A Bhibhiliya gi yini xungetano hi ku nyika?

BISA

Hlamulo wa Bhibhiliya

A Bhibhiliya gi hi kuca u hi hana hi kuzvirandza niku hi fanele ku hana hi zvigelo zva zvinene. Gi komba lezvaku a ku nyika a zvi vhuni basi loyi a amukelako kanilezvi ni loyi a nyikako. (Mavingu 11:25; Luka 6:38) Jesu i te: “Loyi a nyikako wa tsaka nguvhu a ku hundza loyi a amukelako.” — Mitiro 20:35.

Hi rini laha a ku nyika zvi tsakisako Nungungulu

A ku nyika ka tsakisa Nungungulu loku hi ku maha hi ku zvi randza. A Bhibhiliya gi ngalo: “A mun’we ni mun’wani i wa nyike lezvi a bohileko mbilwini yakwe, na a nga nguranguri kutani ku kurumetiwa, hakuva Nungungulu i randza loyi a nyikako na a tsakile.” — 2 Va Le Korinte 9:7, tlhamuselo wa lahasi.

A ku hana na zvi sukela mbilwini zvi maha cipandze ca “wukhongeli legi” Nungungulu a gi amukelako. (Jakobe 1:27, tlhamuselo wa lahasi) A munhu loyi a hanako a vhuna lava va nga cikaratweni i tirisana na Nungungulu, niku Nungungulu i zvi wona na zvi hi ku mu pemba. (Mavingu 19:17) A Bhibhiliya gi gondzisa lezvaku Nungungulu i ta mu tlhelisela a munhu loyi a nyikako. — Luka 14:12-14.

Hi rini laha a ku nyika zvi nga mu tsakisiko Nungungulu?

Loku zvi mahiwa hi zvigelo zvo biha. Hi cikombiso:

Kasi ku woniwa hi vanhu. — Matewu 6:2.
Kasi ku wuyelwa. — Luka 14:12-14.
Kasi ku xava a kuhanyiswa. — Lisimu 49:6, 7.

Loku zvi seketela a mitiro kutani mahanyela lawa Nungungulu a ma vengako. Hi cikombiso, zvi wa tava zvi bihile a ku nyika wokari a mali kasi a bela tibheja, kutani kudzaha ni kunwa. (1 Va Le Korinte 6:9, 10; 2 Va Le Korinte 7:1) Hi kufanana, a zvi ringani a ku nyika munhu a nga ni ntamu wa ku ti tirela ha yece a kuma mali kanilezvi a alako ku tira. — 2 Va Le Tesalonika 3:10.

Loku zvi maha ku hi nga ha khataleli a wutihlamuleli legi hi nyikilweko hi Nungungulu. A Bhibhiliya gi gondzisa lezvaku a tihloko ta mingango ti fanele ku khatalela a zvilaveko zva mingango ya tona. (1 Timote 5:8) Zvi wa nga tava zvinene ku a hloko ya ngango yi hana nguvhu ka van’wani laha ka kuza a va ngango wakwe va sala va xaniseka. Hi kufanana, Jesu i solile lava va nga ala ku hlayisa a vapswali vabye va khosaheleko va ti yimelela vaku a zvilo zvabye “cinyikiwo ci nyikelweko ka Nungungulu”. — Marku 7:9-13.

Mavhesi ya Bhibhiliya xungetano hi ku nyika

Mavingu 11:25: “A munhu wa kuhana i ta kateka, ni loyi a tangalisako van’wani i ta tangalisiwawu.”

Lezvi zvi wulako zvona: A ku nyika a zvi vhuni ntsena loyi a amukelako kanilezvi zvi vhuna kambe ni loyi a nyikako.

Mavingu 19:17: “Loyi a vhunako a cisiwana i pembisa ka Jehovha, niku Yena i ta mu tlhelisela hi kota ya lezvi a mahako.”

Lezvi zvi wulako zvona: Nungungulu i ti wona na a hi ni mangava ni lava va vhunako a zvisiwana niku i tsumbisa ku va chachazela hi kota ya kuhana kabye.

Matewu 6:2: “Loku u ci nyika nchumu a cisiwana, u ngabi mpundzu mahlweni ka wena a ku khwatsi hi lezvi a vakanganyisi va mahako . . . kasi va dzundziwa hi vanhu.”

Lezvi zvi wulako zvona: A hi faneli ku nyika van’wani hi ku fela ku woniwa.

Mitiro 20:35: “Loyi a nyikako wa tsaka nguvhu a ku hundza loyi a amukelako.”

Lezvi zvi wulako zvona: A ku hana na zvi huma mbilwini zvi tisa litsako.

2 Va Le Korinte 9:7: “A mun’we ni mun’wani i wa nyike lezvi a bohileko mbilwini yakwe, na a nga nguranguri kutani ku kurumetiwa, hakuva Nungungulu i randza loyi a nyikako na a tsakile.”

Lezvi zvi wulako zvona: Loyi a nyikako hi ku zvi randza i tsakisa Nungungulu.