Ahihi. Loku hi fananisa a tikopiya ta Bhibhiliya ti tsalilweko hi mandla a kaleloko, ti komba lezvaku a Bhibhiliya a gi cicangi hambu lezvi gi nga kopiyariwa hi makume ya mazanazana ya malembe ka materiyali ma nga hlweliko ku bola.

 Ku kumilwe a mazanazana ya tikopiya ta Bhibhiliya ti tsalilweko hi mandla a kaleloko. A tokari ta tona ti wa hi ni zvilo zvo tala zvo hambana, lezvi zvi kombako lezvaku ku mahilwe zvihoxo a cikhati leci ti nga kopiyariwa. A kutala ka kuhambana loku ku kumilweko ka tikopiya leto a hi ka hombe niku a ku cici a mongo wa lezvi zvi wuliwako. Kanilezvi kuve ni matshamu man’wani ya matsongwani ku nga kumiwa a kuhambana ka hombe, niku a yo kari zvi wonekisa ku khwatsi kuve mizamo yi mahilweko kaleloko kasi ku cica a mahungu ya Bhibhiliya ha womu. Wona zvikombiso zvimbiri:

1.   Ka maBhibhiliya yo kari ya kale, laha ka 1 Johani 5:7, ku na ni magezu lawa: “Le tilweni, Papayi, ni Gezu ni Moya wo Basa, niku lava va vanharu mun’we.” Kanilezvi a tikopiya to tsumbeka ta Bhibhiliya ti tsalilweko hi mandla ti komba lezvaku a magezu lawo ma wa nga hi kona ka mitsalo yo sangula. Ma no engetelwa hi kufamba ka cikhati. a Hikwalaho, nyamutlha a maBhibhiliya yo tsumbeka a ma nawo magezu lawo.

2.   A vito ga Nungungulu ga kumeka mazanazana ya makhati lomu ka tikopiya ta kale to tsaliwa hi mandla ta Bhibhiliya. Hambulezvo, a maBhibhiliya yo tala ma gi vhaletile hi zvikhundla zvo kota ku “Hosi” kutani “Nungungulu”.

 Kala lezvi ku kumilwe a tikopiya to tala ta Bhibhiliya ti tsalilweko hi mandla niku lezvo zvi maha ku zvi olova a ku pola zvihoxo a ku hundza kale. b Loku ku fananisiwa a tikopiya leto, zvini lezvi zvi wonekako xungetano hi kutsumbeka ka Bhibhiliya legi hi nga nago nyamutlha?

•   Na yi wulawula hi Mitsalo ya ciHebheru (yi vitaniwako kambe ku i “Testamenta ga Kale”), a tlhari yo kari ya ku hi William H. Green, yi te: “Hi nga wula na hi tiyile lezvaku a ku na bhuku gin’wani ga kale gi nga kopiyariwa hi ndlela yo tsumbeka a ku fana ni Bhibhiliya.”

•   Na yi wulawula hi Mitsalo ya ciGreki ya wuKristu, kutani “Testamenta ga Giswa,” a tlhari yo kari ya ku hlola Bhibhiliya ya ku hi F.  F.  Bruce, yi tsalile lezvi: “Ku na ni mahungu yo tala ma tiyisako a kutsumbeka ka Testamenta ga Giswa, a ku hundza mabhuku yo tala ya kale yaku a nga kona a kanetako a kutsumbeka ka wona.”

•   Sir Frederic Kenyon a nga muhloli wa hombe wa tikopiya ta Bhibhiliya to tsaliwa hi mandla, i wulile lezvaku a munhu “a nga khoma a Bhibhiliya gontlhe a wula na a tiyile lezvaku i khomile a Mhaka ya lisine ya Nungungulu, leyi yi hlayisilweko ka cizukulwana ni cizukulwana hi mazanazana ya malembe, ku tlhela ku nga ciciwi zva hombe ka mahungu ya gona.”

•   A vakopiyi va vaJudha ni maKristu va hlayisile a matimu lawa ma wulawulako hi zvihoxo zva hombe zvi mahilweko hi vanhu va Nungungulu. c (Mitsengo 20:12; 2 Samuweli 11:2-4; Va Le Galatiya 2:11-14) Va tlhelile va hlayisa a matimu ya kungaingisi ka tiko ga Judha ni ku paluxa tigondzo ta vanhu. (Hoseya 4:2; Malaki 2:8, 9; Matewu 23:8, 9; 1 Johani 5:21) Hi ku kopiyara a mahungu lawo hi kutsumbeka, a vakopiyi va kombisile kutsumbeka kabye ni cichavo ca hombe hi Mhaka yo basa ya Nungungulu.

•   Xana a wu zvi woni lezvaku zva zwala a ku kholwa ku Nungungulu loyi a pimiseleko vanhu a ku tsala Bhibhiliya i wa ta tlhela a vhikela mahungu ya gona lezvaku ma nga ciciwe? d (Isaya 40:8; 1 Pedro 1:24, 25) Kunene, Nungungulu i wa nga lavi ku a Bhibhiliya gi vhuna vanhu va cikhatini leco basi kanilezvi ni va nyamutlha. (1 Va Le Korinte 10:11) Hi lisine, “a timhaka tontlhe ti tsalilweko kale ti tsalelwe ku gondzisa hina kasi hi kota ya kutimisela ni kuchavelela loku hi nyikiwako hi Mitsalo hiva ni kutsumba.” — Va Le Roma 15:4.

•   Jesu ni valandzeli vakwe va tshahile mitsalo hi ka tikopiya ta Mitsalo ya ciHebheru na va nga kanakani xungetano hi kutsumbeka ka mitsalo leyo ya kale. — Luka 4:16-21; Mitiro 17:1-3.