“Kusukela wun’wananeni, a cin’we ca zvikarato zva hombe ndzi nga lwisana naco ku navela a vafana-kuloni. Ndzi wa alakanya lezvaku zvi ta hundza kanilezvi zva ha simama kala nyamutlha.” — David, 23 wa malembe.

 David muKristu a lavako ku tsakisa Nungungulu. A ku a nga zvi kota ku mu tsakisa Nungungulu na a navela vafana-kuloni? Nungungulu i ti zwisa kuyini hi ku a wanuna ni wanuna kutani wasati ni wasati va hlengela masango?

•  Zvini lezvi a Bhibhiliya gi wulako?

•  A ku lezvo zvi wula ku . . . ?

•  Kanilezvi ahati loku . . . ?

 A mawonela ya vanhu xungetano hi ku a wanuna ni wanuna kutani wasati ni wasati va hlengela masango ma hambanahambana hi kuya hi mudhawuko wabye kutani nguva leyi va hanyako ka yona. Kanilezvi a maKristu a ma landzeli a mawonela ya citshungu, zvi wulako ku a ma yisiwi “seno ni seno hi mimoya yontlhe ya tigondzo”. (Va Le Efesusi 4:14) Wutshan’wini ga lezvo, a mawonela yabye hi ku a wanuna ni wanuna kutani wasati ni wasati va hlengela masango (ni zvilo zvontlhe zva wutomi) ma seketelwa ka lezvi a Bhibhiliya gi gondzisako.

 Lezvi a Bhibhiliya gi wulako hi ku hlengela masango ni wanuna-kuloni kutani wasati-kuloni zva dlunyateka:

•  A Mhaka ya Nungungulu yi: “U nga etleli ni wanuna-kuloni a ku khwatsi hi loku u etlela ni wasati.” — Levhi 18:22.

•  “Hi ku yelana ni kunavela ka timbilu tabye, Nungungulu i no va nyikela . . . kasi va nyenyezisa a mimiri yabye. Hikwalaho, Nungungulu i no va nyikela kunaveleni ko nyenyeza ka masango, hakuva a vavasati vabye va no ti cica va maha zvo hambana ni lezvi va mahelweko zvona.” — Va Le Roma 1:24, 26.

•  “Mu nga kalavelwi. A zvibhayi, ni vakhozeli va zvifananiso, ni vavanuna lava va ti mahako vavasati, ni vavanuna lava va etlelako ni vavanuna-kulobye, ni makhamba, ni lava va makangwa, ni zvidhakwa, ni lava va rukatelako, ni vaphangi; a vanhu va tshamela lego va nga taga a tshomba ya Mufumo wa Nungungulu.” — 1 Va Le Korinte 6:9, 10.

 A milayo ya Nungungulu yi tirela a vanhu vontlhe kani va navela ku hlengela masango ni vavanuna-kuloni, vavasati-kuloni kutani ahihi. Kasi ku wula lisine, a vanhu vontlhe va fanele ku ti khoma loku va navela ku maha nchumu wu to kala ku tsakisa Nungungulu. — Va Le Kolosi 3:5.

 A ku lezvo zvi wula ku a Bhibhiliya gi hi fanele ku venga lava hlengelako masango ni vavanuna-kuloni kutani vavasati-kuloni?

 Ahihi. Kasi ku wula lisine a Bhibhiliya gi a hi faneli ku venga munhu — kani i hlengela masango ni wanuna-kuloni, wasati-kuloni kutani ahihi. Wutshan’wini ga lezvo, gi hi byela ku hi fanele ku ‘hlota kurula ni vanhu vontlhe’ na ku nga khataliseki a mahanyela yabye. (Mahebheru 12:14) Hikwalaho zvi bihile a ku xanisa vanhu hi ku ngha va hlengela masango ni vavanuna-kuloni kutani vavasati-kuloni.

 A ku lezvo zvi wula ku a maKristu ma fanele kulwa ni milayo leyi yi vhumelelako ku a wanuna ni wanuna kutani wasati ni wasati va chadha zvin’we?

 A Bhibhiliya gi komba lezvaku Nungungulu i mahile wukati kasi giva ga wanuna mun’we ni wasati mun’we. (Matewu 19:4-6) Kanilezvi a milayo leyi a mifumo yi yi vekileko xungetano hi wukati ga wanuna ni wanuna kutani wasati ni wasati yi seketelwa ka maalakanyo ya vanhu na ku nga hi ka Mhaka ya Nungungulu. A Bhibhiliya gi a maKristu a ma faneli ku ti nghenisela ka zva tiko. (Johani 18:36) Hikwalaho, a maKristu a ma seketeli kutani kulwa ni milayo ya wukati ga wanuna ni wanuna kutani wasati ni wasati kutani mahanyela yabye.

 Kanilezvi ahati loku ku hi ku a munhu i hlengela masango ni wanuna-kuloni kutani wasati-kuloni? A ku a nga cica?

 Ina. Phe hi zvalezvi a vokari va nga maha ka zana ga malembe go sangula! Andzhako ka ku wula ku lava va hlengelako masango ni vavanuna-kuloni kutani vavasati-kuloni, a Bhibhiliya gi: “A van’wani va n’wina va wa hanyisa zvalezvo.” — 1 Va Le Korinte 6:11.

 A ku lezvo zvi la ku wula ku lava va nga tsika a mahanyela lawo va nga ta ha tshuka va navela a vavanuna-kuloni kutani vavasati-kuloni? Ahihi, a zvi wuli lezvo. A Bhibhiliya gi wula lezvi: “Mu ambala a munhu muswa, loyi a mahiwako muswa hi wutivi ga lisine a ku khwatsi mufananiso wa Loyi a nga mu vanga.” (Va Le Kolosi 3:10) A kucica loko a hi ku mahi khati gin’we basi, hi fanele ku simama hi ku maha.

 Kanilezvi ahati loku ku hi ku a munhu wa zvi lava ku maha kurandza ka Nungungulu kanilezvi wa ha hi ni kunavela loko?

 A ku fana ni kunavela kun’wani ko biha loku a munhu a nga vako nako, a nga hlawula ku nga ku hlakuleli ne ku ku tsika ku mu hlula. A nga zvi mahisa kuyini? A Bhibhiliya gi: “Simamani ku famba hi ka moya, mu nga ta tshuka mu maha kunavela ka nyama.” — Va Le Galatiya 5:16.

 Wona lezvaku a vhesi legi a gi wuli lezvaku a munhu a nge tshuki ava ni kunavela ka nyama. Kanilezvi a vhesi legi gi loku a munhu a gondza a Bhibhiliya, a khongela ka Nungungulu i tava ni ntamu lowu wu lavekako kasi a hlula a kunavela ka nyama.

 David, loyi hi mu kumbukileko kusanguleni, i kari a zvi kota ku maha lezvo — nguvhunguvhu andzhako ka loku a wulawulile ni vapswali vakwe va nga maKristu hi cikarato cakwe. I wula lezvi: “Zvi wa ku khwatsi hi loku ndzi no ruliwa a ndzhwalo wa hombe makatleni ya mina. Niku kuzvilava na ndzi ti buzile khwatsi hi wujaha ga mina loku ndzi wa no tekela ku wulawula navo.”

 A lisine ku hi tava ni wutomi go tsakisa loku hi hanya hi milayo ya Jehovha. Ha tiyiseka lezvaku a “zvileletelo zva Jehovha zvi lulamile, zvi tsakisa mbilu” niku “loyi a zvi hlayisako i na ni chachazelo wa hombe.” — Lisimu 19:8, 11.