Na hi nga se tiva ku hi rini ku to chikela a kugumesa ka tiko, hi fanele ku tiva a tlhamuselo wa gezu “tiko” lomu ka Bhibhiliya. A gezu ga ciGreki ga ku kósmos, legi gi talako ku hundzuluselwa giku “tiko”, a kutala ka zvikhati gi wula a vanhu, nguvhunguvhu a vanhu lava va kalako va nga mahi a kurandza ka Nungungulu. (Johani 15:18, 19; 2 Pedro 2:5) Ka zvikhati zvin’wani, a gezu kósmos gi wula ndlela leyi a vanhu va nga xaxametiwa hi yona, yi patsako a politika, wukhongeli ni mabhindzu. — 1 Va Le Korinte 7:31; 1 Johani 2:15, 16. a

Cini a “kugumesa ka tiko”?

 A magezu lawa ya ku “kugumesa ka tiko”, ma kumekako ka wuhundzuluseli go tala ga Bhibhiliya, ma nga hundzuluselwa kambe maku “nguva” kutani “kugumesa ka zvikhati”. (Matewu 24:3; Nova Versão Internacional) A magezu “kugumesa ka tiko” a ma wuli a kulovisiwa ka misava kutani ka vanhu vontlhe, kanilezvi ma wula a kugumesa ka lezvi a vanhu va nga xaxametisiwa zvona nyamutlha, lezvi zvi patsako a politika, wukhongeli ni mabhindzu. — 1 Johani 2:17.

 A Bhibhiliya gi gondzisa lezvaku a “vakubiha va ta lovisiwa” niku ntsena a vanhu va vanene hi vona va to ti budza hi wutomi laha misaveni. (Lisimu 37:9-11) A vanhu vakubiha va ta lovisiwa ‘kuxanisekeni ka hombe’ loku ku to gumesa yimpini ya Armagedhoni. — Matewu 24:21, 22; Kuvhululelwa 16:14, 16.

A kugumesa ka tiko ku ta chikela rini?

 Jesu i te: “Xungetano hi siku lego ni cikhati ca kona i hava a zvi tivako, ne tingilozi ta matilo ne hambu N’wana, zvo tiviwa hi Papayi yece.” (Matewu 24:36, 42) I tlhelile a wula ku a kugumesa ku ta chikela ‘hi cikhati hi nga ci alakanyiko’. — Matewu 24:44.

 Hambu lezvi hi nga gi tiviko a siku ni cikhati co kongoma, Jesu i wulawulile hi zvilo zvo tala zvo hambanahambana zvi nga wa ta humelela na ku nga se chikela a kugumesa ka tiko, a zvilo lezvo zvi nga “cikombiso” zvi wa ta hi vhuna a ku tiva a cikhati ci yisako kugumeseni ka tiko. (Matewu 24:3, 7-14) A Bhibhiliya gi vitana a cikhati leco giku ‘cikhati ca magumo’, kutani ‘masiku ya kugumesa’. — Dhaniyeli 12:4; 2 Timote 3:1-5.

Ci kona ci to sala andzhako ka kugumesa ka tiko?

 Ina. A misava yi ta simama yi hi kona, hakuva a Bhibhiliya gi wula lezvaku “yi nga ta susiwa wutshan’wini ga yona kala kupindzuka ni kupindzuka”. (Lisimu 104:5) Kota lezvi a Bhibhiliya gi tsumbisako, a misava yi ta tala hi vanhu: “A valulamileko va taga tshomba ya misava, va hanya ka yona kala kupindzuka.” (Lisimu 37:29) Nungungulu i ta neha a matshamela lawa a nga ma lava kusanguleni:

•   Paradhise. — Isaya 35:1; Luka 23:43.

•   A vanhu va ta hanya kuruleni va tlhela vava ni zvontlhe va zvi lavako kasi ku hanya. — Mika 4:4.

•   Vontlhe va tava ni ntiro wa wunene ni wo tsakisa. — Isaya 65:21-23.

•   I hava a to babya ne ku khosahala. — Joba 33:25; Isaya 33:24.