EDHENI​—Xana Wuve Wona Muti Wo Sangula Wa Vanhu?

HI NGA ti alakanyela na u hi jardhim. Seyo a ku na zvilo zva ku ku colopetela kutani guwa ga lomu madhoropeni ya hombe. A jardhim leyo ya hombe, niku ku na ni kurula ka hombe. A ca ci nene nguvhu, hi ku ka wutshamu lego, a wu karateki hi nchumu, u ni lihanyo la li nene, a wu babyi kutani kuzwa kubayisa. Wa ti buza hi zvontlhe lezvi zvi nga matlhelweni ya wena.

A matihlo ya wena ma ti buza hi ku cuwukisela a zvitsangi zvo saseka, ni mati yo saseka ya congo ma khulungako, ni matluka ni byanyi go nyuka gi nga laha mun’wini ni laha ndzhutini. A miri wa wena wu biwa hi zvimoyana zva zvinene u tlhela uzwa a kunuhela ku tako ni zvimoyana lezvo. Uzwa a guwa ga matluka, ni guwa ga mati ma bako maribye, ni zvinyanyani zvi yimbelelako ni guwa ga zviharana zvin’wani. Laha u alakanyelako a zvilo lezvi, a wu zvi naveli a kuva ka wutshamu go fana ni lego?

Misaveni yontlhe, ku na ni vanhu va kholwako lezvaku kusanguleni a vanhu va wa tshama ka wutshamu go fana ni legi. Hi mazanazana ya malembe, lava va nga ka wukhongeli ga ciJudha, ga mawunwa ni ga ciSulumani va gondzile xungetano hi Jardhim ya Edheni, a wutshamu legi Nungungulu a nga mu vekile kona Adhamu na Evha. A Bhibhiliya gi komba lezvaku a patswa lowu wu wa hanya wutomi ga ku rula ni go tsakisa. Vona vambiri va wa hi ni kurula, kurula ni zvihari, kurula na Nungungulu, loyi hi kuzvirandza a nga va nyikile a kutsumba ka ku hanya kala kupindzuka ka wutshamu lego go saseka. — Genesisi 2:15-24.

A vaHindu vonawu va na ni mawonela yabye xungetano hi paradhise legi gi vileko kona kale. A vaBudha va kholwa lezvaku a varangeli vabye, a vaBudha, va humelele ka cikhati leci a misava yi nga ku khwatsi i paradhesi. A wukhongeli go tala ga Afrika gi gondzisa a mahungu ma yelanako nguvhu ni matimu ya Adhamu na Evha.

Kunene, a maalakanyo lawa yaku ku tshukile kuva ni paradhise ma tolovelekile nguvhu ka wukhongeli go tala ni ka mikhuwo ya vanhu. A mutsali wo kari i te: “A kale, a vanhu va kutala va wa kholwa lezvaku a vanhu vo sangula va hanyile paradhiseni lomu a zvilo zvontlhe zvi nga mbhelele. Va wa nga chavi nchumu niku va wa hi ni zvontlhe zvi nga laveka kasi va tsaka. . . . A gondzo leyi yi mahile votala va navela a paradhise legi gi lahlekileko ni ku zama a ndlela ya ku gi vhuxa.”

Xana a matimu lawo wontlhe ni mikhuwo ya kona zvi sukela ka wutshamu gin’we? Xana a vanhu va matshamu yo hambana a vova ni matimu yo fana xungetano hi paradhise hi kota ya lezvi a jardhim ga Edheni, na Adhamu na Evha va vileko kona hakunene?

Lava va nga kholwiko a va vhumeli a mhaka leyo. Ka cikhati leci ca siensia, a vanhu vo tala va alakanya ku a matimu lawa tikaringani ntsena niku mawunwa. Kanilezvi leci ci hlamalisako nguvhu hi lezvaku a kutala ka vanhu lava va nga kholwiko, varangeli va wukhongeli va kucetelako vanhu lezvaku va nga kholwi ku a jardhim ya Edheni yive kona. Vona va wula ku a wutshamu lego a gi tshukangi giva kona. Va tlhela va wula lezvaku a matimu lawa ya Bhibhiliya a hi lisine, ya ku fananisa ntsena, mawunwa niku likaringani.

Lisine lezvaku a Bhibhiliya gi na ni mifananiso, niku a mifananiso yo tiveka nguvhu yi wulilwe hi Jesu. Kanilezvi, a Bhibhiliya gi komba ku a matimu ya Edheni a hi mufananiso kanilezvi matimu ya lisine. Ahandle ka lezvo, loku ku hi ku a zvimaho lezvi zvi wuliwako a zvi tshukangi zvi maheka, hi nga zvi tsumbisa kuyini a zvilo lezvi zvin’wani zvi nga lomu ka Bhibhiliya? A hi kambisiseni ku hikuyini a vanhu vo kari va nga kholwiko lezvaku a jardhim ya Edheni yive kona hi tlhela hi wona ku a zvigelo zvabye zva zwala. Hi ndzhako hi ta wona ku hikuyini a mun’we ni mun’wani wa hina a faneleko ku chela kota hi matimu lawo.