Ahihi, a misava yi nga ta tshuka yi lovisiwa, ku hisiwa hi ndzilo kutani ku vhaletiwa hi yin’wani. A Bhibhiliya gi gondzisa lezvaku Nungungulu i vangile misava kasi a vanhu va hanya ka yona kala kupindzuka.

•   “A valulamileko va taga tshomba ya misava, va hanya ka yona kala kupindzuka.” — Lisimu 37:29.

•   “[Nungungulu] i yimisile misava zviseketelweni zva yona; yi nga ta susiwa wutshan’wini ga yona kala kupindzuka ni kupindzuka.” — Lisimu 104:5.

•   “A misava yi tshama kala kupindzuka.” — Mutshawuteli 1:4.

•   “Loyi a wumbileko misava, a Mumahi wa yona, loyi a yi yimisileko yi tiya, . . . a nga vangangiko misava mahala, kanilezvi a yi vangileko kasi yiva wutshamu ga ku a vanhu va hanya ka gona”. — Isaya 45:18.

 Nungungulu a nga ta tsika a vanhu va lovisa a misava hi kumbhelela hi ku yi chakisa, tiyimpi kutani hi ndlela yin’wani. Kanilezvi yena i ta “lovisa lava va wonhako misava.” (Kuvhululelwa 11:18) I ta zvi mahisa kuyini lezvo?

 Nungungulu i ta vhaleta a mifumo ya vanhu, leyi yi tsandzekako ku vhikela misava, hi Mufumo wo mbhelela wa le tilweni. (Dhaniyeli 2:44; Matewu 6:9, 10) A Mufumo lowo wu ta fumiwa hi n’wana wa Nungungulu, Jesu Kristu. (Isaya 9:6, 7) A cikhati leci a nga hi laha misaveni, Jesu i mahile zvihlamaliso lezvi zvi nga komba lezvaku i na ni ntamu wa ku wonelela a mintamu ya ntumbuluko. (Marku 4:35-41) Kota Hosi ya Mufumo wa Nungungulu, Jesu i ta wonelela misava yontlhe ni mitamu ya yona. I ta tlhela a vanga kutani ku vhuxa a matshamela manene laha misaveni, yo fana ni lawa ma nga hi kona le jardhim ya Edheni. — Matewu 19:28; Luka 23:43.

 Ne, a gi gondzisi lezvo. A maalakanyo lawo ya hava ma kumeka hi kota ya ku nga mu zwisisi khwatsi 2 Pedro 3:7, loyi a nge: “A matilo lawa ma nga kona zvezvi ni misava ya kona, zvi vekiselwe ndzilo”. Wona a zvilo zvimbiri zva lisima zvi hi vhunako ku zwisisa a tlhamuselo wa magezu lawo:

1.   Lomu ka Bhibhiliya, a magezu “matilo”, “misava” ni “ndzilo” ma nga wula zvilo zvo hundza cin’we. Hi cikombiso, Genesisi 11:1 i ngalo: “A misava yontlhe yi wa hi ni lirimi lin’we”. Laha, a gezu “misava” gi wula a vanhu.

2.   A mongo wa 2 Pedro 3:7 wa komba a tlhamuselo wa matilo, misava ni ndzilo lowu wu wuliwako laho. A mavhesi 5 ni 6 ma komba kuyelana ku nga kona ni Ndambi ya masikwini ya Nowa. Ka cikhati leco, a tiko ga kale gi lovisilwe kanilezvi a planeta ya hina a yi n’walalangi. Wutshan’wini ga lezvo, “a misava” leyi yi nga lovisiwa hi Ndambi, vanhu va tihanyi. (Genesisi 6:11) A Ndambi yi tlhelile yi lovisa a “matilo”, kutani vanhu lava va nga fumela a misava. Hikwalaho, ku lovisilwe a vanhu va kubiha na ku nga hi planeta ya hina. Nowa ni ngango wakwe va ponile a cikhati leci a tiko gi nga lovisiwa niku va salile va hanya laha misaveni andzhako ka Ndambi. — Genesisi 8:15-18.

 A ku fana ni mati ya Ndambi, a “ndzilo”, wa 2 Pedro 3:7 wu wula a kulovisiwa ka vanhu va kubiha na ku nga hi planeta ya Misava. Nungungulu i tsumbisa a “matilo maswa ni misava yiswa . . . lomu a kululama ku to tshama kona.” (2 Pedro 3:13) A “misava yiswa” kutani vanhu vaswa, yi ta fumiwa hi “matilo maswa” kutani wuhosi giswa — a Mufumo wa Nungungulu. A Mufumo lowo wu ta maha lezvaku a misava yi cica yi maha a paradhesi ga kurula. — Kuvhululelwa 21:1-4.