Ahihi. A Bhibhiliya gi zvi veka laha kubaseni lezvaku Nungungulu i vangile vanhu ni “tixaka” to hambanahambana ta zvihari ni tisinya. a (Genesisi 1:12, 21, 25, 27; Kuvhululelwa 4:11) Gi tlhela gi wula lezvaku a vanhu vontlhe vata hi ka Adhamu na Evha, a vapswali va hina vo sangula. (Genesisi 3:20; 4:1) A matimu ya Bhibhiliya a ma yi seketeli a gondzo leyi ya ku Nungungulu i tirisile a evholusawu kasi a vanga a zvilo zvontlhe zvi hanyako, leyi a zvikhati zvin’wani yi vitaniwako ku i evholusawu teísta. Kanilezvi a Bhibhiliya a gilwi ni lezvi a siensia yi wulako zvaku ndzeni ka lixaka ni lixaka la zvilo zvi hanyako ku na ni kucicacica ko kari.

•  A ku Nungungulu i tirisile a evholusawu?

•  A ku a evholusawu ni Bhibhiliya zva zwanana?

•  Hi nga wula yini hi wuzvikoti ga tisinya ni zvihari ga ku zvi kota ku ti zwananisa ni wutshamu kasi zvi hanya?

 A magezu “evholusawu teísta” ku wuliwa mawonela yo hambana. Hi kuya hi Enciclopédia Britânica, a magezu lawa ma nyika mawonela yaku “Nungungulu i tirisa a ku ti hundzulukela ka zvilo kasi a ntumbuluxa zviwumbiwa zvo hambanahambana.”

 A evholusawu teísta yi patsa a mawonela lawa yaku:

•   Zvontlhe a zvilo lezvi zvi hanyako zvi huma hi ka nchumu wun’we lowu wu nga hi kona kaleloko.

•   A cilo co kari ci hanyako ci nga cica hi kumbhelela civa cilo cin’wani ci hanyako.

•   Hi ndlela yo kari, Nungungulu hi yena a rangelako a kucica loku.

 A evholusawu teísta yi wula lezvaku a matimu ya Bhibhiliya ya kuvangiwa ka zvilo ma nga ka Genesisi a hi lisine khwatsi. Hambulezvo, Jesu i kumbukile a matimu ma nga ka Genesisi kota matimu ya lisine. (Genesisi 1:26, 27; 2:18-24; Matewu 19:4-6) A Bhibhiliya gi wula lezvaku na a nga seta laha misaveni, Jesu i hanyile le tilweni na Nungungulu niku i mu vhunile a ku vanga “zvilo zvontlhe”. (Johani 1:3) Hikwalaho, a maalakanyo ya lezvaku Nungungulu i tirisile evholusawu kasi ku vanga zvilo zvontlhe zvi hanyako a ma zwanani ni lezvi a Bhibhiliya gi gondzisako.

 A Bhibhiliya a gi tlhamuseli a kucicacica kontlhe loku ku nga mahekako ndzeni ka lixaka lo kari. Ne a gi kaneti a mhaka leyi ya ku a zvihari ni tisinya zva tixakaxaka, lezvi zvi vangilweko hi Nungungulu, zvi nga cica laha zvi pswalelanako ni ku ti zwananisa ni wutshamu giswa go hanya kona. Hambu lezvi a vokari va wonako a kucica loko kota evholusawu, a ku pswaleki a lixaka liswa la wutomi.