A Bhibhiliya gi ponile a ku bola, ni kuvhukelwa ka hombe, ni mizamo ya vanhu ya ku cica ha womu a mahungu ya gona. Hi kota ya lezvo, nyamutlha ha zvi kota kuva ni Bhibhiliya ni ku gi lera. Niku loku u hlawula a wuhundzuluseli ga ginene ga Bhibhiliya, u nga tiyisela lezvaku u lera a mahungu yalawa ma nga hi ka mitsalo yo sangula. a Kanilezvi hikuyini a Bhibhiliya gi nga pona, a kutala ka zvikhati hi ndlela yo hlamalisa? Hikuyini a bhuku legi gi nga go hlawuleka?

A kutala ka vagondzi va Bhibhiliya va chikelele a magumo yo fana ni lawa ya mupostoli Pawule, loyi a nga tsala ku: “A Mitsalo yontlhe yi pimisilwe hi Nungungulu.” (2 Timote 3:16) Va kholwa lezvaku a Bhibhiliya gi ponile a kulovisiwa hakuva i Mhaka ya Nungungulu niku Nungungulu i gi hlayisile kala masikwini ya hina. Faizal, loyi a nga kumbukiwa ka ndzima yo sangula ya revhista legi, i bohile a ku gondza a Bhibhiliya kasi ku pola ku lezvo lisine ke. Lezvi a nga gondza zvi mu hlamalisile nguvhu. I no tekela ku wona lezvaku a kutala ka tigondzo ta wukhongeli legi gi ti wulako ku maKristu a ti kona lomu ka Bhibhiliya. Ahandle ka lezvo, i tsakile nguvhu hi ku wona a kungo ga Nungungulu hi misava kota lezvi zvi kombisiwako ka Mhaka Yakwe.

I ngalo: “Makunu ndza kholwa lezvaku a Bhibhiliya legi ndzi nga nago cinyikiwo ci tako hi ka Nungungulu. Loku Nungungulu a vile ni ntamu wa ku maha wuako, i wa nga tava ni ntamu kambe wa ku hi nyika a Bhibhiliya ni ku gi hlayisa ke? A kungakholwi lezvo zvi wa tava ku kalala a ntamu wa Nungungulu. Kova mina mani wo kala ndzi kalala a ntamu wa Nungungulu?” — Isaya 40:8.