A kambisiso wo kari wu mahilweko Estados Unidos wu kombile lezvaku a 80 wa tipursentu ni kuhundza ta vaswa va seyo va tala ku khongela kanilezvi ntsena a khihlanya ga vona hi vona va khongelako siku ni siku. Handle ko kanakana, a vaswa vo kari va ti wutisa ku: ‘Xana a mukhongelo i nchumu hi wu mahako kasi ku pepisa mapimo basi kutani wa vhuna?’

•  Cini a mukhongelo?

•  A ku hakunene Nungungulu wa wu ingisela?

•  Ndzi nga khongela hi yini?

•  Lezvi a vaswa-kuloni va wulako

 A mukhongelo i ndlela ya ku wulawula ni Muvangi wa zvilo zvontlhe. Hi nga ehleketa hi lezvi lezvo zvi wulako zvona! Jehovha i tlakukile a ku hundza a vanhu hi tindlela tontlhe, hambulezvo ‘a nga kule ka mun’we ni mun’wani wa hina.’ (Mitiro 17:27) Kunene a Bhibhiliya ga hi kuca, giku: “Tshinelani ka Nungungulu, na yena i ta tshinela ka n’wina.” — Jakobe 4:8.

 U nga tshinelisa kuyini ka Nungungulu?

•   A yin’we ya tindlela ku khongela, leyo hi yona a ndlela ya ku u wulawula na Nungungulu.

•   A yin’wani ndlela ku gondza a Bhibhiliya — i ndlela ya ku Nungungulu “a wulawula” na wena.

 A tindlela leti ta timbiri ta ku bhulisana, a mukhongelo ni ku gondza a Bhibhiliya, ti ta ku vhuna a ku aka a wunghana go tiya na Nungungulu.

 “A ku wulawula na Jehovha — a munhu a Tlakukileko ku Hundza Vontlhe — i thomo go hlawuleka nguvhu legi a vanhu va nga nago.” — Jeremy.

 “A ku byela Jehovha hi mukhongelo lezvi zvi nga mbilwini ya mina zvi ndzi maha ndzi tizwa kusuhani naye.” — Miranda

 Hambu loku u kholwa ka Nungungulu ni loku u khongela kakwe, kuzvilava zvi nga ku karatela a ku kholwa lezvaku hakunene wa ingisela a mikhongelo ya wena. Hambulezvo, a Bhibhiliya gi vitana Jehovha ku: “Muzwi wa mikhongelo”. (Lisimu 65:2) Gi tlhela gi ku kuca ku u ‘hoxela a kukarateka ka wena kontlhe hehla kakwe’. Hikuyini? ‘Hakuva wa khatala hi wena.’ — 1 Pedro 5:7.

 Ehleketa hi lezvi: Wa ti nyika a cikhati ca ku bhula ni munghana wa wena hi kukhandzakanya ke? U nga maha zvo fana na Nungungulu. Bhula naye hi kukhandzakanya hi mukhongelo na u tirisa a vito gakwe ga ku Jehovha. (Lisimu 86:5-7; 88:9) Kunene, a Bhibhiliya gi ku kuca ku u ‘khongela u nga tsiki.’ — 1 Va Le Tesalonika 5:17.

 “A mukhongelo mabhulo ya mina ni Papayi wa mina wa le tilweni, laha ndzi mu vhululelako a mbilu ya mina yontlhe.” — Moises.

 “Ndzi wulawula na Jehovha hi zvilo zvo eta, a ku khwatsi hi loku ndzi wulawula na mamani kutani munghana wa mina wa hombe.” — Karen.

 A Bhibhiliya gi ngalo: “Zvilweni zvontlhe, hi ku khongela ni ku khongotela na mu kari mu bonga, tivisani Nungungulu zvontlhe lezvi zvi mu karatako”. — Va Le Filipi 4:6.

 Xana lezvo zvi wula ku zvinene a ku khongela hi zvikarato zva wena? Ina! A Bhibhiliya gi wula lezvi: “Hoxela a ndzhwalo wa wena ka Jehovha, i ta ku seketela.” — Lisimu 55:22.

 Ka mikhongelo ya wena ka Nungungulu a wu faneli ku wulawula hi zvikarato zva wena basi. A nhanyana wo kari waku hi Chantelle i wulile lezvi: “Gi wa nga tava wunghana ga ginene loku a ndzo tshamela ku kombela kuvhuniwa basi ka Jehovha. Ndzi alakanya lezvaku a ku sangula ndzi fanele ku bonga niku zvi tele a zvilo lezvi ndzi nga mu bongako.”

 Ehleketa hi lezvi: Hi zvihi a zvilo u nga nazvo wutomini ga wena u zvi bongako? Ku na ni zvilo zvinharu u alakanyako ku u nga mu bonga hi zvona Jehovha nyamutlha ke?

 “Hambu a zvilo zva zvi tsongwani, zvo fana ni ku wona a citsangi co saseka, zvi nga ku maha u navela ku khongela u bonga Jehovha.” — Anita.

 “Ehleketa hi nchumu wo kari wu ku tsakisako ka zvivangwa kutani vhesi go kari ga Bhibhiliya gi ku khumbako, u gumesa u mu bonga hi zvona.” — Brian.