Mikayeli, loyi a wukhongeli go kari gi nge hi “Mikayeli wo Basa”, zvi wonekisa ku khwatsi i vito ga Jesu legi a nyikilweko na a nga seta misaveni ni ndzhako ka loku a tlhelile tilweni. a Mikayeli i lwile na Sathani andzhako ka loku Mosi a file niku i vhunile a ngilozi yo kari a ku yisa mahungu ya Nungungulu ka muphrofeti Dhaniyeli. (Dhaniyeli 10:13, 21; Judha 9) A vito Mikayeli gi wula ku “Himani a fanako na Nungungulu?” A vito lego ga mu fanela Jesu hakuva i yimela Mufumo wa Nungungulu niku ilwa ni valala va Nungungulu. — Dhaniyeli 12:1; Kuvhululelwa 12:7.

 Wona ku hikuyini hi wulako ku Jesu hi yena Mikayeli, a ngilozi ya hombe.

•   Mikayeli i “ngilozi ya hombe”. (Judha 9) A cikhundla leci caku “ngilozi ya hombe” ci wulako ku “murangeli wa tingilozi”, ci kumeka ka mavhesi mambiri basi ya Bhibhiliya. Ka mavhesi lawo wontlhe, a gezu legi gi wula munhu mun’we, niku lezvo zvi komba ku i ngilozi yin’we basi yi nga ni cikhundla leco. A gin’we ga mavhesi lawo gi wula lezvaku Hosi Jesu, loyi a vhuxilweko, i ‘ta relela hi le tilweni na a kari a vitana hi kulaya, hi gezu ga ngilozi ya hombe’. (1 Va Le Tesalonika 4:16) Jesu i na ni “gezu ga ngilozi ya hombe” hakuva hi yena Mikayeli, a ngilozi ya hombe.

•   Mikayeli i rangela a butho ga tingilozi. “Mikayeli ni tingilozi takwe va nolwa na dragawu” Sathani. (Kuvhululelwa 12:7) Mikayeli i na ni ntamu wa hombe le ku tshamako a zvivangwa zva moya, hakuva i vitaniwa ku “yin’we ya tihosana ta hombe” ni “hosana ya hombe”. (Dhaniyeli 10:13, 21; 12:1) A zvikhundla lezvi zvi komba ku Mikayeli hi yena “komandante wa hombe wa mabutho ya tingilozi”, kota lezvi David E. Aune a wulileko, a nga tlhari ya Testamenta ga Giswa.

   A Bhibhiliya gi kumbuka a vito gin’wani ga munhu mun’we basi a nga ni ntamu wa ku rangela a butho ga tingilozi. Gi tlhamusela a ‘kuwonekeliswa ka Hosi Jesu hi le tilweni ni tingilozi takwe ta ntamu ndzilweni wu vhurako, laha a to neha kuphota’. (2 Va Le Tesalonika 1:7, 8; Matewu 16:27) Jesu “i yile tilweni, zvonake a tingilozi, ni tihosi, ni mitamu zvi no vekiwa lahasi kakwe.” (1 Pedro 3:21, 22) Zvi wa nga ta zwala ku Nungungulu a yimisa Jesu na Mikayeli lezvaku vava vakomandante vambiri va nga zwaniko va tingilozi takwe to basa. Wutshan’wini ka lezvo, hi nga wula ku a mavito wontlhe ya mambiri, legi ga ku Jesu ni legi ga ku Mikayeli, ma wula a munhu yaloyi wa mun’we.

•   Mikayeli ‘i ta suka a yima cikhatini ca kuxaniseka’ ka hombe ka ku a ku se tshuka kuva kona. (Dhaniyeli 12:1) Ka bhuku ga Dhaniyeli, a magezu ‘ku suka u yima’ a kutala ka zvikhati ma tirisiwa kasi ku wula a hosi ‘yi sukako yi yima’ kasi ku maha ntiro wo hlawuleka. (Dhaniyeli 11:2-4, 21) Jesu Kristu loyi a wuliwako kambe ku “i Gezu ga Nungungulu” i ta maha ntiro wo hlawuleka kota “Hosi ya tihosi” hi ku lovisa a valala vontlhe va Nungungulu ni ku vhikela a vanhu va Nungungulu. (Kuvhululelwa 19:11-16) I ta maha lezvo cikhatini ca “kuxaniseka ka hombe ka ku a ku se tshuka ku humelela kusukela kuvangiweni ka tiko”. — Matewu 24:21, 42.