu.

Hi lisine, contlhe cikhati Nungungulu i wa ingisela a mikhongelo ya malandza yakwe yo tsumbeka. (1 Samuweli 1:9-19; Lisimu 65:2) Hambulezvo, kusukela a cikhati leci Nungungulu a nga maha a civhumelwano ca Nayo ni vaIzrayeli, lava va nga lava lezvaku a mikhongelo yabye yi zwiwa va wa fanele ku vhumela lezvaku Izrayeli gi wa hi tiko gi hlawulilweko hi Nungungulu. Hi ndzhako ka cikhati, cikhatini ca Solomoni, va wa fanele ku vhumela lezvaku a tempeli hi gona wutshamu legi Nungungulu a gi hlawulileko kasi ku nyikela kona miphahlo. (Dhewuteronome 9:29; 2 Kronekele 6:32, 33) Kanilezvi, a makhozelela lawo ma wa hi ya cikhatanyana basi. Kota lezvi zvi tsalilweko hi mupostoli Pawule, a Nayo lowu wu nyikilweko vaIzrayeli ni miphahlo yi nga nyikelwa tempeleni zvi wa hi “ndzhuti wa zvilo zva zvinene lezvi zva ha tako, kanilezvi na wu nga hi wona wu nga zvilo zva kona”. (Mahebheru 10:1, 2) A ndzhuti wu wa fanele ku vhaletiwa hi nchumu wa lisine. (Va Le Kolosi 2:17) Kusukela hi 33 Nguveni ya Hina, kasi a munhu ava ni wunghana na Jehovha a zva ha lavi lezvaku a landzela a Nayo wa Mosi. Wutshan’wini ga lezvo, zvi lava lezvaku a ingisa loyi a wuliwako hi Nayo — Kristu Jesu. — Johani 15:14-16; Va Le Galatiya 3:24, 25.

Jesu i yimisile a ndlela yo tlakuka nguvhu ya ku hi tshinela ka Jehovha, a ti tivekisa kota munghana wa ntamu, loyi a vhulako ndlela ya ku a mikhongelo ya hina yi zwiwa yi tlhela yi hlamuliwa hi Nungungulu. Cini ci mahako lezvaku zvi koteka ku Jesu a hi mahela lezvo?

Kota lezvi hontlheni hi pswalilweko ni ciwonho, a ku na ntiro hi nga mahako kutani miphahlo hi nga nyikelako leyi yi nga hi basisako ka noda ya ciwonho kutani ku hi nyika a fanelo ya kuva ni wunghana ni Nungungulu wa hina wo basa, Jehovha. (Va Le Roma 3:20, 24; Mahebheru 1:3, 4) Kanilezvi, Jesu i nyikele a wutomi gakwe go mbhelela kota munhu a hakhela a zviwonho zva vanhu. (Va Le Roma 5:12, 18, 19) Makunu vontlhe va lavako ku tsetselelwa a zviwonho zvabye va na ni lungelo ga ku woniwa kota vanhu vo basa mahlweni ka Jehovha ni ku ‘wulawula hi kutlhatlheka’ mahlweni ka Nungungulu — kanilezvi ntsena loku va kombisa kukholwa ka muphahlo wa Jesu ni ku khongela vitweni gakwe. — Va Le Efesusi 3:11, 12.

Loku hi khongela hi vito ga Jesu, hi kombisa kukholwa hi matlhelo manharu hi wutsongwani ga kona ka ntiro wakwe kutatisekeni ka makungo yakwe: 1) Hi yena “Yivhana ya Nungungulu” leyi a muphahlo wa yena wu yimisako ciseketelo ca ku hi tsetselelwa a zviwonho. 2) I vhuxilwe hi Nungungulu niku zvezvi i tira kota “mupristi wa hombe” na a wonelela a makatekwa ma to tisiwa hi hakhelo ya kutlhatlhisa. 3) Hi yena yece a “ndlela” ya ku hi tshineta ka Nungungulu hi mukhongelo. — Johani 1:29; 14:6; Mahebheru 4:14, 15.

Loku hi khongela hi vito ga Jesu zvi mu nyika wudzundzo. A wudzundzo lego ga mu ringana, hakuva kurandza ka Jehovha lezvaku “vitweni ga Jesu, a madzolo wontlhe ma khizama . . ., ni tirimi tontlhe ti vhumela kubaseni lezvaku Jesu Kristu i Hosi, kasi ku dhumisiwa Nungungulu, a Papayi.” (Va Le Filipi 2:10, 11) Hambulezvo, a ca lisima nguvhu ku a kukhongela hi vito ga Jesu zvi dhumisa Jehovha, loyi a nga nyikela a N’wana wakwe hi kota ya hina.— Johani 3:16.

Kasi hi zwisisa a kukula ka ntiro wa Jesu, a Bhibhiliya gi tirisa a zvikhundla ni mavito yo tala kasi ku mu tlhamusela. Lezvo zvi hi vhuna ku zwisisa a makatekwa yo tala lawa hi ma kumako ma seketelwako ka lezvi Jesu a mahileko, a mahako, ni lezvi a to zvi maha kasi ku hi vhuna. (Wona a kwadru “ Ntiro wa lisima wa Jesu”.) Kunene, Jesu i nyikilwe “vito gi nga hehla ka mavito wontlhe.”  a I nyikilwe a ntamu wontlhe le tilweni ni laha misaveni. — Va Le Filipi 2:9; Matewu 28:18.

Kunene, loku hi lava ku a mikhongelo ya hina yi zwiwa hi Jehovha, hi fanele ku maha a mikhongelo ya hina hi vito ga Jesu. (Johani 14:13, 14) Kanilezvi a magezu lawa yaku “hi vito ga Jesu” a hi lavi ku ma phindaphinda kasi ku tatisa nayo basi. Hikuyini?

Wona a mufananiso lowu. Loku u amukela papilo hi ka koponi yokari, gi tala ku dayelela hi magezu yaku: “hi kukhatala kontlhe.” U alakanya lezvaku a magezu lawo futsi-futsi ma huma hi mbilwini yakwe kutani mova ndlela basi ya ku dayelela mapapilo yakwe? A ku tirisa a vito ga Jesu mikhongelweni ya hina zvi fanele kuva zva lisima nguvhu a hundza lezvi ma tirisisiwako zvona a magezu yo dayelela a mapapilo ya mabhindzu. Hambu lezvi hi faneleko ku ‘khongela hi nga tsiki’ hi fanele ku ‘khongela hi mbilu ya hina yontlhe’ na ku nga hi ku fela ku tatisa nayo basi. — 1 Va Le Tesalonika 5:17; Lisimu 119:145.

Hi nga potsisa kuyini ku tirisa magezu “hi vito ga Jesu” kasi ku tatisa nayo basi? Hikuyini u nga ehleketiko hi matshamela ya Jesu yo khumba nguvhu mbilu. Alakanyela hi lezvi a sinako a ku mahele ni lezvi a xuvako ku ku mahela. Ka mukhongelo wa wena, bonga Jehovha hi ndlela leyi a tirisako a n’wana wakwe hi yona. Laha u mahako lezvo, u ta ci tsumba nguvhu a citsumbiso ca Jesu caku: “Ni cihi leci mu to ci kombela ka Papayi, i ta mu nyika hi vito ga mina.” — Johani 16:23.