Nungungulu i lava lezvaku a vanhu va “tsika wubhayi.” (1 Va Le Tesalonika 4:3) Lomu ka Bhibhiliya a gezu “wubhayi” gi patsa ku a wanuna a hlengela masango ni wanuna-kuloni kutani wasati ni wasati-kuloni, ni kuhlengelwa ka masango hi wanuna ni wasati na va nga chadhangi zvin’we.

•  Hikuyini Nungungulu a lavako lezvaku a vanhu lava va lavako ku wumba a ngango va sangula hi ku chadha?

•  Nungungulu i zvi wonisa kuyini ku a wanuna ni wasati va sangula hi ku hanya zvin’we na va nga se chadha kota ndlela ya ku wona ku va fanelana ke?

•  A nuna ni sati va nga gi tiyisisa kuyini a wukati gabye?

•   A lulamiselo ga muchadho gita hi ka Nungungulu. I yimisile a muchadho a cikhati leci a nga chadhisa Adhamu na Evha. (Genesisi 2:22-24) I wa nga lavi lezvaku a wanuna ni wasati va hanya zvin’we na va nga chadhangi hi nayo.

•   Nungungulu wa zvi tiva lezvi zvi nga zvinene ka vanhu. I wumbile wukati kasi giva kubohana ka kala kupindzuka cikari ka wanuna ni wasati kasi ku vhuna ni kuvhikela a zviro zvontlhe zva ngango. Ehleketa hi mufananiso lowu wo olova. A ku fana ni lezvi a phepha ga zvileletelo zva mumahi wa nchumu wo kari gi tlhamuselako lezvi u nga wu faselisako zvona a nchumu lowo, a zvileletelo zva Nungungulu zvi hi byela lezvi hi nga mahako kasi kuva ni ngango wo tsaka. Contlhe cikhati lava va landzelako a milayo ya Nungungulu va vhuneka. — Isaya 48:17, 18.

•   A kuhlengela masango ni wokari na u nga chadhangi naye zvi na ni mawuyawuya yo bava. Hi cikombiso, a munhu a nga xura nyimba yo kala a nga yi lavi, ku thapelwa hi mababyi ma kumiwako hi ku hlengela masango, ni kutizwa na a nga vhuni nchumu.

•   Nungungulu i mahile a wanuna ni wasati hi ndlela ya ku va zvi kota kupswala vana hi kuhlengela masango. A wutomi gi basile ka Nungungulu, niku a ku a wanuna ni wasati va zvi kota kuva ni vana cinyikiwo co hlawuleka. Nungungulu i lava lezvaku hi ci nyika lisima a cinyikiwo leci hi ku kombisa cichavo hi lulamiselo ga wukati. — Mahebheru 13:4.

 Kasi kuva ni wukati ga ginene a zvi lavi ku a wanuna ni wasati va sangula hi ku hanya zvin’we hi cikhati co kari kasi ku gondzana laha zvi kotekako ku va tsikana ni ka cihi cikhati. Wutshan’wini ga lezvo, a wanuna ni wasati va fanele ku a mun’we ni mun’wani a ti yimisela ku hanya ni mun’wani ni ku vhunana ku hlula zvikarato. a A muchadho wa tiyisa wukati. — Matewu 19:6

 A ku na wukati go mbhelela. Hambulezvo, a nuna ni sati va ngava ni ngango wo tsakisa loku va tirisa a wusungukati ga Bhibhiliya. Wona zvikombiso zvo kari:

•   Rangisa a zvilaveko zva nuna kutani sati wa wena. — 1 Va Le Korinte 7:3-5; Va Le Filipi 2:3, 4.

•   Randzanani mu tlhela mu kombisana a cichavo. — Va Le Efesusi 5:25, 33.

•   Gondza ku ti wonela ka lezvi u wulako. — Mavingu 12:18.

•   Kombisa lihlazva-mbilu u tlhela u hatlisa ku tsetselela. — Va Le Kolosi 3:13, 14.