A Bhibhiliya gi komba lezvaku Nungungulu a nga vangangi Dhiyabho. Kanilezvi i no vanga munhu loyi a ngava Dhiyabho. A Bhibhiliya gi wula lezvi xungetano hi Nungungulu: ‘A mitiro yakwe yi mbhelele; hakuva tontlhe tindlela takwe ti lulamile; i Nungungulu wa kutsumbeka, loyi a nga hiko na kukanganyisa; i na ni wunene, i lulamile.’ (Deuteronome 32:3-5) Hi ka magezu lawa, hi nga chikelela magumo ya lezvaku Sathani Dhiyabho ka cikhati co kari ive wo mbhelela ni wo lulama, a mun’we a vana va Nungungulu va tingilozi.

 Ka Johani 8:44, Jesu i wulile lezvaku Dhiyabho “a nga simamangi lisineni”, a komba ku Sathani, ka cikhati co kari, i wa tsumbekile ni ku ngavi na nandzu.

 Hambulezvo, a ku khwatsi hi zvivangwa lezvi zvin’wani zva Jehovha zvi pimisako, a ngilozi leyi yi ngava Sathani yi wa tlhatlhekile ku hlawula cikari ka zvazvinene ni zvakubiha. Hi ku hlawula a ku vhukela Nungungulu ni ku kucetela a patswa wo sangula wa vanhu lezvaku wu ti patsa nayo, a ngilozi leyo yi no ti maha Sathani ha yoce, zvi wulako ku “Mukaneti”. — Genesisi 3:1-5; Kuvhululelwa 12:9.