“Ndzi wa zamile ku lera a Bhibhiliya kanilezvi ndzi chavisilwe hi kukula ka gona!” — Briana, 15.

 Xana u ti zwisa lezvo? A ndzima leyi yi nga ku vhuna!

•  Hikuyini ndzi faneleko ku lera a Bhibhiliya?

•  Ndzi fanele ku gi lerisa kuyini?

•  Lezvi a vaswa-kuloni va wulako

 Zva ku godholisa a ku ehleketa hi ku lera Bhibhiliya? Loku zvi tshamisile lezvo, zva zwisiseka. Phela a Bhibhiliya gi na ni 1000 wa mapajina ni kuhundza, gi tsalilwe hi maletra ya matsongwani niku a gi na mifota — hikwalaho a hi nge gi fananisi ni ku sixtira a televhizawu ni tivhidhio!

 Kanilezvi hi nga zvi ehleketa hi ndlela leyi: Loku a wo thumba a kofre ya hombe ya kale u wa nga ta lava ku tiva lezvi zvi nga lomo?

 A Bhibhiliya gi fana ni kofre leyo. Gi na ni titshomba to tala ta wutlhari, leti ti nga ku vhunako a

•   ku maha zviboho zva zvinene

•   ku zwanana ni vapswali va wena

•   ku kuma vanghana va vanene

•   kulwa ni citresi

 Zvi mahisa kuyini ku a bhuku lego ga kale nguvhu gi vhuna masikwini ya hina? Hiku “a Mitsalo yontlhe yi pimisilwe hi Nungungulu”. (2 Timote 3:16) Lezvo zvi wula ku a wusungukati ga Bhibhiliya gita hi ka Cibuka ca cinene nguvhu ka zvontlhe.

 A ndlela yo sangula ku lera a Bhibhiliya kusukela kusanguleni kala magumo. Lezvo zvi ta maha ku uva ni mongo-tshinya wa mahungu ya Bhibhiliya. Ku na ni tindlela to tala ta ku lera a Bhibhiliya. Wona a zvikombiso zvimbiri:

•    U nga lera a 66 wa mabhuku ya Bhibhiliya hi kuya hi lezvi ma nga xaxametiswa zvona, kusukela ka Genesisi kala ka Kuvhululelwa.

•    U nga lera a Bhibhiliya hi ku landza a xaxameto wa lezvi a matimu ma nga mahekisa zvona.

 Mawonela: Ka Apendise A7 ya Wuhundzuluseli ga misava yiswa ku xaxametilwe a zvimaho zva wutomi ga Jesu ga laha misaveni hi kuya hi lezvi zvi nga mahekisa zvona.

 A ndlela ya wumbiri ku hlawula matimu ma yelanako ni cikarato leci u lwako naco. Hi cikombiso:

•   Wa zvi lava kuva ni vanghana vo tsumbeka? Lera a matimu ya Jonatani na Dhavhidha. (1 Samuweli, zvipimo 18-20) Andzhako ka lezvo, zama ku pola a matshamela ya manene lawa Dhavhidha a nga hi nawo ma nga maha ku Jonatani a lava kuva munghana wakwe.

•   U lava kuva ni ntamu wa ku hlula zviringo? Lera matimu ya lezvi Josefa a nga hlulisa zvona a ciringo. (Genesisi, cipimo 39) Andzhako ka lezvo, zama ku pola lezvi u nga gondzako ka matimu lawo.

•   Wa zvi lava ku tiva lezvi a mukhongelo wu nga ku vhunisako zvona? Lera a matimu ya Nehemiya. (Nehemiya, cipimo 2) Andzhako ka lezvo, zama ku pola a cikombiso ca lezvi Nungungulu a nga hlamulisa zvona a mukhongelo wa Nehemiya.

 Mawonela: Laha u lerako a Bhibhiliya, hlawula a wutshamu ga ku rula kasi u zvi kota ku veka kupima ka lezvi u lerako.

 A ndlela ya wunharu ku lera a matimu yo kari kutani lisimu lo kari u gumesa u wona lezvi u nga zvi tirisisako zvona. Andzhako ka ku lera, ti wutise a zviwutiso lezvi:

•    Hikuyini Jehovha a nga chela mahungu lawa lomu ka Bhibhiliya?

•    A mhaka leyi yi ndzi byela yini hi wumunhu ga Jehovha kutani ndlela leyi a mahako hi yona zvilo?

•    Ndzi nga ma tirisisa kuyini a mahungu lawo wutomini ga mina?

 Mawonela: Ti vekele mixuvo! Hlawula a siku ga ku u sangula ku lera a Bhibhiliya.