Hikuyini Jesu a vitaniwako ku i N’wana wa Nungungulu?
Hlamulo wa Bhibhiliya
Ka zvikhati zvo tala a Bhibhiliya gi wula ku Jesu i “N’wana wa Nungungulu”. (Johani 1:49) A magezu “N’wana wa Nungungulu” ma komba lezvaku Nungungulu hi yena Muvangi kutani Cibuka ca gontlhe wutomi a ku patsa ni legi ga Jesu. (Lisimu 36:9; Kuvhululelwa 4:11) A Bhibhiliya a gi gondzisi lezvaku Nungungulu i pswele n’wana a ku fana ni lezvi a vanhu va pswalisako zvona vana.
A Bhibhiliya gi vitana a tingilozi kambe a ku i “vana va Nungungulu wa lisine”. (Joba 1:6) Niku a Bhibhiliya gi wula ku a munhu wo sangula, Adhamu, i wa hi n’wana “wa Nungungulu”. (Luka 3:38) Kanilezvi, kota lezvi Jesu a nga yena civangwa co sangula ca Nungungulu, ni kuva yena yece a vangilweko hi Nungungulu hi kukongoma, a Bhibhiliya gi mu vitana ku i N’wana wa lisima nguvhu wa Nungungulu.
Xana Jesu i hanyile tilweni na a nga se pswaliwa laha misaveni?
Ina. Jesu i wa hi civangwa ca moya le tilweni na a nga seta a ta pswaliwa kota munhu laha misaveni. Jesu wutsumbu i te: “Ndzi relele hi le tilweni”. — Johani 6:38; 8:23.
Nungungulu i vangile Jesu na a nga se vanga a zvilo zvontlhe lezvi zvin’wani. Na gi wulawula hi Jesu, a Bhibhiliya gi ngalo:
“Yena . . . matewula ya zvivangwa zvontlhe”. — Va Le Kolosi 1:15.
Yena “masangulo ya kuvanga ka Nungungulu”. — Kuvhululelwa 3:14.
Jesu i tatisile a ciphrofeto xungetano hi “loyi a nga kona kusukela zvikhatini zva kale, kusukela masikwini ya kaleloko.” — Mika 5:2; Matewu 2:4-6.
Zvini lezvi Jesu a nga maha na a nga seta misaveni?
I wa hi ni cikhundla co tlakuka le tilweni. Jesu i kumbukile a cikhundla leco a cikhati a nga khongela, aku: “Papayi, ndzi dhumise . . . hi wudzundzo legi ndzi nga hi nago na ndza ha hi zvin’we na wena a tiko na gi nga seva kona.” — Johani 17:5.
I vhunile a Papayi wakwe a ku vanga a zvilo zvontlhe lezvi zvin’wani. Jesu i tirile zvin’we na Nungungulu kota “meseri wa hombe”. (Mavingu 8:30) Na gi wulawula hi Jesu, a Bhibhiliya gi ngalo: “Hi ku tirisa yena, ku no vangiwa a zvilo zvontlhe lezvi zvin’wani, le tilweni ni laha misaveni”. — Va Le Kolosi 1:16.
Nungungulu i tirisile Jesu kasi ku vanga a zvilo zvontlhe lezvi zvin’wani. A zvivangwa lezvo zvi patsa a tingilozi tontlhe ni wuako gontlhe legi hi gi wonako . (Kuvhululelwa 5:11) Hi ndlela yo kari, lezvi Nungungulu na Jesu va nga tirisanisa zvona zva fana ni lezvi zvi mahekako ka mudhezenyari wa tiplanta ni muaki. A mudhezenyari o tsala a planta, a muaki a aka yindlu ya kona.
I tirile kota Gezu. Loku a Bhibhiliya gi wulawula hi wutomi ga Jesu na a nga seta laha misaveni gi Jesu i “wa hi Gezu”. (Johani 1:1) Lezvo zvi wula ku Nungungulu i tirisile a N’wana wakwe kasi a nyika mahungu ni zvileletelo a zvivangwa zvin’wani zva moya.
Zvi wonekisa ku khwatsi Jesu i tirile kambe kota Muwulawuli wa Nungungulu ka vanhu laha misaveni. Kuzvilava Nungungulu i tirisile Jesu kota Gezu kasi ku mu nyika zvileletelo Adhamu na Evha le sin’wini ga Edheni. (Genesisi 2:16, 17) Kuzvilava Jesu kuve yena a ngilozi leyi yi nga rangela a vaIzrayeli va kale lomu ciwuleni leyi a vaIzrayeli va nga fanele ku ingisa a gezu ga yona hi kutsumbeka. — Eksodhusi 23:20-23. a
a A Gezu a gi vangi gona goce a ngilozi leyi Nungungulu a nga wulawula hi yona. Hi cikombiso, Nungungulu i tirisile a vana van’wani va moya kasi ku va nyika a Nayo a vaIzrayeli va kale. — Mitiro 7:53; Va Le Galatiya 3:19; Mahebheru 2:2, 3.