Makhati mambiri hi vhiki, a Vakustumunyu va Jehovha va maha mitlhangano ka matshamu yabye yo khozela kona ma vitaniwako ku Tisalawu ta Mufumo. Zvini zvi mahekako kwaseyo niku u nga vhunekisa kuyini hi kuva ka yona?

•  Zvini zvi mahiwako lomu ka Salawu ya Mufumo?

•  Hikuyini u faneleko kuva kona?

•  Lezvi a vaswa-kuloni va wulako

 A Salawu ya Mufumo wutshamu legi a vanhu va tlhanganako kona nguvhunguvhu kasi ku gondza lezvi a Bhibhiliya gi nga va vhunisako zvona ka wutomi ga siku ni siku. A mitlhangano leyo yi nga ku vhuna ku:

•   gondza lisine xungetano hi Nungungulu.

•   ku zwisisa a tlhamuselo wa zvilo lezvi zvi mahekako nyamutlha.

•   kuva munhu wa munene.

•    ku kuma vanghana va vanene.

 U wa zvi tiva? A wutshamu legi a Vakustumunyu va Jehovha va tlhanganelako ka gona gi vitaniwa ku i Salawu ya Mufumo hakuva seyo ku wulawuliwa nguvhu hi Mufumo wa Nungungulu. — Matewu 6:9, 10; 24:14; Luka 4:43.

 A mahungu ya kona ma ta ku vhuna. A matshinya ya milayo ya Bhibhiliya lawa ma kambisisiwako lomu mitlhanganweni ya Vakustumunyu va Jehovha ma ta ku vhuna ku “kuma wutlhari”. (Mavingu 4:5) Lezvo zvi wula ku a Bhibhiliya gi nga ku vhuna a ku maha zviboho zva zvinene wutomini ga wena. Gi nga ku vhuna kambe a ku tiva mihlamulo ya zviwutiso zva lisima, zvo kota ku:

•   Hi hanyela yini?

•   A ku Nungungulu i na ni nandzu hi kota ya kuxaniseka ka hina?

•   Zvini zvi humelelako loku hifa?

 A tikanelo to kari ti vekiwako ka mitlhangano yi mahiwako kumbheleni ka vhiki hi leti:

•   Hikuyini hi faneleko ku rangelwa hi Bhibhiliya?

•   Hi nga ci kuma kwihi a civhuno cikhatini ca zvikarato?

•   Zvini lezvi a Mufumo wa Nungungulu wu hi mahelako nyamutlha?

 “Ka siku go kari, a cigondzani-kuloni ci nota mutlhanganweni. Ci no tshama zvin’we ni ngango wa mina niku laha a mutlhangano wu nga kari wu famba hi wa tirisa naye a mabhuku ya hina. Andzhako ka mutlhangano, i wulile lezvaku i hlamalile nguvhu hi mihlamulo leyi a vanhu va nga yi nyika mutlhanganweni. I tlhelile aku le chichini yakwe a va nawo mabhuku yo gondza hi wona yo fana ni lawa ya hina.” — Brenda.

 U wa zvi tiva? A ku nghena Salawini ya Mufumo mahala niku a ku mahiwi mihlengo.

 A ku tlhangana ni van’wani zvi ta ku tiyisa. A Bhibhiliya gi wula ku a cin’we ca zvigelo ci mahako ku a maKristu ma tlhangana ku fela ku “tiyisana”. (Mahebheru 10:24, 25) A kuva zvin’we ni vanhu lava va rangisako a kurandza ka Nungungulu ni ka van’wani zva tangalisa nguvhu tikweni legi a vanhu va ti lavelako zva vona basi.

 “Andzhako ka ku tira siku gontlhe, ndzi nga tizwa na ndzi nga tsakangi ni ku karala, kanilezvi a vanhu va le Salawini ya Mufumo va ndzi maha ndzi vhuxeta mitamu. Andzhako ka mitlhangano, ndzi tlhela kaya na ndzi tsakile, na ndzi longile ku yimisana ni siku gin’wani.” — Elisa.

 U wa zvi tiva? Ku na ni 120 000 ni kuhundza wa mabandla ya Vakustumunyu va Jehovha misaveni yontlhe, va tlhanganako ka 60 000 wa matshamu ni kuhundza. Lembe ni lembe, hi medhiya ku akiwa 1500 wa Tisalawu ta Mufumo kasi a vanhu lava va simamako ku engeteleka vava ni wutshamu go tlhanganela kona. a