A vanhu votala va ti mahako zviwutiso lezvi hi lava va luzileko zvilo zvo tala wutomini gabye niku a va lavi mihlamulo basi ya zviwutiso zvabye, kanilezvi va lava kambe ni ku chavelelwa. A van’wani ve a kudayelwa ka vanhu hi wona nchumu wo biha nguvhu lowu a vanhu va nga mahako, hi kota ya lezvo, zva va karatela a ku kholwa ka Nungungulu.

 Wunwa: Zvi bihile a ku wutisa ku hikuyini Nungungulu a nga kala ku vhalela a kudayelwa ka vanhu.

 Lisine: A vanhu va nga ni kukholwa ka hombe va wutisa ku hikuyini a tsikako a zvilo zva kubiha zvi humelela. Hi cikombiso, muphrofeti Habhakuka i wutisile Nungungulu ku: “Hikuyini ku nga ni kuphanga ni tihanyi mahlweni ka mina ke? Kona hikuyini ku talileko a tiholova ni kulwa?” (Habhakuka 1:3) Wutshan’wini ga ku kawuka Habhakuka, Nungungulu i mahile lezvaku a zviwutiso zvakwe zvi tsaliwa lomu ka Bhibhiliya kasi vontlhe va lera.

 Wunwa: Nungungulu a nga khatali hi kuxaniseka ka vanhu.

 Lisine: Nungungulu wa nyenya a wubihi ni kuxaniseka loku ku vangiwako hi gona. (Mavingu 6:16-19) Masikwini ya Nowa, Nungungulu i no “bayiseka mbilwini yakwe” hi kota ya wugevenga legi gi nga kari gi hangalaka misaveni. (Genesisi 6:5, 6) Handle ko kanakana, Nungungulu i zwile kubayisa ka hombe hi kota ya kudayiwa ka vanhu. — Malaki 3:6.

 Wunwa: A kudayiwa ka vanhu ku wa hi ndlela ya ku Nungungulu a tsayisa vaJudha.

 Lisine: Ka zana ga malembe go sangula, Nungungulu i tsikile Jerusalema a lovisiwa hi vaRoma. (Matewu 23:37–24:2) Kanilezvi kusukela ka cikhati leco, Nungungulu a nga ha hlawuli a ntlawa wo kari wa vanhu kasi a wu mahela tipswalo kutani ku wu tsayisa. Ka Nungungulu, “a ku na kuhambana cikari ka muJudha ni muGreki.” — Va Le Roma 10:12.

 Wunwa: Loku ku wa hi ni Nungungulu wa lirandzo ni wa ntamu wontlhe, na a vhalele a kudayiwa ka vanhu.

 Lisine: Hambu lezvi ku nga ku Nungungulu a nga tshuki a vanga kuxaniseka, ka zvikhati zvo kari wa vhumelela lezvaku kuva kona hi cikhatana. — Jakobe 1:13; 5:11.

 Nungungulu i tsikile vanhu va hihiritiwa hi cigelo caleci ca cin’we ci mu mahako a tsika vanhu vontlhe va xaniseka: kasi ku lulamisa a mhaka leyi yi vhuxilweko kaleloko. A Bhibhiliya gi komba kubaseni lezvaku hi Dhiyabho a fumelako tiko, a hi Nungungulu. (Luka 4:1, 2, 6; Johani 12:31) Wona lomu ka Bhibhiliya a zvigelo zvimbiri zva tshinya zvi nga hi vhunako ku tlhamusela ku hikuyini Nungungulu a tsikileko vanhu va hihiritiwa.

1.   Nungungulu i vangile vanhu na va hi ni kutlhatlheka ka ku hlawula lezvi va zvi lavako. Nungungulu i byelile a vanhu vo sangula, Adhamu na Evha, lezvi a nga lava lezvaku va maha kanilezvi a nga va kurumetangi a ku mu ingisa. Va langile a ku hlawula ha voce lezvi zvi nga zvinene ni lezvi zva kubiha. A kuhlawula kabye ka hava ni kuhlawula kun’wani ko fana ni loko ku mahilweko hi vanhu matin’wini wontlhe, ku nehile a wuyelo go bava nguvhu ka vanhu. (Genesisi 2:17; 3:6; Va Le Roma 5:12) A bhuku Statement of Principles of Conservative Judaism gi wula lezvi: “A zvilo zvo tala zvi mahako ku a vanhu va xaniseka laha tikweni zvi vangiwa hi lezvi a vanhu va nga ku tirisiko khwatsi a kutlhatlheka loku hi nyikilweko.” Wutshan’wini ga ku Nungungulu a va tsona kutlhatlheka a vanhu, i va nyikile cikhati ca ku va zama a ku lulamisa a zvikarato zvabye ha voce.

2.   Nungungulu wa zvi kota niku i ta fuvisa kubayisa kontlhe loku ku vangilweko hi kudayiwa ka vanhu. Nungungulu i tsumbisa ku vhuxa timiliyoni ta vanhu va fileko a ku patsa ni lava va fileko hi kota ya kudayiwa ka vanhu. I ta tlhela a fuvisa a kubayisa loku lava va ponileko va ku zwako hi kota ya lezvi zvi tshukako zvi wuya maalakanyweni yabye hi kudayiwa loku. (Isaya 65:17; Mitiro 24:15) Kota lezvi a randzako vanhu ha tiyiseka lezvaku Nungungulu i ta tatisa a zvitsumbiso lezvi. — Johani 3:16.

 A kutala ka lava va ponileko a kudayiwa ka vanhu va zvi kotile ku simama va hi ni kukholwa ni ku hanyela co ci tiva hi ku zwisisa zvigelo zvi mahako Nungungulu a tsika wubihi giva kona ni lezvi a lavako ku gi fuvisisa zvona.