Kasi Jesu i wa tshamisile kuyini?
Hlamulo wa Bhibhiliya
A ku na munhu a zvi tivako hi ku kongoma lezvi Jesu a nga tshamisile zvona, hakuva a Bhibhiliya a gi tlhamuseli lezvi a miri wakwe wu nga tshamisile zvona. Lezvo zvi komba ku lezvi Jesu a nga tshamisile zvona a hi zvona zvi nga zva lisima. Kanilezvi a Bhibhiliya ga hi nyika masemanyana ya lezvi Jesu a nga tshamisile zvona.
Matshamela: Jesu i wa hi muJudha niku kuzvilava i wa tekelele a maxaka ya mamani wakwe. (Mahebheru 7:14) Zvi wonekisa ku khwatsi Jesu i wa nga hambani nguvhu ni vanhu van’wani. Ka khati go kari i no endza na zvi nga tiviwi hi munhu na a sukela Galileya aya Jerusalema niku a nga tiviwangi hi munhu. (Johani 7:10, 11) Lezvi Jesu a nga tshamisile zvona zvi wa nga hambani ni lezvi a vapizani vakwe va nga tshamisile zvona. Alakanya lezvaku zvi lavile ku Judhasi Iskariyoti a komba ku hi wihi Jesu ka citshungu leci ci nga hlomile ci lava ku mu khoma. — Matewu 26:47-49.
Misisi: Zva kanakanisa a ku Jesu i wa hi ni misisi yo leha hakuva a Bhibhiliya gi “a kuva ni misisi yo leha tingana ka wanuna”. — 1 Va Le Korinte 11:14.
Malevhu: Jesu i wa hi ni malevhu. I wa landzela a nayo wa ciJudha, wu nga betela vavanuna “ku hungulela a malevhu [yabye] ma sala na ma swarile”. (Levhi 19:27; Va Le Galatiya 4:4) Ahandle ka lezvo a Bhibhiliya gi kumbuka a malevhu ya Jesu ka ciphrofeto leci ci wulawulako hi kuxanisiwa kakwe. — Isaya 50:6.
Miri: Zvontlhe zvi komba ku Jesu i wa hi wanuna wo tiya. Ntirweni wakwe wa ku chumayela i wa famba tikilometro to tala nguvhu hi minenge. (Matewu 9:35) I basisile tempeli ya vaJudha makhati mambiri, a khubhunyeta timeza ta vacicisi va mali a tlhela a hlongola zvifuyo hi musephu. (Luka 19:45, 46; Johani 2:14, 15) A enciclopédia ya McClintock na Strong yi wula lezvi: “A mabhuku wontlhe ya tiIvhangeli ma komba lezvaku [Jesu] i wa hi ni miri wa ntamu niku i wa hi ni lihanyo linene.” — Vholume 4, pajina 884.
Nghohe: Jesu i wa hi munhu wa lirandzo a nga khatala hi vanhu niku handle ko kanakana a nghohe yakwe yi wa zvi kombisa lezvo. (Matewu 11:28, 29) A vanhu va tixaka tontlhe va wa lavetela Jesu kasi a va chavelela ni ku va vhuna. (Luka 5:12, 13; 7:37, 38) Hambu a vanana va wa tizwa khwatsi loku va hi na Jesu. — Matewu 19:13-15; Marku 9:35-37.
Mawunwa xungetano hi lezvi Jesu a nga tshamisile zvona
Wunwa: A vokari va kholwa lezvaku Jesu i wa tshamisile ku khwatsi munhu wa lomu Afrika hakuva a bhuku ga Kuvhululelwa gi fananisa a misisi yakwe ni woya ga yivhu niku a mikondzo yakwe yi fananisiwa ni “kobre yi hlutilweko”. — Kuvhululelwa 1:14, 15.
