Ahihi. A Bhibhiliya a gi wuli ku a mali yi bihile, ne a gi wuli ku a mali hi yona yi vangako a zvilo zvontlhe zva kubiha zvi humelelako. A magezu lawa yo toloveleka ya ku a ‘mali i mutsu wa tixaka tontlhe ta zvilo zva kubiha’ cipandzana co kari basi ca vhesi ga Bhibhiliya niku a ma wuli lisine. Hi lisine, a Bhibhiliya gi wula lezvaku ‘a ku randza mali hi mutsu wa tixaka tontlhe ta kubiha’. a — 1 Timote 6:10, A Biblia Go Basa, hi hina hi nga timisa.

•  Zvini lezvi a Bhibhiliya gi wulako xungetano hi mali?

•  Hikuyini a Bhibhiliya gi hi tlharihisako xungetano hi ku randza mali?

•  Hi nga vhunekisa kuyini hi ku landzela wusungukati legi a Bhibhiliya gi hi nyikako xungetano hi mali?

•  Mavhesi ya Bhibhiliya ma wulawulako hi mali

 A Bhibhiliya ga vhumela lezvaku a mali, loku yi tirisiwa hi wutlhari, yi nga vhuna yi tlhela yi ‘vhikela’. (Mutshawuteli 7:12) Ahandle ka lezvo, a Bhibhiliya gi dzundza lava va hanako ka van’wani, niku lezvo zvi nga patsa ku va nyika mali. — Mavingu 11:25.

 Kanilezvi a Bhibhiliya ga hi tlharihisa kambe hi timhango ta ku rangisa mali wutomini. Gi ngalo: “A mahanyela ya n’wina ma ngavi ya ku randza mali, kanilezvi tsakani hi lezvi mu nga nazvo.” (Mahebheru 13:5) Hi gondza yini ka lezvi? A mali yi na ni wutshamu ga yona, kanilezvi a hi fanele ku vhumela ku yi rangela wutomi ga hina. Wutshan’wini ga lezvo, hi fanele ku eneliswa hi zvilo lezvi hakunene zvi lavekako, zvo kota zvakuga, tinguwo ni yindlu. — 1 Timote 6:8.

 A vanhu va makangwa va nga ta gi kuma a wutomi ga pindzukelwa. (Va Le Efesusi 5:5) A cigelo co ranga, hi ku a makangwa yin’we ya tindlela ta ku khozela zvifananiso kutani wukhongeli ga mawunwa. (Va Le Kolosi 3:5) A ca wumbiri, a vanhu va makangwa va tolovela ku maha zvilo zva kubiha kasi va kuma lezvi va zvi lavako. Mavingu 28:20 i ngalo: Lava va “tsutsumelako ku ganya [va] nga ta vhumala nandzu.” Loyi a randzako mali a ngaza a maha wugevenga, ku kanganyisa, ku yiva vanhu a fihla a gumesa a londza maxaka yabye a ku ma mu nyika mali, kutani ku daya.

 Hambu loku a munhu a ngazi a maha a zvilo lezvo zvo biha, a ku randza mali zvi nga mu nehela a mawuyawuya ya hava. A Bhibhiliya gi wula lezvaku “lava va ti yimiseleko ku ganya va wela kuringweni, ni mitlhan’wini, ni kunaveleni ko tala ka wupumbu”. — 1 Timote 6:9.

 Loku hi nga hambuki ka zvilo lezvi hi zvi tivako ku zvinene ni ka zvilo lezvi zvi tsakisako Nungungulu hi ku fela mali, hi ta tizwa matshandza hi hina venyi hi tlhela hi tsakelwa ni ku seketelwa hi Nungungulu. Nungungulu i va tsumbisa lezvi lava va zamako hi mbilu yontlhe a ku mu tsakisa: “Ndzi nga ta tshuka ndzi ku tsika hambu ku tshuka ndzi ku fularela.” (Mahebheru 13:5, 6) I tlhela a hi tiyisekisa ku “a munhu wo tsumbeka i ta kuma makatekwa yo tala”. — Mavingu 28:20.