A wukhongeli gontlhe ga fana ke? A ku gontlhe gi yisa ka Nungungulu?
Hlamulo wa Bhibhiliya
Ahihi, a wukhongeli gontlhe a gi fani. A Bhibhiliya gi na ni zvikombiso zvo tala zva wukhongeli gi kalako gi nga mu tsakisi Nungungulu. Hi nga gi xaxameta hi mitlawa yimbiri.
Ntlawa wo sangula: Wukhongeli legi gi khozelako vanungungulu va mawunwa
Na gi wulawula hi ku khozela vanungungulu va mawunwa, a Bhibhiliya gi tirisa a magezu “kanganyisa”, “zvilo zvi nga nyawuliko” ni “zvi nga siziko nchumu”. (Jeremiya 10:3-5; 16:19, 20) Jehovha a Nungungulu i layile a tiko ga kale ga Izrayeli, aku: “U ngavi ni van’wani vanungungulu ahandle ka mina.” (Eksodhusi 20:3, 23; 23:24) Ka zvikhati lezvi a vaIzrayeli va nga kari va khozela a van’wani vanungungulu, ‘Jehovha i no zangara’. — Mitsengo 25:3; Levhi 20:2; Valamuli 2:13, 14.
Nungungulu a nga cicangi a mawonela yakwe xungetano hi ku khozela lava va nge vanungungulu. (1 Va Le Korinte 8:5, 6; Va Le Galatiya 4:8) I byela lava va lavako ku mu khozela lezvaku va tsika ku ti patsa ni lava va nga ka wukhozeli ga mawunwa, aku: “Humani cikari kabye, mu ti hambanisa navo”. (2 Va Le Korinte 6:14-17) Loku ku hi ku a wukhongeli gontlhe ga fana niku gi yisa vanhu ka Nungungulu, hikuyini a nyikako cileletelo leci?
Ntlawa wa wumbiri: Wukhongeli gi khozelako Nungungulu wa lisine hi ndlela a nga yi amukeliko
Ka zvikhati zvo kari a vaIzrayeli va wa khozela Nungungulu na va tirisa tigondzo ni zvihena zvi tako hi wukhozelini ga vanungungulu va mawunwa, kanilezvi Jehovha i alile a wukhozeli legi gi nga patsela a wukhozeli ga lisine ni ga mawunwa. (Eksodhusi 32:8; Dhewuteronome 12:2-4) Jesu i solile a varangeli va wukhongeli va masikwini yakwe hi kota ya lezvi va nga mu khozelisa zvona Nungungulu; va wa ti maha ku khwatsi va ti nyiketela ka Nungungulu kanilezvi va wa hi vakanganyisi niku va wa nga “cheli kota hi zvilo zva lisima zva Nayo, ku nga kululama, ni wuxinji ni kutsumbeka.” — Matewu 23:23.
A ku fana ni nyamutlha, ntsena a wukhongeli legi gi seketelwako ka lisine hi gona gi yisako vanhu ka Nungungulu. A lisine leli hi nga li kuma lomu ka Bhibhiliya. (Johani 4:24; 17:17; 2 Timote 3:16, 17) A wukhongeli legi a tigondzo ta gona ti lwako ni lezvi a Bhibhiliya gi zvi wulako hi lisine ti tsawukanisa vanhu ni Nungungulu. A tigondzo to tala leti a vanhu va alakanyako lezvaku ti huma hi lomu ka Bhibhiliya — a ku patsa ni gondzo ya lezvaku Nungungulu vanhu vanharu kwalaha ka kun’we, kungafi ka muhefemulo ni kuswa tilweni — ti kumilwe ka lava va nga khozela vanungungulu va mawunwa. A wukhozeli legi gi vhuvhumisako a tigondzo leto ga “mahala” kutani a gi vhuni nchumu hakuva gi vhaleta a zvileletelo zva Nungungulu hi zvihena zva wukhongeli. — Marku 7:7, 8.
Nungungulu wa nyenya a wukhongeli go farisa. (Titusi 1:16) Kasi a wukhongeli gi vhuna a vanhu a ku tshinela ka Nungungulu, gi fanele ku cica a wutomi gabye ga siku ni siku na ku nga hi ku gi ti seketela ka zvihena ni ka mikhuwo. Hi cikombiso, a Bhibhiliya gi ngalo: “Loku a wokari a alakanya ku mukhozeli wa Nungungulu kanilezvi na a nga fumeli lirimi lakwe, wa kanganyisa a mbilu yakwe, niku a kukhozela kakwe a ku vhuni nchumu. A kukhozela loku ku basileko ni ku nga solekiko mahlweni ka Nungungulu tlhelo Papayi wa hina, hi loku: Ku hlayisa a vanana va felweko hi vapswali ni tinoni kuxanisekeni kabye, ni ku tshama a nga hi na noda ya zvatiko.” (Jakobe 1:26, 27; mitlhamuselo ya lahasi) A Versão Rei Jaime gi tirisa a magezu “wukhongeli go basa” kasi ku wula a makhozelela lawa yo basa ma nga hava wukanganyisi.
a Hi kuya hi Bhibhiliya, Jehovha i vito ga Nungungulu wa lisine.