A kunwa byala na u tiva ku ti pimela a hi ciwonho. A Bhibhiliya gi a vhinyo cinyikiwo ca Nungungulu, a nchumu wu nga mahako ku a wutomi gi nandziha. (Lisimu 104:14, 15; Mutshawuteli 3:​13; 9:7) Ga vhumela kambe lezvaku a vhinyo i muri. ​— 1 Timote 5:​23.

 Jesu i nwile vhinyo a cikhati leci a nga hi laha misaveni. (Matewu 26:29; Luka 7:​34) A cin’we ca zvihlamaliso zvakwe co tiveka nguvhu hi leci a nga cica mati mava vhinyo kota cinyikiwo ca kuhana mubuzweni wa muchadho.​ — Johani 2:​1-​10.

Timhango ta kunwa nguvhu

 Hambu lezvi a Bhibhiliya gi wulawulako zvazvinene hi vhinyo, ga kona a ku popiwa ni wudhakwa. Hikwalaho, a muKristu loyi a hlawulako kunwa byala i fanele ku tiva ku ti pimela. (1 Timote 3:8; Titusi 2:​2, 3) A Bhibhiliya gi nyika zvigelo zvo tsalangana zva ku nganwi u hundzisa. Wona zvokari:

•   A kunwa nguvhu zvi goha kupima ni ku tiva lezvi zvi nga zvinene. (Mavingu 23:29-​35) A munhu loyi a popilweko a nga zvi koti ku landzela cileletelo ca Bhibhiliya ca ‘ku nyikela a miri wakwe kota muphahlo wu hanyako, wo basa ni wu amukelekako ka Nungungulu, a maha ntiro wo basa hi ntamu wa kupima kakwe’. ​— Va Le Roma 12:1.

•   Loyi a nwako nguvhu i tsika ku ti khoma a tlhela a ‘lahla mapimo ya ku maha zvazvinene’. ​— Hosea 4:​11; Va Le Efesusi 5:​18.

•   A kunwa nguvhu ku nga yisa wusiwaneni ni ku vanga mababyi ya hombe.​ — Mavingu 23:21, 31, 32.

•   A ku popiwa ni wudhakwa a zvi mu tsakisi Nungungulu.​ — Mavingu 23:20; Va Le Galatiya 5:​19-​21.

A ku hundzisa mpimo kunwa go kota kwihi?

 A munhu i wulwa ku i nwile a hundzisa loku anwa laha ka kuza ava mhangweni yena wutsumbu kutani ku veka van’wani mhangweni. A ku popiwa a hi ntsena kunwa u tsandzeka ni ku famba. A Bhibhiliya gi xaxameta zvokari zvi mahekako loku a munhu a nwile a hundzisa. A tipeni takwe a ta ha thayithi, a tolovela ku phikiza, a wulawula zvi nga tlhamuki ni ku dhedheleka loku a famba. (Joba 12:25; Lisimu 107:27; Mavingu 23:29, 30, 33) Hambu loyi a tiyileko laha ka kuza a ngayi hi ku popiwa, wa zvi kota ‘ku bindziwa hi kunwa a hundzeleta’ zvonake a tshovela mawuyawuya ya kona yo bava.​ — Luka 21:34, 35.

Ku nganwi ne gitsongwani

 A Bhibhiliya gi komba ku, ka zvin’wani zvikhati, i chukwana ku a muKristu a nganwi byala ne gitsongwani. Hi cikombiso:

•   Loku ku hi lezvaku a wokari i ta khunguvanyeka ha zvona. ​— Va Le Roma 14:21.

•   Loku ku hi lezvaku a kunwa byala ku hambunyeta nayo.​ — Va Le Roma 13:1.

•   Loku ku hi lezvaku a nga ha zvi koti ku hambana nago. Loyi a nga civilelo kutani a nwako a hundzisa i fanele ku maha zvahombe.​ — Matewu 5:​29, 30.