Ina. A Bhibhiliya gi nyika zvikombiso zvo tiya zva lezvaku Nungungulu i kona. Gi hi kuca a ku hi kholwa ka Nungungulu hi ku tirisa a “ntamu wa kupima” ka hina ni “kupimisisa”, na ku nga hi ku kholwa basi lezvi a wukhongeli gi gondzisako. (Va Le Roma 12:1; 1 Johani 5:20, tlhamuselo wa lahasi) Wona mitlhamuselo yi landzelako yi seketelwako ka Bhibhiliya:

•   A kuva a wuako gi xaxametilwe khwatsi gi tlhela giva ni wutomi cikombiso ca lezvaku ku na ni Muvangi. A Bhibhiliya gi ngalo: “Kunene, a yindlu yin’we ni yin’wani yi akiwa hi wokari, kanilezvi loyi a akileko zvilo zvontlhe hi Nungungulu.” (Mahebheru 3:4) Hambu lezvi a tlhamuselo lowu wu nge khwatsi a wu etangi, a vanhu vo tala va gondzileko nguvhu va yi kholwa a mhaka leyi. a

•   Kota vanhu, hi na ni kuxuva ka mabeleko ka ku lava ku zwisisa a tlhamuselo ni kungo ga wutomi. Hambu andzhako ka loku hi khatalele a zvilaveko zva hina zvontlhe zva nyama, a kuxuva loko ka ha simama. A Bhibhiliya gi ku vitana ku i “tora ga ku tiva Nungungulu” lezvi zvi patsako a ku tiva ni ku khozela Nungungulu. (Matewu 5:3; Kuvhululelwa 4:11) A tora lego ga ku tiva Nungungulu a gi kombi ntsena lezvaku Nungungulu i kona kanilezvi gi tlhela gi komba lezvaku yena Muvangi wa lirandzo a lavako lezvaku hi mu tiva. — Matewu 4:4.

•   A zviphrofeto zva Bhibhiliya zvi tlhamuselweko khwatsi zvi tsalilwe na ka ha kiyela a mazanazana ya malembe kasi zvi maheka niku zvi mahekisile zvalezvi zvi nga phrofetisilwe zvona. A kutsumbeka ka zvona ni mitlhamuselo ya kona zvi komba khwatsi lezvaku zvita hi ka munhu a nga ni ntamu a ku hundza wa vanhu. — 2 Pedro 1:21.

•   A vatsali va Bhibhiliya va wa hi ni wutivi ga siensia gi nga hundza ga vanhu va cikhatini cabye. Hi cikombiso, a kutala ka vanhu va wa kholwa lezvaku a misava yi wa tlhatekilwe hehla ka cihari, co kota ndlovhu, khumba-khwati kutani homu. Kanilezvi a Bhibhiliya gi wula lezvaku Nungungulu i ‘hayekile misava laha ndengelengeni’. (Joba 26:7) Hi kufanana, a Bhibhiliya gi tlhamusela khwatsi lezvi a misava yi nga tshamisa zvona, giku “cirendzelekwani”. (Isaya 40:22) A vanhu vo tala va wula lezvaku a tlhamuselo wu nga zwalako wa kuva a vatsali va Bhibhiliya va kumile wutivi lego hi lowu waku a mahungu yabye ma wata hi ka Nungungulu.

•   A Bhibhiliya gi hlamula a zviwutiso zvo tala zvo karata, a zviwutiso zva ku loku a munhu a nga kumi a mihlamulo yo zwisiseka zvi nga mu maha a nga kholwi lezvaku Nungungulu i kona. Hi cikombiso: Loku Nungungulu a hi ni lirandzo ni ntamu wontlhe, hikuyini ku nga ni kuxaniseka ni kubiha misaveni? Hikuyini a kutala ka zvikhati a wukhongeli gi kokelako vanhu ka zvilo zva kubiha wutshan’wini ga zvazvinene? — Titusi 1:16