Lisine: A bhuku ga Kuvhululelwa gi tirisa a magezu yo fananisa. (Kuvhululelwa 1:1) Loku gi tlhamusela a misisi ni mikondzo ya Jesu, a bhuku ga Kuvhululelwa a gi wulawuli hi lezvi Jesu a nga tshamisile zvona a cikhati leci a nga hi laha misaveni kanilezvi hi matshamela yo kari lawa a nga wa tava nawo andzhako ka ku vhuxiwa hi ka vafileko. Kuvhululelwa 1:14 i wula lezvaku “a hloko yakwe ni misisi yakwe zvi wa basile a ku khwatsi i woya go basa, a ku khwatsi i gapongo”. Leci ci fananisiwako laha muvala wa misisi ya Jesu na ku nga hi lixaka la misisi. Laha ku khanyisiwa a wutlhari gakwe hi kota ya tanga yakwe. (Kuvhululelwa 3:14) A vhesi legi a gi fananisi a lixaka la misisi ya Jesu ni ya woya kutani ku fananisa a lixaka la misisi yakwe ni gapongo.
A mikondzo ya Jesu “yi wa ku khwatsi i kobre yi hlutilweko, loku yi phatima lomu ka ndzhimbo”. (Kuvhululelwa 1:15) A cin’wani kambe a “nghohe yakwe yi wa ku khwatsi i gambo loku gi woninga hi ntamu wa gona wontlhe.” (Kuvhululelwa 1:16) Kota lezvi ku nga hava vanhu va nga ni hlonge ya matshamela lawa ma tlhamuselwako laha, a muwoniso lowu wu wulawula hi zvilo zvo fananisa, wu komba lezvaku andzhako ka loku a vhuxilwe, Jesu ‘i tshamile kuwonekeleni ko kala ku nga tshineleleki’. — 1 Timote 6:16.
Wunwa: Jesu i wa nga hi na ntamu.
Lisine: Jesu i wa hi munhu wa ntamu ni wa kutiya-hlanha. Hi cikombiso, a cikhati leci a citshungu ci nga hlomile ci ngaya ci ya mu khoma, yena i ti tivekisile hi kutiya. (Johani 18:4-8) Jesu i wa hi ni ntamu hakuva i wa hi muvatli niku i wa tirisa a feramenta ya mandla. — Marku 6:3.
Makunu hikuyini zvi nga lava ku a vhuniwa a ku rwala a mhandze yakwe ya hlomulo? Kona hikuyini a nga ranga hi yena afa na ku nga sefa lava van’wani va nga belelwe zvin’we naye? (Luka 23:26; Johani 19:31-33) Na a nga se dawa, a miri wa Jesu wu wa karele nguvhu. I wa nga etlelangi a wusiku gontlhe. Niku a cin’we ca zvigelo zvi nga mu maha a nga etleli kuve hi kota ya lezvi zvi nga mu karata. (Luka 22:42-44) Ndzeni ka wusiku lego, i no xanisiwa hi vaJudha niku ni mixo ya kona i no xanisiwa hi vaRoma. (Matewu 26:67, 68; Johani 19:1-3) Zvontlhe lezvo zvi mahile ku Jesu a hatlisa afa.
Wunwa: Jesu i wa tshama na a miyele, na a kwatile.
Lisine: Jesu i wa kombisa hi kumbhelela a matshamela ya Jehovha, a Papayi wakwe wa le tilweni, loyi a Bhibhiliya gi mu vitanako ku i “Nungungulu wo tsaka”. (1 Timote 1:11; Johani 14:9) Hi lisine Jesu i gondzisile van’wani lezvi va nga li kumisako zvona litsako. (Matewu 5:3-9; Luka 11:28) Lezvo zvi komba lezvaku Jesu i wa tshama na a tsakile.
Hi alakanya ku u ta zvi tsakela
TIGONDZO-TSHINYA TA BHIBHILIYA
Hi nga tiyisekisa kuyini lezvaku a Bhibhiliya gi wula lisine?
Loku ku hi ku a Bhibhiliya gi tumbuluxilwe hi Nungungulu, gi fanele ku hambana ni wontlhe ma nga kona.
HI HINA VAMANI?
Kombela ku endzelwa
Bhula xungetano hi ciwutiso ca Bhibhiliya kutani ku gondza zvin’wani xungetano hi Vakustumunyu va Jehovha.