A cifanyana co kari ca ku hi Will ci wula lezvi: “A ku lera a Bhibhiliya zvi nga ku khwatsi zva swira loku u nga yi tivi a ndlela ya yi nene ya ku lera.”

 Wa zvi lava ku tiva a ndlela ya ku zvi ku tsakisa a ku lera a Bhibhiliya? A ndzima leyi yi ta ku vhuna.

• Maha ku lezvi u zvi lerako zvi hanya

• Hlola!

• Lezvi a vaswa-kuloni va wulako

 Patseka ka lezvi u lerako. U nga maha lezvi:

1.   Langa a matimu ya Bhibhiliya u tsakelako ku ma gondza. U nga langa cimaho co kari ci nga lomu ka Bhibhiliya, vhesi go kari gi nga ka gin’we ga mabhuku ya tiIvhangeli, kutani matimu yo kari ma nga ka xaxamelo wa kuleriwa ka Bhibhiliya hi wudrama, wu nga ka jw.org.

2.   Lera a matimu. U nga lera wece kutani ku lera hi gezu go tlakuka ni vanghana va wena kutani ngango wa wena. A mun’we a nga maha muhlawuteli, a van’wani va lera a zvipandze lezvi zvin’wani zva lava va patsekako ka matimu lawo.

3.   Ka mawonela lawa ma landzelako, zama ku tirisa a wonela gin’we kutani yo tala:

   •   Tsala dhezenyo kutani midhezenyo yo kala ku karata yi tlhamuselako lezvi a zvimaho lezvo zvi nga mahekisa zvona hi ku landzelelana ka zvona. Tsala magezu ma tlhamuselako lezvi zvi mahekako ka dhezenyo wun’we ni wun’wani.

   •   Tsala madhiyagrama. Hi cikombiso, a cikhati u lerako a matimu ya munhu wo kari wo tsumbeka, komba lezvi a matshamela ni zvimaho zva munhu loye zvi yelanisako zvona ni makatekwa lawa a ma kumileko.

   •   Cica a matimu lawo ma ku khwatsi mahungu ya zvilo zva ha hi ku mahekako. Hlawutela a mahungu lawo hi mawonela yo hambanahambana, u patsa ni ku “entrevhistara” loyi ku wulawuliwako nguvhu hi yena ka matimu lawo ni lava va nga zvi wona ni ku maheka.

   •   Loku a wokari ku wulawuliwako hi yena ka matimu lawo a mahile zviboho zva wupumbu zama ku alakanyela lezvi zvi nga wa ta ngha zvi mahekile loku i wa no maha zviboho zva wutlhari. Hi cikombiso, ehleketa hi cikhati leci Pedro a nga ala Jesu. (Marku 14:66-72) Pedro na a hlamulisile kuyini hi ndlela ya wutlhari?

   •   Loku u lava ku a matimu ya wena ma hanya nguvhu, tsala a drama ya wena yi seketelwako ka matimu ya Bhibhiliya. Tlhela u patsa ni zvigondzo hi nga zvi gondzako ka matimu lawo ya Bhibhiliya. — Va Le Roma 15:4.

 Loku u hlolisisa a mitlhamuselo ya matimu u nga kuma a titshomba ti fihleleko. Hi lisine, ka zvikhati zvin’wani, a gezu gin’we basi kutani mambiri ma nga ka matimu ya Bhibhiliya ma nga tlhamusela zva hombe.

 Hi cikombiso, fananisa Matewu 28:7 na Marku 16:7.

•    Hikuyini Marku a patsileko a tlhamuselo lowu wa ku Jesu i wa ta woneka ndzeni ka cikhatanyana ka vapizani ni “ka Pedro”?

•  Wonela: Marku a nga zvi wonangi hi mahlo a zvimaho lezvi, zvi wonekisa ku khwatsi i no byeliwa a mahungu lawa hi Pedro.

•  Tshomba yi fihleleko: Hikuyini Pedro a nga tsaka a cikhati leci a ngazwa lezvaku Jesu i wa lava ku tlhela a mu wona? (Marku 14:66-72) Jesu i zvi kombisile kuyini ku i wa hi munghana wa lisine wa Pedro? U nga mu pimanyisisa kuyini Jesu ni kuva munghana wa lisine ka van’wani?

 Loku u maha lezvaku a Mitsalo yi hanya u tlhela u hlola a mitlhamuselo, a kulera ka Bhibhiliya ka tsakisa nguvhu!