Ina, hakuva Nungungulu i lava lezvaku a vanhu va tlhangana kasi ku mu khozela. A Bhibhiliya gi ngalo: “A hi khatalelaneni kasi hi susumetana lirandzweni ni mitirweni yo saseka, na hi nga tsiki ku tlhangana”. — Mahebheru 10:24, 25, tlhamuselo wa lahasi.

 Jesu i kombile lezvaku a valandzeli vakwe va wa ta wumba ntlawa wu xaxametilweko a cikhati a nga va byela ku: “Loku mu randzana, a vanhu vontlhe va ta zvi tiva lezvaku mu vapizani va mina.” (Johani 13:35) A ndlela yo sangula yo kombisa a lirandzo lelo, ku wa hi ku a vapizani va tlhangana ni makholwa-kulobye. Va wa ta xaxametiwa hi mabandla kasi va tlhangana va khozela hi kukhandzakanya. (1 Va Le Korinte 16:19) Vontlhe va wa ta wumba a wumakabye ga misava yontlhe. — 1 Pedro 2:17.

A hi ku lumba wukhongeli ntsena, ku na ni zvin’wani zvi lavekako

 Hambu lezvi a Bhibhiliya gi kombako lezvaku a vanhu va fanele ku tlhangana kasi ku khozela Nungungulu, a gi gondzisi lezvaku a munhu a nga tsakisa Nungungulu ntsena hi kuva ciro ca wukhongeli go kari. Kasi a munhu a tsakelwa hi Nungungulu, a wukhongeli gakwe gi fanele ku cica a wutomi gakwe ga siku ni siku. Hi cikombiso, a Bhibhiliya gi ngalo: “A kukhozela loku ku basileko ni ku nga solekiko mahlweni ka Nungungulu tlhelo Papayi wa hina, hi loku: Ku hlayisa a vanana va felweko hi vapswali ni tinoni kuxanisekeni kabye, ni ku tshama a nga hi na noda ya zvatiko.” — Jakobe 1:27, tlhamuselo wa lahasi.