A ku Nungungulu i kumeka ka matshamu wontlhe hi cikhati caleci ca cin’we?
Hlamulo wa Bhibhiliya
Nungungulu wa zvi kota ku wona a zvilo zvontlhe niku a nga maha ni cihi a ci lavako ka ni gihi wutshamu. (Mavingu 15:3; Mahebheru 4:13) Hambulezvo, a Bhibhiliya a gi gondzisi lezvaku Nungungulu wa kumeka ni kwihi hi cikhati caleci ca cin’we ka zvilo zvontlhe. Wutshan’wini ga lezvo, gi komba lezvaku yena munhu niku i tshama ka wutshamu go kari.
Lezvi Nungungulu a nga tshamisa zvona: Nungungulu i moya. (Johani 4:24) A zvi koteki ku hi mu wona. (Johani 1:18) A miwoniso yi wulawulako hi Nungungulu, yi tsalilweko lomu ka Bhibhiliya, yi komba hi kuphindaphinda lezvaku i na ni wutshamu go kongoma a tshamako kona. A ku tlhamuselwi lezvaku Nungungulu i ka ni gihi wutshamu. — Isaya 6:1, 2; Kuvhululelwa 4:2, 3, 8
Lomu Nungungulu a tshamako kona: Nungungulu i hanya ka wutshamu ga moya legi gi hambanileko ni wuako legi hi gi wonako. Hi ka wutshamu lego ga moya, Nungungulu a “tshamako kona, matilweni”. (1 Tihosi 8:30) A Bhibhiliya gi kumbuka a khati go kari laha a zvivangwa zva moya zvi “nga ya ti wonekelisa mahlweni ka Jehovha”. a Lezvo zvi komba ku Nungungulu i tshama ka wutshamu go kari go kongoma. — Joba 1:6.
Loku ku hi ku Nungungulu a nga kona ka wontlhe matshamu, xana wa khatala hi mina?
Ina. Nungungulu wa khatala nguvhu hi mun’we ni mun’wani wa hina. Hambu lezvi a hanyako ka wutshamu ga moya, Nungungulu wa va wona laha misaveni lava hakunene va lavako a ku mu tsakisa niku wa va vhuna. (1 Tihosi 8:39; 2 Kronekele 16:9) Wona lezvi Jehovha a kombisisako zvona ku wa khatala hi malandza yakwe yo tsumbeka:
Loku u khongela: Ka cikhati caleci u mahako mukhongelo wa wena Jehovha a nga wuzwa. — 2 Kronekele 18:31.
Loku u karatekile: “Jehovha i kusuhani ni lava va pandzekileko timbilu; i hanyisa lava va nga ni moya wu tshovekileko.” — Lisimu 34:18.
Loku u lava wurangeli: Jehovha i ‘ta ku nyika wutlhari, a ku gondzisa’ hi ku tirisa a Mhaka yakwe, a Bhibhiliya. — Lisimu 32:8.
Mawunwa xungetano hi kuva ka matshamu wontlhe hi cikhati caleci ca cin’we
Wunwa: Nungungulu i kona ka zvontlhe lezvi a zvi vangileko.
Lisine: Nungungulu a nga tshami laha misaveni kutani ni ka gihi wutshamu wuakweni. (1 Tihosi 8:27) Lisine ku a tinyeleti ni zvivangwa zvin’wani zva “huwelela a kungangamela ka Nungungulu”. (Lisimu 19:1) Kanilezvi, Nungungulu a nga tshami ka zvilo lezvi a zvi vangileko a ku khwatsi hi lezvi a pintor a kalako a nga tshami ka kwadru legi a gi pintarileko. Hambulezvo, a kwadru lego gi nga hi byela a zvokari xungetano hi pintor loyi a nga gi maha. Hi kufanana, a wuako legi hi gi wonako gi hi byela zvokari xungetano hi ‘matshamela ma nga wonekiko’ ya Muvangi, yo kota a ntamu wakwe, wutlhari ni lirandzo. — Va Le Roma 1:20.
Wunwa: Nungungulu a ngava wa ntamu wontlhe a tlhela a tiva zvontlhe loku a kumeka ka matshamu wontlhe hi cikhati caleci ca cin’we.
Lisine: A moya wo basa wa Nungungulu i ntamu wu tirako wa Nungungulu. Hi ku tirisa a moya wakwe wo basa, Nungungulu a nga wona zvontlhe a tlhela a maha ni cihi, ka ni gihi wutshamu ni cikhati a ci lavako, na zvi nga zangi zvi lava ku ava kona laho. — Lisimu 139:7.
Wunwa: Lisimu 139:8 i gondzisa lezvaku Nungungulu i kumeka ka matshamu wontlhe hi cikhati caleci ca cin’we, hakuva li ngalo: “Loku ndzi wo tlakukela tilweni, u wa tava kwaseyo, ni loku ndzi wo etlela Cilahleni, ni kwaseyo kambe u wa tava kona.”
Lisine: A mutsalo lowu a wu wulawuli hi lomu Nungungulu a tshamako kona. Kanilezvi wu tirisa a magezu yo sasekiselwa kasi ku hi gondzisa lezvaku Nungungulu a nga hi vhuna ni kwihi laha hi nga kona.
a A Bhibhiliya gi komba lezvaku a ku Jehovha i vito ga Nungungulu.
Hi alakanya ku u ta zvi tsakela
ZVIWUTISO ZVI HLAMULIWAKO HI BHIBHILIYA
Xana Nungungulu i ta ndzi vhuna loku ndzi khongela?
Xana Nungungulu i na ni mhaka hi zvikarato zva hina?
HI HINA VAMANI?
Kombela ku endzelwa
Bhula xungetano hi ciwutiso ca Bhibhiliya kutani ku gondza zvin’wani xungetano hi Vakustumunyu va Jehovha.