Ina, Dhiyabho i kona futsi. Yena i “hosana ya tiko”. I ngilozi yi nga cica yiva yo biha yi vhukela Nungungulu. (Johani 14:30; Va Le Efesusi 6:11, 12) A Bhibhiliya ga hi byela lezvi Dhiyabho a nga tshamisa zvona hi ku tirisa mavito ni magezu ma mu tlhamuselako:

•   Sathani, zvi wulako ku “Mukaneti”. — Joba 1:6.

•   Dhiyabho, zvi wulako ku “Mulumbeti”. — Kuvhululelwa 12:9.

•   Nyoka, leyi lomu ka Bhibhiliya yi tirisiwako kasi ku wula “Mukanganyisi”. — 2 Va Le Korinte 11:3.

•   Muringi. — Matewu 4:3.

•   Muhembi. — Johani 8:44.

Sathani a hi wubihi legi gi nga ndzeni ka munhu

 A vokari va alakanya lezvaku Sathani Dhiyabho wubihi legi hina vanhu hi nga nago ndzeni ka hina. Kanilezvi, lomu ka Bhibhiliya ku tsalilwe a mabhulo ya Nungungulu na Sathani. Nungungulu i mbhelele, makunu i wa nga ta wulawula ni cipandze co kari co biha ca yena wutsumbu. (Dhewuteronome 32:4; Joba 2:1-6) Hi kufanana, Sathani i ringile Jesu, wo kala a nga hi na ciwonho. (Matewu 4:8-10; 1 Johani 3:5) Hikwalaho, a Bhibhiliya gi komba lezvaku Dhiyabho i kona futsi a hi wubihi ntsena gi nga ndzeni ka munhu.

 Hi fanele ku hlamala hi lezvi a vanhu va kutala va nga kholwiko lezvaku Sathani i kona? Ne ni kutsongwani, hakuva a Bhibhiliya gi wula lezvaku Sathani i tirisa wukanganyisi kasi ku tatisa makungo yakwe. (2 Va Le Tesalonika 2:9, 10) A wukanganyisi gakwe ga hombe a gi tirisako nguvhu ku vala a matihlo ya vanhu vo tala, va nga kholwi lezvaku i kona. — 2 Va Le Korinte 4:4.

  Wunwa: Lucifer i vito gin’wani ga Dhiyabho.

 Lisine: A gezu ga ciHebheru legi a maBhibhiliya yo kari ma gi hundzuluselako giku “Lucifer” gi wula ku “kungangamela”. (Isaya 14:12) A mongo wu komba lezvaku a gezu legi gi wula a xaxamelo wa tihosi ta Bhabhuloni leti ti nga wa ta koramiswa hi Nungungulu hi kota ya matshandza ya tona. (Isaya 14:4, 13-20) A gezu “kungangamela” gi tirisilwe kasi ku poyila a xaxamelo wa tihosi ta Bhabhuloni andzhako ka loku ti wile.

  Wunwa: Sathani i tirela Nungungulu kasi a tatisa kungo gakwe ga ku lamula vanhu.

 Lisine: Dhiyabho i nala wa Nungungulu, a hi nandza gakwe. Sathani Dhiyabho i vhukela a tlhela a lumbeta a vanhu lava va tirelako Nungungulu. — 1 Pedro 5:8; Kuvhululelwa 12:10.