A vana lava va kulileko va na ni wutihlamuleli ga hombe ga ku hlayisa a vapswali vabye va kumbileko. A Bhibhiliya gi wula lezvaku a vana lava va kulileko “va fanele a ku hanya hi lezvi va zvi gondzako ka wukhongeli gabye hi ku khatalela a ngango wabye, hi ndlela leyo, va va tlhelisela mulere a vapswali vabye . . . , hakuva lezvo zva mu tsakisa Nungungulu.” (1 Timote 5:4, Bíblia na Linguagem de Hoje) A cikhati leci a vana lava va kulileko va khatalelako a vapswali vabye va kumbileko vo ingisa kambe a cileletelo ca Bhibhiliya ca ku dzundza a vapswali vabye. — Va Le Efesusi 6:2, 3.

 A Bhibhiliya a gi nyiki zvileletelo zvo kongoma xungetano hi ku khatalela a vapswali va kumbileko. Kanilezvi ga wulawula hi vavanuna ni vavasati va kukholwa va nga maha lezvo. A Bhibhiliya ga nyika wusungukati kambe gi nga vhunako lava va hlayisako vapswali va kumbileko.

•  Zvikhatini zva kutsaliwa ka Bhibhiliya, a vokari va va hlayisisile kuyini a vapswali vabye va kumbileko?

•  Wusungukati muni ga lomu ka Bhibhiliya gi nga vhunako lava va hlayisako a vapswali lava va kumbileko?

•  Xana zvi bihile ku a vapswali va ya vekiwa ka miti leyi yi hlayisako vanhu vo kumba?

 Va zvi mahile hi tindlela to tala, hi kuya hi zviyimo zva kona.

•   Josefa i wa tshama kule ni papayi wakwe Jakobe, loyi a nga kumbile. Laha zvi nga koteka, Josefa i no vitanisa a papayi wakwe a ta tshama kusuhani kakwe. Josefa I no mu nyika ko tshama kona, a mu nyika zvakuga a tlhela a mu khatalela. — Genesisi 45:9-11; 47:11, 12.

•   Rute i no rura aya tikweni ga n’wingi wakwe a tlhela a tira nguvhu kasi a mu khatalela. — Rute 1:16; 2:2, 17, 18, 23.

•   Jesu, na ku kiyela kutsongwani kasi afa, i no lava munhu wa ku sala a hlayisa a mamani wakwe Mariya loyi zvi wonekisako ku khwatsi i wa felwe hi nuna. — Johani 19:26, 27. a

 Ka zvikhati zvin’wani, a ku khatalela a vapswali va kumbileko zvi nga karalisa a miri ni mapimo. Kanilezvi a Bhibhiliya gi na ni wusungukati gi nga vhunako lava va nga ni ndzhwalo lowo.

•   Va kombise cichavo a vapswali va wena.

   Lezvi a Bhibhiliya gi wulako: “Kombisa cichavo ka papayi wa wena ni ka mamani wa wena”. — Eksodhusi 20:12.

   U nga gi tirisisa kuyini a wusungukati legi? Komba lezvaku wa va kombisa cichavo a vapswali va wena hi ku nga tshami hi ku va gadha. Kala laha zvi kotekako, va tsike va ti hlawulela lezvi va lavako ku hlayisisiwa zvona. Kanilezvi va kombise cichavo a vapswali va wena hi ku maha zvontlhe u zvi kotako kasi ku va vhuna.

•   Ngha uva munhu wa ku zwisisa u tlhela u tsetselela.

   Lezvi a Bhibhiliya gi wulako: “A munhu a tlharihileko wa nonoka ku zangara, niku zva mu sasekela a ku tsetselela a cigoho.” — Mavingu 19:11.

   U nga gi tirisisa kuyini a wusungukati legi? Loku a papayi wa wena kutani mamani wa wena a wula zvilo na a nga rangangi hi ku pimisa kutani loku zvi wonekisa ku khwatsi a nga bongi lezvi u mu khatalelako, ti wutise lezvi: ‘Ndzi wa ta ti zwisa kuyini loku a ndzova ka ciyimo cakwe?’ Loku u ti karatela kuva munhu wo zwisisa ni wa ku tsetselela u nga maha ku a ciyimo ci chukwata.

•   Bhula ni van’wani.

   Lezvi a Bhibhiliya gi wulako: “A makungo ma tsandzeka loku ku nga hi na mabhulo, kanilezvi ma tiya loku a masungukati ma tele.” — Mavingu 15:22.

   U nga gi tirisisa kuyini a wusungukati legi? Maha mikambisiso ya lezvi u nga zvi khatalelisako zvona hi ndlela ya yinene a zvikarato zva lihanyo zva vapswali va wena. Zama ku tiva lezvi a mufumo wu nga mahako kasi ku ku vhuna a ku hlayisa a vapswali va wena. Bhula ni van’wani va hlayisako a vapswali va kumbileko. Loku u hi ni vamakabye, mu nga maha mutlhangano wa cixaka kasi ku bhula hi zvilaveko zva vapswali, lezvi va nga khataleliswako zvona ni lezvi a mun’we ni mun’wani a nga mahako kasi a vhunetela.

•   Ti koramise.

   Lezvi a Bhibhiliya gi wulako: “A wutlhari gi na ni lava va ti koramisako”. — Mavingu 11:2.

   U nga gi tirisisa kuyini a wusungukati legi? Tiva a kugumelwa ka wena. Hi cikombiso, hontlheni a hi na cikhati ni ntamu wo enela. Hikwalaho, a wu nge zvi koti a ku maha zvontlhe u nga xuva ku mahela a vapswali va wena. Loku zvi ku bindzela a ku khatalela a vapswali va kumbileko, kombela a civhuno ka zviro zvin’wani zva ngango kutani ka vatiri va ku hlayisa vanhu vo kumba.

•   Ti khatalele wenawu.

   Lezvi a Bhibhiliya gi wulako: “I hava a tshukileko a venga a miri wakwe, kanilezvi wa wu wundla ni ku wu tshotshota”. — Va Le Efesusi 5:29.

   U nga gi tirisisa kuyini a wusungukati legi? Hambu lezvi u nga ni wutihlamuleli ga ku hlayisa a vapswali va wena, u fanele ku khatalela a zvilaveko zva wena ni zva va laha ngangweni wa wena loku u chadhile. U fanele kuga khwatsi. U fanele ku humula ni ku etlela zvi enela. (Mutshawuteli 4:6) Ahandle ka lezvo zvi nene a kuta na u maha zvilo zva ku pepisa maalakanyo. Loku u maha lezvo u tava ka ciyimo ca cinene hi tlhelo ga kutizwa, ga maalakanyo niku u tava ni ntamu wa ku khatalela a vapswali va wena.

 A Bhibhiliya a gi na nayo wo kongoma xungetano hi ku a vana va fanele ku hlayisa a vapswali vabye laha kaya kutani ka wutshamu gin’wani ke. A mingango yo kari yi hlawula a ku tshama ni vapswali vabye va khosaheleko laha kaya kala laha zvi kotekako hi kona. Hambulezvo, ka zvikhati zvin’wani va nga alakanya ku zvi chukwana ku va yisa ka muti wa ku hlayisa vanhu va kumbileko. A ngango ni ngango wu fanele ku tlhangana wu bhula hi lezvi zvi nga chukwana ka vontlhe va patsekako. — Va Le Galatiya 6:4, 5.