Ahihi. A Bhibhiliya gi komba lezvaku hi fanele ku khongela ka Nungungulu ntsena, hi vito ga Jesu. Jesu i te ka vapizani vakwe: “Khongelisani lezvi: ‘Papayi wa hina wa le tilweni, a vito ga wena a gi basisiwe.’” (Matewu 6:9) A nga tshukangi a gondzisa a vapizani vakwe a ku khongela ka vobasa, ka tingilozi kutani ka mun’wani munhu ahandle ka Nungungulu.

 Jesu i tlhelile a byela a valandzeli vakwe, aku: “Mina ndzi ndlela, ni lisine, ni wutomi. A ku na munhu a tako ka Papayi na a ngati hi laha ka mina.” (Johani 14:6) Jesu hi yena yece a vhumelelweko hi Nungungulu lezvaku ava mutlhanganisi wa hina na yena. — Mahebheru 7:25.

Ahanti a ku khongela ka Nungungulu ni ka vobasa ke?

 Ka cipandze co kari ca Khume ga Milayo, Nungungulu i te: ‘Mina Jehovha, Nungungulu wa wena, ndzi Nungungulu wo pinyama’. (Eksodhusi 20:5, BGB) Jehovha i Nungungulu wo “pinyama” kutani wa ciluse hi ndlela muni? A Wuhundzuluseli ga Misava Yiswa gi wula lezvaku yena i “Nungungulu loyi a londzako ku khozelwa yece”. Nungungulu i lava lezvaku a wukhozeli ga hina a ku patsa ni mikhongelo ya hina zvi yisiwa ka yena yece. — Isaya 48:11.

 Ha mu kwatisa Nungungulu loku hi khongela ka vanhu van’wani, ka vobasa kutani ka tingilozi. Laha mupostoli Johani a nga zama ku khozela ngilozi, a ngilozi leyo yi no mu betela, yiku: “U nga mahi lezvo! Ndzi nandza a ku fana na wena ni vamakabye va wena lava va nga ni ntiro wa ku nyika wukustumunyu ha Jesu. Khozela Nungungulu!” — Kuvhululelwa 19:10.