A muphahlo wa Jesu i ndlela leyi Nungungulu a yi tirisako kasi ku tlhatlhisa kutani ku ponisa vanhu ka ciwonho ni kufa. A Bhibhiliya gi wula lezvaku a nkhata wu halatilweko wa Jesu wu fana ni presu yi humesiwako kasi ku tlhatlhisa nchumu. (Va Le Efesusi 1:7; 1 Pedro 1:18, 19) Hi cona cigelo leci Jesu a ngaku i tile laha misaveni kasi a ta “nyikela wutomi gakwe kota hakhelo ya ku tlhatlhisa votala.” — Matewu 20:28.

Hikuyini ku nga laveka a “hakhelo ya ku tlhatlhisa votala”?

 A wanuna wo sangula, Adhamu, i vangilwe na a mbhelele, kutani na a nga hi na ciwonho. Na a hanyile kala kupindzuka, kanilezvi i luzile a thomo lego a cikhati leci a nga hlawula kungaingisi Nungungulu. (Genesisi 3:17-19) Laha Adhamu a ngava ni vana i no va thapelisa a ciwonho. (Va Le Roma 5:12) Hi cigelo leco, a Bhibhiliya gi komba lezvaku Adhamu i ti ‘xavisile’ ni vana vakwe ka wukhumbi ga ciwonho ni kufa. (Va Le Roma 7:14) Kota lezvi va nga kala ku mbhelela, i hava ni mun’we wabye a nga wa ta zvi kota ku xava lezvi Adhamu a zvi luzileko. — Lisimu 49:7, 8.

 Nungungulu i no wu zwela wusiwana a pswalo wa Adhamu ka ciyimo leci wu nga hi ka cona ca ku ngavi ni kutsumba. (Johani 3:16) Hambulezvo, a nayo wa Nungungulu wa kululama wu wa nga mu vhumeleli lezvaku a tsetselela kutani ku ti vhala matihlo ka zviwonho zvabye na a nga hi na ciseketelo co zwala. (Lisimu 89:14; Va Le Roma 3:23-26) Nungungulu wa va randza vanhu, hikwalaho i lavile ndlela ya nayo ya lezvaku a zviwonho zvabye zvi tsetselelwa zvi tlhela zvi vhinyiwa. (Va Le Roma 5:6-8) A hakhelo ya kutlhatlhisa hi yona a ndlela leyo ya nayo.

Yi tirisa kuyini a hakhelo ya kutlhatlhisa?

 Lomu ka Bhibhiliya, a magezu “hakhelo ya ku tlhatlhisa” ma patsa a zvilo lezvi zva zvinharu:

1.   I hakhelo. — Mitsengo 3:46, 47.

2.   Ya tlhatlhisa. — Eksodhusi 21:30.

3.   Wu ringana ni ntsengo wa leci ci hakhelwako. a

 Wona lezvi a zvilo lezvi zva zvinharu zvi tirisisako zvona ka hakhelo ya kutlhatlhisa ya Jesu Kristu.

1.   Hakhelo. A Bhibhiliya gi wula lezvaku a maKristu ma “xavilwe hi ntsengo”. (1 Va Le Korinte 6:20; 7:23) A ntsengo lowo i nkhata wa Jesu, lowu a nga mu xavela hi wona “Nungungulu a vanhu va tixaka tontlhe, ni tirimi, ni mifumo, ni matiko”. — Kuvhululelwa 5:8, 9.

2.   Kutlhatlhisa. A muphahlo wa kutlhatlhisa wa Jesu wu maha ku zvi koteka ku hi tlhatlhisiwa ka ciwonho. — 1 Va Le Korinte 1:30; Va Le Kolosi 1:14; Mahebheru 9:15.

3.   Kuringana. A muphahlo wa Jesu wu ringana khwatsi ni lezvi Adhamu a nga zvi luza — a wutomi ga munhu go mbhelela. (1 Va Le Korinte 15:21, 22, 45, 46) A Bhibhiliya gi ngalo: “A ku khwatsi hi lezvi a kungaingisi ka munhu mun’we ku nga maha votala vava vawonhi, hizvalezvo kambe, a kuingisa ka munhu mun’we ku ta maha votala va wuliwa vo lulama.” (Va Le Roma 5:19) Lezvo zvi tlhamusela lezvi a kufa ka munhu mun’we ku nga rihisako zvona a hakhelo ya ku tlhatlhisa vawonhi vo tala. Kunene, a muphahlo wa Jesu i “hakhelo ya kutlhatlhisa yi enelako vanhu vontlhe” lava va bako a mazambo ma lavekako kasi va vhuneka hi yona. — 1 Timote 2:5, 6.