Jesu i ponisile vanhu vo tsumbeka a cikhati leci a nga nyikela wutomi gakwe kota hakhelo ya kutlhatlhisa. (Matewu 20:28) Hikwalaho, a Bhibhiliya gi vitana Jesu ku “muhanyisi wa tiko.” (1 Johani 4:14) Gi tlhela giku: “A ku na kuhanyiswa hi ka mun’wani munhu, hakuva a ku na gin’wani vito lahasi ka tilo gi nga nyikwa vanhu legi hi nga hanyiswako hi gona.” — Mitiro 4:12.

 Jesu i ‘ringile kufa hi kota ya vanhu vontlhe.’ (Mahebheru 2:9; Johani 3:16) Andzhako ka lezvo, “Nungungulu i no mu vhuxa hi ka vafileko”, niku Jesu i no tlhela tilweni kota munhu wa moya. (Mitiro 3:15) Hi le matilweni, Jesu wa zvi kota “a ku hanyisa hi kumbhelela lava va tshinelako ka Nungungulu ha yena, hakuva yena wa hanya contlhe cikhati kasi ku va khongotelela.” — Mahebheru 7:25.

Hikuyini hi lavako ku Jesu a hi yimela ka Nungungulu?

 Hontlheni hi vawonhi. (Va Le Roma 3:23) A ciwonho ci veka libhiyo cikari ka hina na Nungungulu, niku ci yisa kufeni. (Va Le Roma 6:23) Kanilezvi Jesu i advhogadho wa lava va kombisako kukholwa ka hakhelo yakwe ya ku tlhatlhisa. (1 Johani 2:1) Jesu wa khongotela hi vona, a kombela Nungungulu lezvaku azwa mikhongelo yabye a tlhela a tsetselela zviwonho zvabye hi ku tirisa muphahlo wa kufa kakwe. (Matewu 1:21; Va Le Roma 8:34) Nungungulu wa ingisa a zvikombelo lezvo hakuva zvi yelana ni kurandza Kakwe. Nungungulu i rumele Jesu misaveni kasi “a tiko gi fela ku hanyiswa ha yena.” — Johani 3:17.

Kasi hi ponisiwa ku laveka basi a ku hi kholwa ka Jesu?

 Ahihi. Lisine ku hi fanele ku kholwa ka Jesu kasi hi ponisiwa, kanilezvi a zvi gami laho. (Mitiro 16:30, 31) A Bhibhiliya gi ngalo: “A ku khwatsi hi lezvi a miri lowu wu nga hiko na moya wu fileko, hi zvalezvo kambe, ni kukholwa loku ku nga hiko na mitiro ku file.” (Jakobe 2:26) Kasi hi ponisiwa hi fanele:

•   Ku gondza hi Jesu ni Papayi wakwe, Jehovha. — Johani 17:3.

•   Hi kholwa kabye. — Johani 12:44; 14:1.

•   Hi kombisa kukholwa ka hina hi ku ingisa a zvileletelo zvabye. (Luka 6:46; 1 Johani 2:17) Jesu i gondzisile lezvaku a hi vontlhe lava va mu vitanako ku “Hosi” va to ponisiwa kanilezvi ntsena lava va “mahako kurandza ka Papayi wa [yena] loyi a nga matilweni.” — Matewu 7:21.

•   Ku simama hi kombisa a kukholwa ka hina hambu loku hi kumana ni zvikarato. Jesu i zvi vekile kubaseni laha a ngaku: “Loyi a timiselako kala magumo hi yena a to ponisiwa.” — Matewu 24:13.