A yimpi ya Armagedhoni ku wuliwa a yimpi yo gumesa ya mifumo ya vanhu na Nungungulu. Hambu zvezvi, a mifumo leyi ni lava va yi seketelako valwa na Nungungulu hi ku ala ku ti veka hasi ka wufumeli gakwe. (Lisimu 2:2) A yimpi ya Armagedhoni yi ta lovisa mifumo yontlhe ya vanhu. — Dhaniyeli 2:44.

 A gezu Armagedhoni gi kumeka khati gin’we lomu ka Bhibhiliya, lomu ka Kuvhululelwa 16:16. Hi ndlela ya kuphrofeta, a bhuku ga Kuvhululelwa gi komba lezvaku ka “wutshamu legi hi ciHebheru gi vitaniwako ku i Armagedhoni”, a “tihosi ta misava yontlhe” ti ta tlhanganisiwa kasi tilwa “yimpi ya siku ga hombe ga Nungungulu wa Ntamu Wontlhe.” — Kuvhululelwa 16:14.

 Himani a tolwa yimpini ya Armagedhoni? Jesu Kristu i ta rangela a butho ga le tilweni kasi ku hlula a valala va Nungungulu. (Kuvhululelwa 19:11-16, 19-21) A valala lavo va patsa lava va vhukelako a wuhosi ga Nungungulu ni lava ma mu kanyisako. — Ezekiyeli 39:7.

 Xana a yimpi ya Armagedhoni yi ta lwiwa le Médio Oriente? Ahihi. A yimpi ya Armagedhoni yi nga tava ya wutshamu gin’we basi kanilezvi yi ta eneta a misava yontlhe. — Jeremiya 25:32-34; Ezekiyeli 39:17-20.

 A gezu Armagedhoni legi a zvikhati zvin’wani gi hundzuluselwako ku “Har–Magedon” (hi ciHebheru Meghiddóhn), gi wula ku “Citsunga ca Megidho.” Megidho gi wa hi dhoropa gi nga hi tikweni ga Izrayeli wa kale. A matimu ma wulawula hi tiyimpi ta lisima ti lwilweko ka wutshamu lego a ku patsa ni to kari ti tsalilweko lomu ka Bhibhiliya. (Valamuli 5:19, 20; 2 Tihosi 9:27; 23:29) Kanilezvi, a Armagedhoni a ku wuliwi wutshamu ga civiri kusuhani ni Megidho wa kale. A ka ha hi na citsunga ca hombe seyo niku hambu a livala lontlhe la Jezreeli, li nga kusuhani ni wutshamu lego a li nge eneli vontlhe lava va tolwa na Nungungulu. Hi ndlela leyo, a Armagedhoni ku wuliwa a ciyimo ci to humelela misaveni yontlhe laha a matiko ma to bohana hi khati go gumesa ma vhukela a mufumo wa Nungungulu.

 Yi ta lwisiwa kuyini a yimpi ya Armagedhoni? Hambu lezvi hi kalako hi nga zvi tivi lezvi Nungungulu a to wu tirisisa zvona a ntamu wakwe, i na ni matlhari yo kota lawa a ma tirisileko kale: maralala, zvitsekatseka zva misava, ndambi, ndzilo ni solufa, zvingwalangwandla ni mababyi. (Joba 38:22, 23; Ezekiyeli 38:19, 22; Habhakuka 3:10, 11; Zakariya 14:12) A valala vo kari va Nungungulu va ta dayana hi civona, kanilezvi, hi kugumesa va ta zvi tiva lezvaku hi Nungungulu a lwako na vona. — Ezekiyeli 38:21, 23; Zakariya 14:13.

 Xana a yimpi ya Armagedhoni kugumesa ka tiko? Yi nga ta fuvisa a planeta ya hina hakuva a misava i muti wa vanhu kala kupindzuka. (Lisimu 37:29; 96:10; Mutshawuteli 1:4) Wutshan’wini ga ku lovisa vanhu, a yimpi ya Armagedhoni yi ta va ponisa, hakuva “a citshungu ca hombe” ca malandza ya Nungungulu ci ta pona. — Kuvhululelwa 7:9, 14; Lisimu 37:34.

 Hambu lezvi a Bhibhiliya gi tirisako a gezu “tiko” kasi ku wula misava, ka zvikhati zvin’wani ga gi tirisa kambe kasi ku wula a vanhu va kubiha va vhukelako Nungungulu. (1 Johani 2:15-17) Hi ka mongo lowo a Armagedhoni yi tova “kugumesa ka tiko”. — Matewu 24:3.

 A Armagedhoni yi ta maheka rini? Na a wulawula hi kuxaniseka ka hombe loku ku to hi yisa yimpini ya Armagedhoni, Jesu i te: “Xungetano hi siku lego ni cikhati ca kona i hava a zvi tivako, ne tingilozi ta matilo ne hambu N’wana, zvo tiviwa hi Papayi yece.” (Matewu 24:21, 36) Hambulezvo, a Bhibhiliya gi komba lezvaku a Armagedhoni yi ta maheka cikhatini ca kuvakona ka Jesu ku nga wonekiko, ku sangulileko hi 1914. — Matewu 24:37-39.