Nungungulu i hlawulile a ntsengo wo kari wa maKristu yo tsumbeka, lawa andzhako ka kufa, ma to vhuxiwa ma ya hanya le tilweni. (1 Pedro 1:3, 4) Andzhako ka kuva ma hlawulilwe, a maKristu lawa ma fanele ku simama ma tsumbekile ni ku hanya hi ndlela yi tsakisako Nungungulu. Ma fanele ku maha lezvo kasi ma nga luzi a kutsumba ka wona ka ku ya hanya tilweni. — Va Le Efesusi 5:5; Va Le Filipi 3:12-14.

Zvini lezvi lava va hlawulilweko kuya tilweni va toya va ya maha?

 Va ta tira zvin’we na Jesu kota tihosi zvin’we ni vapristi hi 1000 wa malembe. (Kuvhululelwa 5:9, 10; 20:6) Va ta wumba a “matilo maswa” kutani mufumo wa matilo, lowu wu to fumela “misava yiswa”, yi wumbiwako hi vanhu lava va to hanya laha misaveni. Lava va to fuma le tilweni va ta vhuna a vanhu a kuva vo mbhelela kota lezvi Nungungulu a nga zvi lavisa zvona kusukela kusanguleni. — Isaya 65:17; 2 Pedro 3:13.

Vanhu vangani va to vhuxiwa vaya tilweni?

 A Bhibhiliya gi komba lezvaku a 144 000 wa vanhu va ta vhuxiwa va ya hanya tilweni. (Kuvhululelwa 7:4) Ka muwoniso wo kari wu tsalilweko ka Kuvhululelwa 14:1-3, mupostoli Johani i wonile “a Yivhana na yi yimile Citsungeni ca Ziyoni, na yi hi ni 144 000” wa vanhu. Ka muwoniso lowo, a “Yivhana” yi yimela Jesu a vhuxilweko hi ka vafileko. (Johani 1:29; 1 Pedro 1:19) ‘A Citsunga ca Ziyoni’ ci yimela a cikhundla co tlakuka ca Jesu ni lava va 144 000 lava va to fuma zvin’we naye le matilweni. — Lisimu 2:6; Mahebheru 12:22.

 “Lava va vitanilweko ni va hlawulilweko” kasi ku fuma na Kristu Mufun’weni va vitaniwa ku i “ntlhambi wu tsongwani”. (Kuvhululelwa 17:14; Luka 12:32) Lezvo zvi komba ku va tava va tsongwani loku va fananisiwa ni ntsengo wontlhe wa tiyivhu ta Jesu. — Johani 10:16.

Mawunwa xungetano hi lava va yako tilweni

 Wunwa: A numero leyi ya 144 000 yi wuliwako ka Kuvhululelwa ya ku fananisa, a hi ya civiri.

 Lisine: Hambu lezvi a bhuku ga Kuvhululelwa gi nga ni tinumero to fananisa, a tinumero to kari ti tirisiwa hi ndlela yo kongoma. Hi cikombiso, gi wulawula hi “12 wa mavito ya 12 wa vapostoli va Yivhana.” (Kuvhululelwa 21:14) Wona a cikombiso ca lezvaku a numero leyi ya 144 000 yi wula a ntsengo wo kongoma, a hi wa ku fananisa.

 Kuvhululelwa 7:4 i wula lezvaku ‘a ntsengo wa lava va fungilweko [kutani va tiyisekisilweko lezvaku va ta ya hanya tilweni] i 144 000’. Kanilezvi loku u relelanyana lahasi ka Kuvhululelwa, ku hambanisiwa a ntlawa lowu wa 144 000 ni wun’wani. A vhesi gi wulawula hi “citshungu ca hombe, ca ku i hava a nga zvi kota ku hlaya”. Lava va wumbako citshungu leco ca hombe, vonawu va ta ponisiwa hi Nungungulu. (Kuvhululelwa 7:9, 10) Loku a numero ya 144 000 yi wova yo fananisa, na yi wula a ntsengo wu nga gemiwangiko wa vanhu, a kuhambana ka mitlawa leyi ya yimbiri ku wa nga ta zwala. a

 Ahandle ka lezvo, a bhuku ga Kuvhululelwa hi wula kambe lezvaku lava va 144 000 “va xavilwe cikari ka vanhu kasi vava mihandzu yo sangula”. (Kuvhululelwa 14:4) A magezu “mihandzu yo sangula” ma tirisiwa kasi ku wula ntsengo wu tsongwani wu yimelako zvontlhe lezvi zvin’wani. A magezu lawo ma va tlhamusela khwatsi lava va to fuma zvin’we na Jesu le tilweni. I ntsengo wu tsongwani loku wu ringanisiwa ni ntsengo wa tsandza-vahlayi wa vanhu va to hanya laha misaveni. — Kuvhululelwa 5:10.