Laha a malembe ma yako ma famba, a vanhu vo kari va chadhileko va sangula ku hi kutsongwani-kutsongwani va nga ha kombisani lirandzo. Loku ku hi ku hi zvona zvi humelelako wukatini ga wena, zvini u nga mahako?

•  Lezvi u faneleko ku zvi tiva

•  Lezvi u nga mahako

 A ku kombisa lirandzo zva lisima nguvhu kasi ku tiyisa wukati. Kasi a munhu ava ni miri wa wunene ni lihanyo linene ku laveka ku a tshama hi kuga zvakuga ni kunwa mati. Hi kufanana, kasi a wukati gi tiya zva lisima nguvhu a ku a nuna ni sati va tshama hi ku kombisana lirandzo. Hambu loku va hi ni malembe yo tala na va chadhile, a nuna kutani sati wa zvi lava ku tshama hi ku tiyisekisiwa hi nuna kutani sati wakwe lezvaku wa randziwa niku wa lisima ka yena.

 A lirandzo la lisine a li ti laveli zva lona basi. A lirandzo li karatekela ku a mun’wani a tsaka. Hikwalaho, wutshan’wini ga ku kombisa lirandzo loku yena a zvi lava, a nuna wa munene kutani sati wa munene i zama ku pola lezvi zvi nga cilaveko ka nuna kutani sati wakwe a gumesa a zvi maha.

 Hi tolovelo, a vasati va zvi lava nguvhu ku kombisiwa lirandzo a ku hundza a vanuna vabye. A nuna a nga mu randza nguvhu a sati wakwe. Kanilezvi loku a mu byela ku wa mu randza kusanguleni ka siku ni kugumeseni ka siku kutani loku va nga se hlengela masango, kuzvilava a sati a nga kanakana ku a nuna wakwe wa mu randza futsi. Zva lisima nguvhu a ku mu kombisa lirandzo makhati yo tala ndzeni ka siku.

 Kombisa lirandzo hi magezu. A magezu ya matsongwani yo kota ku “ndza ku randza” kutani ku “wena u wa lisima ka mina” ma nga maha a nuna kutani sati a tizwa na a randziwa.

 Tshinya ga nayo ga Bhibhiliya: “A nomu wu wulawula lezvi zvi teleko mbilwini.” — Matewu 12:34.

 Mawonela: Ti tele a tindlela ta ku komba a nuna kutani sati wa wena lezvaku wa mu randza. U nga mu tsalela cipapilwana, e-mail kutani mesaji.

 Kombisa lirandzo hi mitiro. A ku mu bharasara, ku mu pswopswa, hambu ku khomana mandla basi i ndlela ya ku komba lezvaku a wu farisi loku uku “ndza ku randza”. U nga kombisa lirandzo la wena kambe hi ku mu khumba, ku mu cuwuka hi ndlela ya lirandzo, kutani hi kuta na u mu nyika cinyikiwo. Ahandle ka lezvo, u nga vhuna a sati wa wena. Hi cikombiso, u nga mu rwalela mindzhava, ku mu vhulela livati, ku hlazva zvibya, ku hlazva tinguwo ni ku bhika. Ka vasati vo tala, loku a vanuna vabye va va vhuna hi ku maha lezvo vo komba ku va va randza!

 Tshinya ga nayo ga Bhibhiliya: “Hi nga randzi hi magezu ni lirimi basi, kanilezvi a hi randzeni hi mitiro”. — 1 Johani 3:18.

 Mawonela: Mu khome khwatsi a sati wa wena kutani nuna wa wena a ku khwatsi hi cikhati leci mu nga ha namorara.

 Ti nyikeni cikhati ca ku tshama zvin’we. A kuva ni cikhati ca ku tshama zvin’we na mu hi n’wece zva tiyisa a wukati niku zvi komba a nuna wa wena kutani sati wa wena lezvaku wa tsaka hi kuva naye. Lisine ku zvi nga tshuka zvi karata a ku kuma cikhati ca ku tshama zvin’we na mu hi n’wece loku mu hi ni vana kutani zvilo zvo tala zva ku zvi maha siku ni siku. Kuzvilava mu nga boha a ku maha nchumu wo olovanyana wo kota ku mu paseyara zvin’we hi kukhandzakanya na mu hi n’wece.

 Tshinya ga nayo ga Bhibhiliya: “Mu fela ku tiva lezvi zvi nga zva lisima nguvhu”. — Va Le Filipi 1:10.

 Mawonela: A mipatswa yo kari yi ti vekela siku ga kuva ni jantari yo hlawuleka ka wutshamu go kari ga ginene kutani ku tshama na va hi voce hi kumbhela ka vhiki.

 Mu tive khwatsi a nuna kutani sati wa wena. A munhu ni munhu i lava ku kombisiwa lirandzo hi ndlela yakwe. Bhulani hi lezvi a mun’we ni mun’wani wa n’wina a lavako ku kombisiswa zvona lirandzo ni loku ku hi ni cilaveko ca ku mu engetela ku kombisana lirandzo. Andzhako ka lezvo, maha zvontlhe u zvi kotako kasi ku tatisa a cilaveko leco. Alakanya lezvi: a ku kombisa lirandzo zva lisima nguvhu kasi ku tiyisa a wukati.

 Tshinya ga nayo ga Bhibhiliya: “A lirandzo . . . a li ti laveli zva lona basi”. — 1 Va Le Korinte 13:4, 5.

 Mawonela: Wutshan’wini ga ku londza ku kombisiwa lirandzo, ti wutise lezvi: ‘Zvini ndzi nga mahako kasi a nuna wa mina kutani sati wa mina a ndzi randza nguvhu?’